သျှမ်းပြည် ညောင်ရွှေမြို့နယ် အင်းလေးဒေသရှိ စစ်ဆေးရေးဂိတ်အချို့တွင် ဗျူစောထီးတပ်ဖွဲ့ဝင်များ စောင့်ဆိုင်းပြီး ဆက်ကြေး ကောက်ခံမှုပြုလုပ်နေသဖြင့် ပြည်သူများ အခက်အခဲကြုံတွေ့နေရကြောင်း စုံစမ်းသိရသည်။
ယခုရက်ပိုင်းအတွင်း အင်းလေးဒေသ ကျေးပေါခုံကျေးရွာအုပ်စုရှိ ရှေးဟောင်းသမိုင်းဝင် ရွှေအင်းတိန်းဘုရားမှ စစ်ဆေးရေးဂိတ်တွင် ဗျုစောထီးတပ်ဖွဲ့ဝင်များ စောင့်ဆိုင်းပြီး ကားတစ်စီးလျှင် ကျပ်ငွေ ၅ ထောင်မှ ၁ သောင်းခွဲ အထိ ဆက်ကြေးကောက်ခံနေကြောင်း အင်းလေးဒေသခံ တစ်ဦးက ပြောသည်။
အလားတူ ဝက်များတင်ဆောင်လာသည့် ကားများကို တစ်စီးလျှင် ၃ သောင်းကျပ်၊ နွားများတင်ဆောင် လာပါက တစ်စီးကို ၈ သောင်းကျပ်အထိ ကောက်ခံနေကြောင်း ၎င်းကဆက်ပြောသည်။
“ အရင် PNO တို့၊ စစ်တပ်တို့က ခြိမ်းခြောက်ငွေတောင်းတာ ရှိခဲတယ်ဆိုပေမယ့် ဖြတ်သွားတဲ့ ယာဉ်အစီးတိုင်းကို မကောက်ဘူး။ အခုဗျုတွေလက်ထဲ အပ်လိုက်တော့ ဖြတ်သန်းသွားသမျှ ယာဉ်တွေ အကုန်လိုက်ကောက်နေတာ “ ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ရေးဂိတ်၌ ဗျူစောထီးတပ်ဖွဲ့ဝင်များ စောင့်ပြီး ဆက်ကြေးကောက်ခံမှုကြောင့် ဒေသခံများသည် ဂိတ်ကိုဖြတ်သန်းသွားလာပါက လုံခြုံရေးမရှိသလို ခံစားနေရကြောင်း ဆိုသည်။
ထို့အပြင် အင်းလေးဒေသရှိ ဗျုးစောထီးတပ်ဖွဲ့ဝင်များသည် စစ်ကောင်စီ၏ လက်အောက်ခံ ပြည်သူ့စစ်အဖြစ် သတင်းပေးပို့ခြင်း၊ အမြင်ကပ် ပုဒ်မဖြင့် ပြည်သူများကိုစွပ်စွဲဖမ်းဆီးခြင်းများ ပြုလုပ်နေလျက်ရှိသည်။
“ မတရား အမှုဆင်စွပ်စွဲပြီး အကြောင်းမျိုးမျိုးပြ ဖမ်းနေတော့တာပဲ။ ဖမ်းလိုက်၊ ငွေညှစ်လိုက် ပြီးရင်ပြန်လွတ်လာလိုက် လုပ်နေတာပါ “ ဟု အင်းလေးအမျိုးသမီးသမဂ္ဂ (IWU)မှ အမည်မဖော်လိုသူ တာဝန်ခံတစ်ဦးက ပြောသည်။
စစ်တပ်အာဏာသိမ်းပြီးနောက်ပိုင်း အင်းလေးဒေသရှိ ပြည်သူများ၏ လုံခြုံရေးသည် ၈၉ ရာခိုင်နှုန်း မရှိကြောင်း အင်းလေးဒေသ အဖွဲ့အစည်းဖြစ်သည့် JMC-Innlay မှ ပြုလုပ်သည့် သုတသနသတင်းအချက်အလက်အရ သိရသည်။
Leave a Comments