သျှမ်းပြည် မူဆယ်ခရိုင်၊ ကွတ်ခိုင်မြို့နယ်အတွင်းတွင် အာဏာသိမ်း စစ်ကောင်စီ စစ်ကြောင်း မိုင်းဆွဲ တိုက်ခိုက်ခံရပြီး ၅ ဦးထက်မနည်း သေဆုံးကာ ကားတစ်စီးလည်း ပျက်စီးကြောင်း စုံစမ်းသိရသည်။
ယမန်နေ့ အောက်တိုဘာလ ၁၁ ရက်နေ့ ညနေ ၄ နာရီဝန်းကျင်တွင် လားရှိုးမြို့မှ တက်လာသည့် စစ်ကောင်စီ စစ်ကြောင်းသည် ကွတ်ခိုင်မြို့နယ်၊ ၃၈ မိုင် မန်ပြိန်းကျေးရွာအနီး၌ မိုင်းဆွဲတိုက်ခိုက် ခံရခြင်း ဖြစ်ကြောင်း အမည်မဖော်လိုသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဆွဲမိုင်းလို့ ပြောကြတယ်။ ရွာနဲ့ သိပ်မဝေးတော့ အသံတွေလည်း တော်တော်ကျယ်တယ်။ အဲ့ဒီ စစ်ကြောင်းက စစ်ကားစုစုပေါင်း (၁၀) စီးကျော်တယ်။ ငါးယောက်က နေရာမှာပဲ ပွဲချင်းပြီး သေသွားပြီး၊ ကားတစ်စီးလည်း ပျက်စီးသွားတယ်” ဟု ဖြစ်စဥ်ကို သိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ထို ပေါက်ကွဲသံများ ကြားရပြီးနောက်တွင် အရေးပေါ်ကားများလည်း ရောက်ရှိလာပြီး ထိခိုက် ဒဏ်ရာရ သူများကို လားရှိုးဘက်သို့ သယ်ဆောင်သွားကြောင်းလည်း သိရသည်။
မိုင်းဆွဲတိုက်ခိုက်ခံရမှုကြောင့် ပျက်စီးသွားသည့် စစ်ကောင်စီ စစ်ကားတစ်စီးသည် ယနေ့ (အောက်တိုဘာလ ၁၂) ရက် နံနက်ပိုင်းအထိ လမ်းဘေးတွင် ရပ်ထားသည်ကို တွေ့ရကြောင်း အထက်ပါ အမျိုးသား က သျှမ်းသံတော်ဆင့်ကို ဆက်ပြောသည်။
“မနက်က လမ်းသွားလမ်းလာတွေ လာပြောပြတာ၊ ပျက်သွားတဲ့ကားက လမ်းဘေးမှာ ရှိနေတုန်းတဲ့၊ အခုတော့ ရှိသေးလား မသိဘူး။ စက်နှိုးမရတော့လို့ ယူမသွားတာ ထင်တယ်။ မနေ့က ဖြတ်သွားဖြတ် လာရင်း တွေ့တဲ့သူတွေ ပြောပြတာ အလောင်းက ၅ ယောက်တဲ့၊ ထိခိုက်ဒဏ်ရာရတဲ့ သူတွေတော့ မသိရဘူး” ဟု အထက်ပါ ပုဂ္ဂိုလ်က ဆက်ပြောသည်။
အဆိုပါ စစ်ကောင်စီ မိုင်းဆွဲတိုက်ခိုက်ခံရခြင်းနှင့် ပတ်သက်ပြီး ဒေသခံများမှ ကချင်လွတ်လပ်ရေး တပ်မတော် (KIA) ဖြစ်သည်ဟု ပြောဆိုကြသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက် မရရှိသေးပေ။
မိုင်းဆွဲတိုက်ခိုက်မှုကြောင့် စစ်ကောင်စီဘက်မှ စစ်ကားထိခိုက်ပျက်စီးခြင်း၊ တပ်သားသေဆုံးခြင်း များ ရှိသော်လည်း အရပ်သား နှင့် ဒေသအတွင်း ထိခိုက်မှု မရှိကြောင်းလည်း သိရသည်။
ကွတ်ခိုင်မြို့နယ်အတွင်း လှုပ်ရှားသည့် လက်နက်ကိုင် တပ်ဖွဲ့များအနေဖြင့် စစ်ကောင်စီ တပ်ဖွဲ့၊ ပြည်သူ့ စစ်တပ်ဖွဲ့ နှင့် တိုင်းရင်းသားလက်နက်ကိုင် တပ်ဖွဲ့များဖြစ်ကြသည့် SSPP တပ်ဖွဲ့၊ TNLA တပ်ဖွဲ့ ၊ KIA တပ်ဖွဲ့ နှင့် MNDAA တပ်တို့လည်း သွားလာ လှုပ်ရှားမှု ရှိကြသည်။
