ကြားဖြတ်ရွေးကောက်ပွဲကျင်းပမဲ့ မဲဆန္ဒနယ်တွေထဲမှာ မိုင်းရှူးမြို့နယ် မဲဆန္ဒနယ်လည်း ပါ၀င်ပါတယ်။ ပြည်သူ့လွှတ်တော် ( ၁) နေရာ ၊ ပြည်နယ်လွှတ်တော် (၂) နေရာ ရှိတဲ့ မိုင်းရှူးမဲဆန္ဒနယ်ဟာ ဒေသခံ တိုင်းရင်းသားတွေအပြင် တစ်ချိန်က နာမည်ကျော်ခဲ့တဲဲ့ မိုင်းရှူးကျောက်မျက်ရတနာ လုပ်ကွက်တွေကြောင့် ဗမာအပါ၀င် တခြားရွှေ့ပြောင်းအခြေချနေထိုင်သူတွေလည်း ရှိနေတဲ့ ဒေသဖြစ်ပါတယ်။ အာဏာရ NLDပါတီကလည်း ဗဟိုအလုပ်အမှုဆောင်ကို်ယ်တိုင်ရွေးကောက်ပွဲဝင်ရောက်ယှဉ်ပြိုင်မှာဖြစ်ပြီး အစဉ်အလာအရ သျှမ်းတိုင်းရင်းသားပါတီနဲ့ ပြိုင်ဆိုင်မှု ပြင်းထန်နိုင်ခြေတွေလည်း မြင်နေရပါတယ်။ လတ်တစ်လောမှာကိုပဲ သျှမ်းတိုင်းရင်းသား ကျေးရွာအချို့က မဲရုံတွေကို ရွှေ့ဆိုင်းပေးဖို့ NLD ဘက်က တင်ပြထားခဲ့ပါတယ်။ မိုင်းရှူးရွေးကောက်ပွဲ အကြို အခြေနေတွေနဲ့ ဒေသခံတွေရဲ့ အမြင်တွေကို မိုင်းရှူးရောက်နေတဲ့ သျှမ်းသံတော်ဆင့်သတင်းထောက် စိုင်းအောင်ဆိုင်းက စုစည်းတင်ပြထားပါတယ်။

ဦးစိုင်းစိန်မြင့် ( မိုင်းရှူး ရပ်ကွက် ၁ ဒေသခံ )

ဒေသခံပြည်သူတွေအကြားမှာတော့ တိုင်းရင်းသား ပြည်မသားဆိုပြီး စိတ်တွေ မရှိကြဘူး။ ပြိုင်ဆိုင်မှု ပြင်းထန်နေတာ ပါတီတွေပဲရှိတယ်။ အဓိက ပြဿနာတွေဖြစ်နေတာလည်း ပါတီကြီးတွေကြောင့်ဖြစ်ပါတယ်။ ပါတီကြီးတွေဆိုတာ ပြည်မက လာပြိုင်တဲ့ NLD၊ ပြည်ခိုင်ဖြိုးတို့ပေါ့ ။ ကျန်တာက သိတဲ့အတိုင်း ပါတီငယ်တွေဖြစ်တဲ့ ကျားခေါင်း SNLD ၊ SNDP ကျားဖြူ ၊ ၀ ပါတီတွေပဲ ပြိုင်မှာလေ။ မဟာမိတ်လည်းဆိုခဲ့သေးတယ် ပါတီကြီးအနေနဲ့ ပါတီငယ်တွေကို သြဇာသုံးပြီး ဖိအားပေးတာမျိုး မဖြစ်စေချင်ဘူး။ အခုလုံခြုံရေးအကြောင်းပြတယ်ဆိုပေမဲ့ SSPP/SSA ကလည်း သူ့နယ်မြေထဲ မဲဆွယ်နိုင်ကြောင်း ကြေငြာချက်ထုတ်ပြီးသားပဲ။ ကျနော်က မဲစာရင်းပါတယ်။ လာမဲ့ ကြားဖြတ်ရွေးကောက်ပွဲ မဲထည့်မယ်။ ရွေးကောက်ပွဲကို အေးအေးချမ်းချမ်းပဲ ပြီးသွားစေချင်တယ်။ ပြည်သူတွေအကြားအားပြိုင်မှုမရှိဘူး။ ရွေးချယ်ခံရတဲ့ ကိုယ်စားလှယ်အနေနဲ့ ဒေသဖွံ့ဖြိုးရေးအတွက် အာရုံစိုက်စေချင်တယ်။ လူ့အခွင့်ရေးဆုံးရှံူးမှု မရှိအောင် ပညာရေး ကျန်းမာရေး ကိစ္စတွေ အပါ၀င်ပေါ့လေ။ ပညာရေးဆိုရင် ဆရာဆရာမ အရေအတွက်တိုးလာပေမဲ့ သင်ကြားပုံနည်းစနစ်က အခက်အခဲတွေ့စရာဖြစ်တယ်။ အထူးသဖြင့် ဒေသခံအများစုက တိုင်းရင်းသားတွေဖြစ်တော့ မြန်မာဘာသာနဲဲ့ ချက်ခြင်းသင်တော့ အခက်အခဲရှိတယ်။ တိုင်းရင်းသားဘာသာ အခြေပြုသင်ကြားမှုတွေကို အစားထိုးစေချင်တယ်။ ဒေသတွင်းမှာက ငြိမ်းချမ်းဖို့လိုတယ်။ ငြိမ်းချမ်းဖို့ ဆိုတာကလည်း အပစ်ရပ်စဲပြီးမှ နိုင်ငံရေး ဆွေးနွေး ငြိမ်းချမ်းရေးပေါ့။ အပစ်ရပ်စဲမှု မလုပ်နိုင်သေးရင်လည်း ဘာကြောင့်မလုပ်နိုင်ရသေးသလဲဆိုတာ တာဝန်ရှိသူတွေက ပြန်စဉ်းစားသင့်တယ်။ ငြိမ်းချမ်းရေးမရှိရင် စီးပွားရေး တိုးတက်မှု နှောင့်နှေးမှာပေါ့။ ရွေးချယ်ခံကိုယ်စားလှယ်အနေနဲ့ ပြည်သူ့အသံ ထင်ဟပ်အောင် လုပ်ပေးစေချင်တယ်။

