ကျောက်မဲမြို့နယ်တွင် “နတ်ဆေးရည်”ဟု နာမည်ကြီးနေသည့် တောင်ကျရေကို ဆွေမျိုးသွားလည်ရင်း ချိုးမိရာမှ မိုင်းတုံမြို့မှ သက်ကြီးအဘွား ၁ ဦး ထပ်မံသေဆုံးသွားကြောင်း စုံစမ်းသိရသည်။
အောက်တိုဘာလ ၂၂ ရက် နေ့လည်ပိုင်းတွင် မိုင်းတုံမြို့မှလာသည့် အသက်(၆၄)နှစ်အရွယ် ဒေါ်ငင်းဆွယ်သည် ကျောက်မဲ-မိုင်းငေါ့ကားလမ်းရှိ တောင်ကျရေချိုးပြီး ဆွေမျိုးအိမ်အရောက်တွင် သေဆုံးသွားကြောင်း ကျောက်မဲဒေသခံတစ်ဦးက သျှမ်းသံတော်ဆင့်ကို ပြောသည်။
“တကယ်တော့ သူက မိုင်းတုံကနေ အမျိုးတွေရှိတဲ့ လွယ်ခေါ်ရွာကို အလည်လာတာ။ ဒီဘက်ရောက်တော့ သူများတွေ ရေချိုးကြတာဆိုတော့ သူကလည်း အညောင်းအညာဖြစ်တယ်ပေါ့ အသက်ကလဲ ကြီးပြီဆိုတော့။ ရေကတော့ တောင်ကျရေဆိုတော့ စိမ့်ပြီး အေးမှာ၊ သူစီးလာတဲ့ ကားကလည်း နောက်ဖက် အမိုးပွင့်ဆိုတော့ အပြန်မှာ လေတိုက်တယ် ပြောရမယ်။ ဆွေမျိုးအိမ်ရောက်တော့ ညဘက်မှာ ဆုံးသွားတယ်၊ အခြေအနေကြည့်ရတာ သွေးတိုးဖြစ်ဟန်တူတယ်”ဟု နာရေးကူညီခဲ့ရသည့် နမ့်ခုံး ပရဟိတ ကျောက်မဲအသင်းခွဲမှတာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
သဘာဝအတိုင်း တောင်ကျရေထွက်သည့် ကျောက်မဲ-မိုင်းငေါ့ကားလမ်းရှိ ထိုနေရာတွင် ယခင်က ရေဇလောက် တစ်ခုသာ ရှိရာမှ ယခုအခါတွင် ၅ ခု၊ ၆ ခု အထိ တိုးလာသည်ဟု ရေသွားချိုးသူများထံမှ သိရသည်။
“ရေကတော့ ဘေးဖြစ်တာမဟုတ်ဘူး။ ဒါပေမယ့် ဖျားနာပျောက်ခါစလူတွေ သွားချိုးရင်တော့ မသင့်တော်ဘူးလို့ မြင်တယ်။ ရေကတော့ လူကို အန္တရာယ်မဖြစ်စေပါဘူး။ အကယ်၍ အအေးမိထားတာ၊ ဖျားနေတာကိုမှ သွားချိုးရင်တော့ မသင့်တော်ဘူး၊ ဘာလို့လဲဆိုရင် ရေက တောင်ကြောထဲက ကျောက်နံရံတွေကနေ ထွက်လာဆိုတော့ ပိုဆိုးနိုင်တယ်”ဟု ၎င်းက ဆက်ပြောသည်။
ပြီးခဲ့သည့် အောက်တိုဘာလ ၁၇ ရက်နေ့တွင် နမ့်ဆန်မြို့နယ် မြို့သစ်ရွာမှ အသက်(၄၀)ကျော်အရွယ် အမျိုးသမီးတစ်ဦးလည်း ၎င်းတောင်ကျရေ သွားချိုးရင်း ထိုနေရာတွင် သေဆုံးခဲ့သည်။
“အဝေးက မရောက်ဖူးသေးတဲ့လူတွေတော့ လာနေကြသေးတယ်။ ရေလာမချိုးရတော့ဘူး၊ ပိုက်ဆံမကောက်ရတော့ဘူးဆိုပြီး တားမြစ်လိုက်ပြီလို့ ဒေသခံတွေဆီက ကြားရတယ်။ ရေမချိုးဖို့ လာတားတဲ့ အဖွဲ့တော့ ရှိပြီပြောတယ်”ဟု ကျောက်မဲ-မိုင်းငေါ့ ဒေသခံတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့မှ မိုင်းငေါ့မြို့သွားရာလမ်းရှိ နမ့်မန်းရွာသည် ယခင်က အိမ်ခြေ ၁၅ အိမ်ခန့် ရှိပြီး ၂၀၂၀ ခုနှစ် ဝန်းကျင်က RCSS နှင့် TNLA တပ်ဖွဲ့တို့၏ တိုက်ပွဲများကြောင့် ရွာပျက်ခဲ့သည်။
Leave a Comments