သျှမ်းပြည် မူဆယ်ခရိုင်၊ မူဆယ်မြို့လယ်ခေါင် နာရီစင်အနားတွင် တရုတ်ငွေ လဲလှယ်သည့် အမျိုးသမီး တစ်ဦး ဓားပြတိုက်ခံရပြီး သေနတ်ဖြင့် ပစ်ခတ်ခံရကြောင်း စုံစမ်းသိရသည်။

ပြီးခဲ့သည့် အောက်တိုဘာလ ၇ ရက် ည ၇ နာရီခွဲ ဝန်းကျင်တွင် မူဆယ်မြို့လယ်ခေါင် နာရီစင်အနား၌ မြန်မာ – တရုတ် ငွေ လှဲလည်သည့် အမျိုးသမီးတစ်ဦးနားသို့ အသက် ၃၀ ဝန်းကျင် အမျိုးသားနှစ်ဦးမှ ငွေလဲလှယ်မည့်ဟု ဟန်ဆောင်ပြီး ရောက်လာကာာ ငွေလဲလှယ်သည့် အမျိုးသမီး သေနတ်ဖြင့် ပစ်ခတ်ပြီး ငွေများကို ဓားပြတိုက်ယူသွားကြောင်း အမျိုးသား တစ်ဦးက သျှမ်းသံတော်ဆင့်ကို ပြောသည်။

“သူ့ဆီကို တရုတ်ငွေ လာလဲမယ်ထင်လို့ သူကလည်း သတိမထားမိဘူးတဲ့။ အဲ့ဒီအမျိုးသားက ငွေအိတ်ကို ဆွဲပြီး တစ်ယောက်က သေနတ်နဲ့ ပစ်တာ သူ့ခြေထောက် နှစ်ဖက်လုံးကို ထိသွားတယ်။ ခြေထောက်က တော်တော်ကို ဒဏ်ရာပြင်းတယ်” ဟု ဖြစ်စဥ်ကို သိရှိသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ဓားပြတိုက်မှုကြောင့် အမျိုးသမီး၏ ခြေထောက် ပြင်းထန်စွာ ဒဏ်ရာရရှိသည့် အပြင် မြန်မာငွေ ကျပ်သိန်း (၁၀၀) ကျော် နှင့် တရုတ်ယွမ်ငွေ ၁၀၀၀နီးပါး (မြန်မာငွေကာာလပေါက်စျေးကျပ် ၄သိန်းကျော်) လည်း ဆုံးရှုံးသွားရကြောင်း သိရသည်။

လက်ရှိတွင် ဒဏ်ရာရသူ အမျိုးသမီးသည် ဆေးကုသမှု ခံယူနေလျက်ရှိပြီး မူဆယ်မြို့ နာရီစင်နား တစ်ဝိုက်သည် မြန်မာ – တရုတ် ငွေလှဲလှယ်သူများ မကြာခဏ ဓားပြတိုက်၊ လုယက်ခံရ ကြောင်းလည်း အထက်ပါ အမျိုးသား က သျှမ်းသံတော်ဆင့်ကို ပြောသည်။

“ဓါးပြတိုက်တဲ့သူတွေက ကားနဲ့လာကြတာများတယ်၊ ပြီးတော့ တစ်ယောက်တည်း မဟုတ်ဘူး။ သေချာ စီစဥ် ပြီးမှ လာကြတဲ့ပုံပေါက်တယ်။ ငွေအိတ်ရတာနဲ့ တစ်ယောက်ကပြေး၊ တစ်ယောက်ကပစ် အဲ့လိုနဲ့ ကားပေါ် ရောက်တာနဲ့ အမြန်မောင်းထွက်တာ” ဟု အထက်ပါ အမျိုးသားက ဆက်ပြောသည်။

မူဆယ်မြိုခံများ အနေဖြင့် သက်ဆိုင်ရာ ဒေသအာဏာပိုင်များမှ ပြည်သူ့လုံခြုံရေးအတွက် အရေးယူ ဆောင်ရွက်မှု များ ကို ပြုလုပ်စေလိုကြောင်းလည်း အသက် (၃၀) ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အစိုးရဆီက အကာအကွယ်ဆိုပြီး ဘာမှ လုံခြုံမှုမရှိဘူး၊ ကိုယ့်အားကိုယ်ကိုးပြီး နေ့တိုင်းကို ဖြတ်သန်းရတာ။ အပြင်ကတော့ မထွက်လို့တော့ မရဘူးလေ။ ဝမ်းရေးက ရှိနေသေးတော့ သတိနဲ့ အပြင်ထွက်ပြီး ရုန်းကန်ရ တယ်။ သက်ဆိုင်ရာအာဏာပိုင်တွေကနေ ပြည်သူ့ လုံခြုံရေးအတွက် လုပ်ပေးရင် ပိုကောင်းတာပေါ့” ဟု မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ အာဏာသိမ်းပြီးနောက်ပိုင်း မူဆယ်မြို့တွင် ခိုးဆိုးလုယက်မှုများ မကြာခဏဖြစ်ပွားနေ သော်လည်း သက်ဆိုင်ရာမှ ဖမ်းဆီးအရေးယူနိုင်ခြင်းမရှိကြောင်း ဒေသခံများက ပြောသည်။

ထို့အပြင် မူဆယ်မြို့နယ်တွင် စစ်ကောင်းစီတပ်၊ ပြည်သူ့စစ်များ၊ ကချင်တပ်(KIA)၊ တအာင်း(ပလောင် )တပ်(TNLA)၊ သျှမ်းပြည်တိုးတက်‌ရေးပါတီ (SSPP) တပ်တို့ လှုပ်ရှားသွားလာနေသည့် ဒေသဖြစ် ကြောင်း သိရသည်။