ဦးဝင်းမြင့် ( ဗမာလူမျိုး ရပ်ကွက် ၁ ထော်လဂျီမောင်း )

ကိုယ့်အခွင့်အရေးကို လက်လွတ်ဆုံးရှံုးမခံတဲ့အနေနဲ့ မဲသွားပေးပါမယ်။ ဒေသအတွက် ဖွံ့ဖြိုးဖို့ လုပ်ကိုင်စေချင်တယ် အရွေးခံရတဲ့ ကိုယ်စားလှယ်အနေနဲ့ပေါ့လေ။

နန်းခမ်းစိန် ( မှီခို ရပ်ကွက် ၂ )

အရင် ၂၀၁၀ တုန်းကလည်း မဲထည့်ခဲ့တယ်။ အရင် လွှတ်တော်သက်တမ်းတုန်းက ကိုယ်စားလှယ်တွေက ထင်သလောက် မဖြစ်ဘူး။ မဲထည့်မယ်လာမဲ့ ရွေးကောက်ပွဲကို ။ ဒီမှာ ကြားမိသလောက် လူပြောများတာ ကျားခေါင်းပါတီပဲ။ ဒေသတွင်းပါတီဆိုတော့ လူတွေ စိတ်ဝင်စားတယ်။ လှုပ်ရှားမှုက သူတို့ပါတီက များတယ်။ ကျမတို့မြို့ရွာမှာ လိုအပ်ချက်ကတော့ အများကြီးပဲ။ ငြိမ်းချမ်းရေးလိုကိစ္စမျိုး အကြီးကြီးတောင်မဟုတ်ဘူး။ လူထုနဲ့ နီးစပ်တဲ့ ပညာရေး ၊ ကျန်းမာရေးလိုကိစ္စတွေကို အတတ်နိုင်ဆုံး တိုးတက်အောင်လုပ်ပေးစေချင်တယ်။

ဦးအိုက်အဲ့ ( စျေးရောင်း မိုင်းရှူးမြို့ခံ )

၁၉၉၀ ရွေးကောက်ပွဲတုန်းက ကျားခေါင်းပါတီကိုမဲထည့်တယ်။ ၂၀၁၀ တုန်းက ကျားဖြူပါတီကို မဲထည့်ခဲ့တယ်။ ပြီးခဲ့တဲ့ လွှတ်တော်သက်တမ်းတုန်းက ကိုယ်စားလှယ်တွေကို သိပ်ပြီးအားရ ကျေနပ်မှု မရှိခဲ့ဘူး။ ဒေသတွင်း အခြေနေကိုကြည့်ရင် အခု အစိုးရသစ်လက်ထက်မှာတောင် အားရစရာ အခြေနေမရှိဘူး။ တောင်သူတွေက ပြောင်းစျေးကျ သီးနှံစျေးကျနဲ့ ဒုက္ခရောက်တဲ့အပြင် အစိုးရကလည်း အရေးပေါ် သီးနှံဝယ်ပေးတဲ့ အစီအစဉ်တွေမရှိဘူး။ ပြောင်းဆိုရင် တရုတ်ဘက်ကိုပဲ ပို့ရတာ။ တရုတ်ဘက်ပို့တဲ့ လမ်းတွေမှာလည်း တိုက်ပွဲတွေဖြစ်တယ်။ NLD ကို မဲထည့်ဖို့ဆိုတာ ဒေသခံတွေအတွက် တော်တော်လေးကို စဉ်းစားရမဲ့ ကိစ္စဖြစ်ပါတယ်။ အရင်အစိုးရ လက်ထက်တွေကတည်းက ရှိခဲ့တဲ့ ဒုစရိုက်မှုတွေ မူးယစ်ကိစ္စတွေက အစိုးရသစ်လက်ထက်မှာလည်း ရှိနေဆဲပဲ။ NLDသာတက်လာသာ မူးယစ်ဆေးဝါးပြဿနာတွေလည်း မရှင်းနိုင်သေးဘူး။ အရင်တုန်းက မိုင်းရှူးကျောက်က နာမည်ကြီးခဲ့ပေမဲ့ ဒေသခံဆိုတာက ဒေသခံ ဆိုတဲ့ အတိုင်းပါပဲ။ လယ်ပျက်တယ်။ ယာပျက်တယ် အသိမ်းခံရတယ်။ ကြားထဲ မူးယစ်သားကောင်ဖြစ်ကျန်ခဲ့တာပဲ အဖတ်တင်တယ်။ အများစုက ခရိုနီတွေ လာယူသွားတယ်။ လျှပ်စစ်မီးတောင် ဒီနှစ်ကမှရတယ်။

ငြိမ်းချမ်းရေးရဖို့ အရေးကြီးသလို လွှတ်တော်ကိုယ်စားလှယ်အနေနဲ့ ပြည်သူ့အသံ ထင်ဟပ်အောင်ကြိုးစားဖို့လိုတယ်။ ကျားခေါင်းပါတီကို ဒေသခံတွေက အားပေးကြတာများတယ်။