သျှမ်းပြည် နမ္မတူမြို့နယ်အတွင်း ရေကြီးရေလျှံမှုဖြစ်ကြောင့် လယ်လာမြေ ဧက ၅၀၀ ကျော် ပျက်စီး ဆုံးရှုံးမှုရှိပြီး၊ ဒေသခံ သေဆုံးမှုများလည်းရှိကြောင်း သတင်းရရှိသည်။
အောက်တိုဘာ ၁၂ရက် နံနက် ၉ နာရီတွင် တောင်ကျရေချောင်းရေကြောင့် နမ္မတူမြို့နယ် အတွင်း ရေကြီးရေလျှံမှု ဖြစ်ပွားခဲ့ကြောင့် လယ်ဧက ၅၀၀ ကျော် ပျက်စီးမှုရှိကြောင်း အသက် ၅၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။
“ မနေ့က ပိန်းလုံ နှင့် ကွန်ကျောင်းရွာမှာ တော်တော်လေးအခြေအနေဆိုးတယ်။ ပိန်းလုံရွာက အိမ် ၃လုံး ရေထဲပါသွားတယ်။ ပြောင်းတွေလည်း ရေတွေလွှမ်းမိုးတာရှိတယ်။ သိရသလောက်တော့ မိုင်းရင်းကျေးရွာဘက်မှာ လယ်ဧက ၅၀၀ကျော် ပျက်စီးတယ်” ဟု အသက် ၅၀ကျော် အမျိုးသား က ဆိုသည်။
ထိုပြင် ယမန့် (အောက်တိုဘာ ၁၂)ရက်တွင် နမ္မတူမြို့နယ် နားကျိုင်းကျေးရွာတွင် နေထိုင်သည့် ဒေသခံ ၃ဦးသည် ခြံထဲသွားနေစဥ် မြေပြိုမှုကြောင့် ကျောက်တုံးဖိကာ အမျိုးသားတစ်ဦးသေဆုံးခဲ့ပြီး၊ အမျိုးသမီး တစ်ဦးနှင့် အမျိုးသားတစ်ဦး ထိခိုက်ဒဏ်ရာရရှိခဲ့ကာ လားရှိုးမြို့ ပြည်သူ့ဆေးရုံသို့ ပို့ဆောင်လိုက်ရကြောင်း ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ မိသားစု ၃ယောက် က ခြံထဲသွားချိန် မိုးကလည်း အရမ်းရွာတယ်လေ။ အဲ့မှာ မြေအိပြီး ကျောက်တုံးလိမ့်လာလို့ ဖိမိတာ။ အမျိုးသား တစ်ယောက်တော့ သေသွားတယ်။ ကျန် ၂ယောက်ကတော့ လားရှိုးဆေးရုံကိုပို့လိုက်တယ်” ဟု ၎င်းအမျိုးသမီးက ပြောသည်။
နမ္မတူမြို့နယ် အတွင်း မိုးဆက်တက်ရွာသွန်းမှုကြောင့် မန်ကန်ရွာ (ဝၢၼ်ႈပၢင်ႇ) ၊ ကုန်းမုံ(ၵုင်းမူင်ႈ) နှင့် အချို့ရွာများတွင် ချောင်းရေမြင့်တက်မှုကြောင့် အိမ်ခြေ ၂၄အိမ် ရေမြှုပ်သွားကြောင်း သိရသည်။
“ရေကတော့ ရင်ဘက်လောက်နက်တယ်။မိုးရွာတာလည်း ၃ ရက်ရှိပြီလေ တောင်ကျရေကြောင့်ပေါ့၊၊ဒီနေ့ထိတော့ ရေမကျသေးဘူး ရေကြီးနေတာတော့ ၂ရက် ရှိပြီ” ဟု မြို့ခံ တစ်ဦးကပြောသည်။
သျှမ်းပြည်အတွင်း သစ်တောဖြုန်းတီးမှု၊ သဘာဝ ပတ်ဝန်းကျင် ပျက်စီးမှုများ တနှစ်ထက် တနှစ် ပိုများလာပြီး၊ သဘာဝ သံယံဇာတ အလွန်အကျွံထုတ်မှုကြောင့် ရာသီဥတုဖောက်ပြန်မှုများ ပိုမိုဖြစ်လာကြောင်း သိရသည်။
Leave a Comments