သျှမ်းပြည် မိုင်းဆတ်မြို့အတွင်း နေထိုင်သည့် လင်မယားနှစ်ဦးသည် စကားများ ရန်ဖြစ်ရာမှ ခင်ပွန်းဖြစ်သူက ၎င်း၏ဇနီးကို ဓားဖြင့်သတ်လိုက်ပြီး အလောင်းကိုရေချောင်းထဲပစ်ချခဲ့ကြောင်း စုံစမ်းသိရသည်။
ယမန်နေ့ (အောက်တိုဘာလ ၁၁ ရက်) နံနက်ပိုင်းတွင် မိုင်းဆတ်မြို့ ဟိုနားကျေးရွာအတွင်း နေထိုင်ကြသည့် လင်မယားနှစ်ဦးသည် ရန်ဖြစ်စကားများရာမှ ခင်းပွန်းဖြစ်သူက ၎င်း၏ဇနီးကို သတ်ဖြင့် အလောင်းကိုရေချောင်းထဲပစ်ချခဲ့ကြောင်း မိုင်းဆတ်မြို့ ဒေသခံအမျိုးသားတစ်ဦးက ပြောသည်။
“ သူတို့လင်မယားအချင်းချင်း ရန်ဖြစ်စကားများတာ ခဏခဏကြားနေရတယ်။ အဲ့ကြောင့် သူ့မိန်းမကလည်း အိမ်ကနေ ခဏခဏထွက်ပြေးလေ့ရှိတယ်။ ဒီတစ်ခေါက် သူ့မိန်းမပြန်လာတဲ့အချိန် ရန်ထပ်ဖြစ်ကြတာ။ သူ့သမီးလည်း တခြားရွာမှာ အိမ်ထောင်ကျနေတာလေ။ အဲ့နဲ့ ရွာကလူတွေက သူ့တို့သမီးဖုန်းဆက်ပြီး လာကြည့် ခိုင်းတာ။ ရောက်လာတဲ့အချိန်မှာ သူ့အဖေကတော့ သူ့အမေကိုသတ်ပြီး ရေချောင်းထဲ သွားပစ်နေပြီ “ ဟု ၎င်းဒေသခံတစ်ဦးက ပြောသည်။
အဆိုပါ လူသတ်မှုကျူးလွန်ခဲ့သည့် အမျိုးသားတစ်ဦးသည် မူးယစ်ဆေးဝါး အလွန်အကျွံသုံးစွဲပြီး သတိလက်လွတ်ရာမှ ၎င်း၏ဇနီးကို ဓားဖြင့်ခုတ်သတ်ခြင်း ဖြစ်နိုင်ကြောင်း ဒေသခံများက ပြောဆိုသည်။
လက်ရှိမှာ လူသတ်မှုကျူးလွန်သူ အမျိုးသားတစ်ဦးကို သက်ဆိုင်ရာ ရဲတပ်ဖွဲ့မှ ဖမ်းဆီးသွားခဲ့ပြီး ဖြစ်ကြောင်း၊ ယခုလို လူသတ်မှုဖြစ်စဉ်သည် အဆိုးရွားဆုံးဖြစ်စဉ်တခုဖြစ်ကြောင်းလည်း ဒေသခံတစ်ဦးက ဆက်ပြောသည်။
“ ရွာသူကြီးနဲ့ ရဲတပ်ဖွဲ့က တရားခံကိုဖမ်းသွားပြီ။ အလောင်းကိုလည်း သွားသယ်တယ်။ ရွာကလူတွေ သွာမကြည့်ဖို့၊ ဓာတ်ပုံမရိုက်ကြဖို့ တားထားတယ်။ ရွာမှာဒီလိုဖြစ်စဉ်က တခါမှမကြုံဖူးဘူး “ ဟု ၎င်းကဒေသခံတစ်ဦးက ထပ်လောင်းပြောသည်။
လူသတ်မှုကျူးလွန်သူသည် ဦးသူရိန် ဟု နာမည်ရပြီး သေဆုံးသွားသည့် ၎င်း၏ဇနီးမှာ အသက် ၆၀ နှစ်အရွယ်ရှိ ဒေါ်နန်းကြာ ဖြစ်ကြောင်း သိရသည်။
ဟိုနားကျေးရွာသည် မိုင်းဆတ်မြို့၏ မြောက်ဘက်အရပ်တွင် တည်ရှိပြီး ၁၀ မိုင်ခန့် ကွားဝေးသည်။
အလားတူ ဇွန်လ ၆ ရက်တွင်လည်း ကျိုင်းတုံမြို့နယ် မိုင်းခွန်ကျေးရွာအုပ်စုရှိ ပန်လီရွာအတွင်း နေထိုင်သည့် သားအမိ ၂ ဦးသည် အချင်းချင်းစကားရာမှ သားအရင်းဖြစ်သူမှ မိခင်ဖြစ်သူကို ရိုက်သတ်ခဲ့ဖူးသည်။
