မြန်မာ-တရုတ်နယ်စပ်ဒေသ မူဆယ်မြို့နယ် ခူးဝိန်းနယ်မြေ နှင့် ဝိန်းနန်းကျေးရွာသို့ ဆက်သွယ်သွားသည့် နမ့်ပေါ့တံတားပေါ်တွင် မပေါက်ကွဲသေးသည့် မိုင်းများတွေ့ရှိကြောင်း သတင်းရရှိသည်။
ယမန်နေ့ (အောက်တိုဘာလ ၁၀ ရက်) နံနက်ပိုင်းတွင် မူဆယ်မြို့နယ် ခူးဝိန်းကျေးရွာနှင့် ဝိန်းနန်းကျေးရွာ အကြား ဆက်သွယ်ထားသော နမ့်ပေါ့တံတားပေါ်တွင် မပေါက်ကွဲသေးသည့် (ထောင်မိုင်း) များ စုစုပေါင်း ၆ လုံး တွေ့ရှိခဲ့ကြောင်း ဖြတ်သန်းသွားလာနေသည့် ဒေသခံတစ်ဦးက သျှမ်းသံတော်ဆင့်ကို ပြောသည်။
“မနေ့က ကျနော် အဲ့နမ့်ပေါ့ တံတားပေါ် ဖြတ်သွားတာ။ တံတားရဲ့ တံတိုင်တွေမှာ ထောင်မိုင်း ၃ လုံးစတွေ့တယ်။ နောက် တံတားကို ကျော်သွားတော့ လမ်းမှာ (ထောင်မိုင်း) ၃ လုံးထပ်တွေ့တယ် “ ဟု ဒေသခံတစ်ဦးက ပြောသည်။
အဆိုပါ မိုင်းများတွေ့ရှိထားသောကြောင့် ပြည်သူများအနေဖြင့် တံတားပေါ်သို့ ဖြတ်သန်းသွားလာခြင်း မပြုရန် ၎င်းက ထပ်လောင်းပြောသည်။
“အဲ့ တံတားပတ်ဝန်းကျင်မှာ အသိပေးဆိုင်းဘုတ် တပ်ထားတာလည်း မတွေ့ဘူး။ မိုင်းတွေက မြေမြုပ်မိုင်းတွေတော့ မဟုတ်ဘူး၊ ထောင်မိုင်းတွေ ဖြစ်တာ။ မသိတဲ့သူဆို သွားကိုင်မိမှာပဲ ဆိုးတယ်။ ကလေးတွေဆိုလည်း သွားကောက်ပြီး ဆော့ကစာမှာပဲ စိုးရိမ်တယ် “ ဟု ဒေသခံအမျိုးသားတစ်ဦးကဆိုပြန်သည်။
အလားတူ အောက်တိုဘာလ ၁၀ ရက်တွင်လည်း မူဆယ်မြို့နယ် ဖာဖိန့်ကျေးရွာလမ်းပေါ်သို့ ဆိုင်ကယ်ဖြင့် ဖြတ်မောင်းလာသည့် ဒေသခံ ၃ ဦးသည် မိုင်းထိမိပြီး၊ ၁ ဦး ခြေထောက် ပြတ်ထွက်သွားကြောင်း ရွှေဖီမြေသတင်းဌာနမှ ရေးသားဖော်ပြထားသည်။
ထို့အပြင် မြေမြုပ်မိုင်းများသည် ပြီးခဲ့သည့် ဇူလိုင်လ နောက်ဆုံးပတ်မှစ၍ ဖြစ်ပွားခဲ့သည့် စစ်ကောင်စီနှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့အကြား တိုက်ပွဲကြောင့် မြုပ်ထားသည့် မိုင်းများဖြစ်နိုင်ကြောင်း စစ်ရေးသတင်းရင်းမြစ်တစ်ဦးက ပြောသည်။
