အင်းလေးဖောင်တော်ဦး ဘုရားပွဲသို့ အာဏာသိမ်း စစ်ခေါင်းဆောင် မင်းအောင်လှိုင် နှင် ဇနီးဖြစ်သူတို့လာရောက် ဖူးမျော်မည် ဖြစ်ကြောင်း ဒေသခံများထံ သတင်းရရှိသည်။
ယခုလ အောက်တိုဘာ ၁၅ရက် မှစတင်ကာ အောက်တိုဘာ ၂၁ဌာနများသို့ ဒေသစာရီကြွချီ အပူဇော်ခံလျက်ရှိသော ဖောင်တော်ဦး ဘုရားသည် လင်းကင်းမှ မြို့တော်ညောင်ရွှေသို့ ရောက်ရှိမည့်အချိန်တွင် စစ်ခေါင်းဆောင်နှင့် ဇနီး မှ လာရောက်ဖူးမျော်မည်ဖြစ်ကြောင်း သိရသည်၊
အောက်တိုဘာလ ၂၂ ရက်တွင် သျှမ်းပြည်နယ် ညောင်ရွှေမြို့ကျောင်းတော်သို့ ရောက်ရှိပြီး ၃ရက်တာ ကိန်းဝပ်စံပါယ်တော်မူမည့် ဖောင်တော်ဦးဘုရား ဆီသို့ စစ်ခေါင်းဆောင် မင်းအောင်လှိုင်နှင့် ဇနီးဖြစ်သူတို့က တောင်ကြီးမြို့မှတဆင့် သွားရောက်မည်ဖြစ်ပြီး “ဆွဲလှေ”ပြိုင်ပွဲကိုလည်း ကြည့်ရှုအားေပးမည်ဖြစ်ကြောင်း ညောင်ရွှေမြို့ခံများထံမှ သိရသည်။
“လူကြီးလာမယ်ဆိုပြီး ဆိုင်တွေ လာပိတ်ခိုင်းထားလို့ ပိတ်ထားရတယ်လေ ဒီကြားထဲ စားဖို့ခက်ခဲဦးမယ် ဆိုင်ကယ်ရပ်နားတဲ့ နေရာတွေလည်း ၅ရက်လောက် ပိတ်ထားရမယ်လို့ ကြားတယ်”လို့ ပျံကျဈေးသည်တစ်ဦးမှ ပြောသည်။
၃နှစ်တာ ရပ်နားခဲ့ရသည့် အင်းလေးဖောင်တော်ဦး ဘုရားပွဲကို ယခုနှစ်တွင် ပြန်လည်ကျင်းပခွင့်ရကြပြီး စစ်ခေါင်းဆောင်ခရီးစဉ်ကြောင့် တောင်ကြီးမြို့နှင့် ညောင်ရွှေမြို့တို့၏ မိန်းလမ်းမတလျှောက်ရှိ လမ်းဘေးပျံကျဆိုင်များကို ပိတ်ခိုင်းထားကြောင်းသိရသည်။
ထို့ပြင် ကား၊ ဆိုင်ကယ်ရပ်နားခွင့်ကိုလည်း ၅ ရက်ကြာ ပိတ်ထားကြောင်း၊ ဘား၊ ကလပ်နှင့် စားသောက်ဆိုင်များတွင် သီချင်းသီဆိုခြင်း၊ သီချင်းကျယ်လောင်စွာဖွင့်ခြင်းများကိုလည်း ပိတ်ပင်ထားကြောင်း ဒေသခံများထံမှ သိရသည်။
သီတင်းကျွတ်ကာလအခါသမယ၌ အင်းလေးဖောင်တော်ဦးဘုရား ဒေသစာရီကြွချီချိန် ကရဝိတ်ဖောင်တော်ကို ဆွဲယူ၍ ဘုရားပင့်ဆောင်ရန်အတွက် ကမ္ဘာပေါ်တွင် တစ်နေရာထဲ၌သာရှိသော ခြေထောက်ဖြင့် လှေလှော်သည့် အင်းသားများက ဆွဲလှေကို အသုံးပြုပြီး ကုသိုလ်ယူလေ့ရှိကြသည်။
ကျွန်းသစ် တစ်မျိုးတည်းသာအသုံးပြုထားပြီး အရှည် ၆၈တောင်ရှိသည့် လူတစ်ရာကျော်စီးနိုင်သည့် ရာကျော်လှေ အဖြစ်လည်း ထင်ရှားကျော်ကြားသည်။ ဆွဲလှေပြိုင်ပွဲကိုဘုရားပွဲနေ့၌ စည်ကားသိုက်မြိုက်စွာ ကျင်းပလေ့ ရှိကြောင်းသိရသည်။
Leave a Comments