သျှမ်းပြည် အထူးဒေသ (၁) လောက်ကိုင်မြို့ နာမည်ကြီး ဖူလီလိုက်ဟိုတယ်၏ တတိယ အထပ်တွင် မီးလောင်မှု ဖြစ်ပွားခဲ့ကြောင်း သတင်းရရှိသည်။
ယမန်နေ့ (အောက်တိုဘာလ ၁၂) ရက် ည (၆) နာရီဝန်းကျင်တွင် လောက်ကိုင်မြို့ရှိ ဖူလီလိုက် ဟိုတယ် (တတိယအထပ်) မီးလောင်ဖြစ်ပွားခဲ့ပြီး ထိခိုက်ပျက်စီးမှုလည်း ရှိနိုင်ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သုံးလွှာ (တတိယထပ်) မှာ မီးလောင်တာပါ။ ပြောတာကတော့ ဝါယာရှော့ခ်ဖြစ်တာတဲ့၊ မီးတောက် လည်း တော်တော်ကြီးတယ်၊ ထိခိုက်ပျက်စီးမှုရှိပေမဲ့ အတိအကျထုတ်ပြန် ထားတာတော့ မသိရသေး ဘူး။ တစ်နာရီ အကြာလောက်မှာတော့ မီးငြိမ်းနိုင်တယ်” ဟု လောက်ကိုင်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းမီးလောင်မှုကို မီးသတ်ကား (၅) စီးထက်မနည်း အသုံးပြု မီးငြိမ်းသတ်ခဲ့ရပြီး လမ်းလည်း ပိတ်ထားသည့် အတွက် ထိခိုက်ပျက်စီးမှုများကို အတိအကျ မသိနိုင် ကြောင်း အထက်ပါ အမျိုးသားက ဆက်ပြောသည်။
လောက်ကိုင်မြို့မှ ဖူလီလိုက်ဟော်တယ်သည် ကျားဖြန့် (အွန်လိုင်းလိမ်လည်မှု)လုပ်ငန်း ၊ လောင်းကစားဝိုင်း နှင့် တရားမဝင် စီးပွားရေးလုပ်ငန်းဖြင့်လည်း နာမည်ကြီးနေသည့် ဟိုတယ်ဖြစ်ကြောင်း ဒေသခံများက ပြောသည်။
Leave a Comments