ကချင်ပြည် ဗန်းမော်မြို့ အရှေ့ညောင်ပင်ရပ်ကွက်ရှိ အောင်သီရိ ရွှေဆိုင်အား ဆိုင်ကယ်နှင့်လာသည့် အမျိုးသား ၆ ဦးမှ ဓားပြတိုက်သွားကြောင်း ဒေသခံများထံမှ သိရသည်။
အောက်တိုဘာလ ၂၀ ရက် နံနက် ၉နာရီဝန်းကျင်တွင် နှာခေါင်းစည်း (Mask) တပ်ဆင်ထားသော အမျိုးသား ၆ဦးသည် အောင်သီရိ စိန်ရွှေရတနာရောင်းဝယ်ရေး ဆိုင်တွင်းသို့ ဝင်ရောက်လာပြီး ပါလာသည့်သေနတ်ဖြင့် ဆိုင်ရှင်အား ခြိမ်းခြောက်ကာ လက်ဝတ်ရတနာ ပစ္စည်းများကို ယူဆောင်သွားကြောင်း ဗန်းမော်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
” ဆိုင်ရှင် အစ်မကို သေနတ်နဲ့ ထောက်ထားပြီး ဆိုင်ထဲက ရောင်းဖို့ပြထားတဲ့ ရွှေထည်ပစ္စည်းတွေ အကုန်ယူသွားကြတာလို့ ပြောတယ် လူ ၆ ယောက်က ဆိုင်ကယ် ၃စီး နဲ့ လာဓားပြတိုက်သွားကြတာ ကျမတို့ရောက်တော့ ရဲတွေ လာစစ်ဆေးနေကြပြီ “လို့ ၎င်းဆိုသည်။
ဓားပြတိုက်မှုဖြစ်ပွားပြီးနောက် လုံခြုံရေးအဖွဲ့ဝင်များလာရောက်၍ စစ်ဆေးမှုများ လုပ်ဆောင်ခဲ့ပြီး ကျုးလွန်သူများကို ဖမ်းဆီးရမိရေး ရပ်ကွက်အတွင်းရှိ လမ်းများအား ပိတ်ဆို့ရှာဖွေ စစ်ဆေးမှုများပြုလုပ်လျက်ရှိကြောင်း သိရသည်။
