Thursday, May 30, 2024

ဖယ်ခုံမြို့နယ် ရေကြီးရေလျှံမှုကြောင့် စစ်ရှောင်များနှင့် ဒေသခံများ အကူညီလိုအပ်နေ

Must read

စိုင်းဟန်လင်း၊ ၂၀၂၃ အောက်တိုဘာလ ၁၈ ရက်

သျှမ်းပြည် ဖယ်ခုံမြို့နယ်အတွင်း ရေကြီးရေလျှံဖြစ်ပွားမှုကြောင့် ဒေသခံနေအိမ်များအပါအဝင် စစ်ရှောင်ယာယီတဲများနစ်မြုပ်သွားခဲ့ကြောင်း စုံစမ်းသိရသည်။

သျှမ်း-ကရင်နီ နယ်စပ်ဒေသ ရေလွှမ်းခံရသည့် စစ်ရှောင်ယာယီတဲ

အောက်တိုဘာလ ပထမပတ်မှစပြီး မိုးသည်းထန်စွာ ရွာသွန်းမှုကြောင့် ဖယ်ခုံမြို့ရှိ အင်းရေကန် မြင့်တက်လာရာမှ အင်းအနီးတဝိုက်ရှိ လယ်ဧကပေါင်း ထောင်နှင့်ချီ ရေလွှမ်းမိုးခြင်းခံခဲ့ရသည်။

အလားတူ မိုးဗြဲဆည်မှ ဘီးလူးချောင်းရေ အဆမတန် ဖွင့်ချမှုကြောင့် မိုးဗြဲဆည်အောက်ပိုင်းရှိ ရိတ်သိမ်းခါနီး စပါးခင်း ဧကပေါင်း (၅၀၀) ဝန်းကျင်နှင့် မွေးမြူရေးငါးကန် ဧကပေါင်း (၁၀၀) ဝန်းကျင်တို့အပါအဝင် ချောင်းဘေး၌ နေထိုင်ကြသည့် စစ်ဘေးရှောင် တဲအိမ်များနှင့် စိုက်ပျိုးထားသော စပါးများလည်း နှစ်မြှုပ်သွားခဲ့ကြောင်း မိုးဗြဲပြည်သူ့ကာကွယ်ရေးတပ် MBPDF မှ ထုတ်ပြန်ထားသည်။

သျှမ်း-ကရင်နီ နယ်စပ်ဒေသ ရေလွှမ်းခံရသည့် စစ်ရှောင်ယာယီတဲ

“ ဒီမှာတော့ နှစ်တိုင်းလိုလို ကြုံနေရတာပဲ။ ပျက်စီးမှုကလည်း နှစ်တိုင်းရှိတယ်။ သဘာဝကြောင့် တော့မဟုတ်ပါဘူး။ ဆည်တွေကြောင့် အင်းကန်ထဲ ရေလျှံတာ၊ ရေတွေမြင့်တက်လာလို့ အိမ်တွေမြှုပ်တာ။ ဆည်ရေဖွင့်ချတော့လည်း ဆည်အောက်ကလူတွေ ခံရတာပေါ့ “ ဟု ဖယ်ခုံမြို့တောင်သူ အမျိုးသားတစ်ဦးက ပြောသည်။

လက်ရှိမှာ ဒေသခံများနှင့် စစ်ရှောင်များသည် စိုက်ပျိုးထားသော စိုက်ခင်းများ၊ နေအိမ်များ ရေလွှမ်းခံရသောကြောင့် အရေးပေါ် အကူညီလိုအပ်နေသည်။

ဖယ်ခုံမြို့ဒေသခံ အသက် (၃၀) ကျော် အမျိုးသားတစ်ဦးက “ တချို့တွေလည်း ရိတ်သိမ်းခါနီးနေပြီ ရေထဲမြှုပ်ကုန်တာ။ ရက်ရှည်ရေထဲနစ်နေတော့ စပါးအညှောင့်ပေါက်ပြီး ပုတ်သိုးကုန်မှာ။ လယ်ယာလုပ်တုန်းက အားအင်တွေစိုက်ပြီး လုပ်ခဲ့ရတာ အခုမှရေထဲမှာ ပါသွားတော့ အရမ်းနှမျောတယ် “ ဟု ၎င်းကထပ်လောင်းပြောသည်။

ထို့အပြင် သျှမ်း-ကရင်နီ (ကယား) နယ်စပ်ဒေသ တလျှောက်တွင်လည်း စစ်ကောင်စီတပ်ဖွဲ့မှ စားနပ်ရိက္ခာနှင့် ဆေးဝါးသယ်ယူခွင့် ပိတ်ပင်ထားခြင်းကြောင့် စစ်ရှောင်များအခက်အခဲဖြစ်နေသည်။

ထို့အပြင် ပြီးခဲ့သည့် (အောက်တိုဘာလ ၁၅ ရက်) ညအချိန်တွင် မိုးဗြဲမြို့ပေါ် တပ်စွဲထားသော စစ်ကောင်စီတပ်ဖွဲ့မှ တိုက်ပွဲဖြစ်ပွားခြင်းမရှိဘဲ စည်ကား (၃) ရပ်ကွက်နှင့် ဒုန်းဒူထန်ရပ်ကွက်ရှိ နေအိမ် (၄) လုံးကို ထပ်မံမီးရှို့ခဲ့ ကြောင်း မိုးဗြဲပြည်သူ့ကာကွယ်ရေးတပ် MBPDF မှ ထုတ်ပြန်ထားသည်။

Leave a Comments

- Advertisement -spot_img

Latest article