မြန်မာစစ်တပ်၏ ပြည်သူများအပေါ် လူမဆန် သတ်ဖြတ်မှုများကို ရပ်တန့်ရန် အတွက် မြန်မာစစ်တပ် ကို လက်နက်ပိတ်ပင်ပြီး တိုက်လေယာဥ်ဆီများတင်ပို့မှုရပ်ဆိုင်ရန် ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်း က တိုက်တွန်းတောင်းဆိုလိုက်သည်။

အဆိုပါ တောင်းဆိုမှုသည် (၇၈)ကြိမ်မြောက် ကုလသမဂ္ဂ အထွေထွေညီလာခံ၌ လက်နက် ဖျက်သိမ်းရေးနှင့် နိုင်ငံတကာ လုံခြုံရေးကော်မတီ၏ မိန့်ခွန်းပြောကြားမှုအစီအစဉ်တွင် တိုက်တွန်းခဲ့သည်။

မြန်မာစစ်တပ်သည် တရားမဝင် စစ်အာဏာသိမ်းမှုနောက်ပိုင်း ဒေါ်လာတစ်ဘီလီယံကျော်တန် လက်နက်နှင့်ဆက်စပ်ပစ္စည်းများကို ဝယ်ယူတင်သွင်းခဲ့ပြီး အမျိုးသမီးများနှင့် ကလေးငယ်များအပါအဝင် ပြည်သူ ၄၀၀၀ ကျော်ကို သတ်ဖြတ်ကာ လူပေါင်း (၂)သန်းဝန်းကျင်မှာ နေရပ်စွန့်ခွာခဲ့ရသည်။

ထို့အပြင် နေအိမ်စုစုပေါင်း ၇၅,၀၀၀ ကျော်မှာ မီးရှို့ဖျက်ဆီးခံခဲ့ရတာကြောင့် မြန်မာပြည်သူများသည် အဆိုပါလက်နက်များ၏ သားကောင်များ ဖြစ်နေသည်ဟု အောက်တိုဘာ ၉ရက်စွဲ သတင်းထုတ်ပြန်ချက်တွင် ပါရှိသည်။

မြန်မာနိုင်ငံတွင် လေကြောင်းတိုက်ခိုက်မှုများမှာ Armed Conflict Location and Event Data Project (ACLED) ၏ အချက်အလက်များအရ ၂ဝ၂၃ ခုနှစ် ဇန်နဝါရီလမှ ဇွန်လအထိ တစ်လလျှင် ပျမ်းမျှအားဖြင့် တိုက်ခိုက်မှု အကြိမ်ရေ (၃ဝ) ခန့် ရှိပြီး စစ်ကောင်စီတပ်သည် စာသင်ကျောင်းများနှင့် ကျန်းမာရေးစောင့်ရှောက်မှုနေရာများ အပါအဝင် ပြည်သူများနေထိုင်ရာ နေရာဒေသများကိုပါ တိုက်ခိုက်မှုများ ပြုလုပ်နေသည်ဟု ဦးကျော်မိုးထွန်းက မိန့်ခွန်းထဲတွင် ပြောသည်။

ဆက်လက်ပြီး စစ်ကောင်စီတပ်သည် ကချင်ပြည်နယ်ရှိ KIO/KIA ဌာနချုပ်တည်ရှိရာ လိုင်ဇာမြို့အနီးက စစ်ရှောင်စခန်းကို လက်နက်ကြီးများဖြင့် ပစ်ခတ်ခဲ့ပြီး ကလေးသူငယ်များ အပါအဝင် ပြည်သူ ၃၀ ကျော် သေဆုံးပြီး ၆၀ ဦးခန့် ထိခိုက်ဒဏ်ရာရကာ အဆောက်အဦများလည်း ပျက်ဆီးဆုံးရှုံးခဲ့ကြောင်း ဦးကျော်မိုးထွန်း က ပြောသည်။

စစ်ကောင်စီတပ်သည် စစ်လက်နက်ပစ္စည်းများ လွှဲပြောင်းပေးပို့ပေးနေသည့် နိုင်ငံများ၏ အကူအညီဖြင့် မြန်မာပြည်သူများအပေါ် သတ်ဖြတ်မှုများကို ကျူးလွန်နေပြီး ၎င်းလုပ်ရပ်များကို ရပ်တန့်နိုင်ရန်အတွက် စစ်ကောင်စီတပ်ကို အပြည့်အဝ လက်နက်ပိတ်ပင်ခြင်းနှင့် တိုက်လေယာဉ်ဆီများ တင်ပို့မှုရပ်ဆိုင်းခြင်း ဆောင်ရွက်ပေးရန် ကုလသမဂ္ဂနှင့် လုံခြုံရေးကောင်စီကို တိုက်တွန်းကြောင်း သံအမတ်ကြီး ဦးကျော်မိုးထွန်းက တောင်းဆိုလိုက်ခြင်းဖြစ်သည်။