ထိုင်းနိုင်ငံ Siam Paragon Shopping Mall တွင် အောက်တိုဘာ ၃ရက်၌ သေနတ်ပစ်ခတ်ခံရပြီး သေဆုံးသွားခဲ့သည့် မြန်မာရွှေ့ပြောင်း အလုပ်သမား မမိုးမြင့်၏ စျာပနာကို ယနေ့ (အောက်တိုဘာ ၈)ရက် မွန်းလွဲ ၁နာရီတွင် နထွန်ဘူရီ ပြည်နယ် ပတ်(ခ်) ကရက်မြို့ရှိ ဘုန်းကြီးကျောင်းတွင် ပြုလုပ်ခဲ့ကြောင်း သတင်းရရှိသည်။

အဆိုပါ စျာပနာ အခမ်းအနားကို မမိုးမြင့် ၏ မိခင်နှင့် ဆွေမျိုးများလည်းတက်ရောက်ခဲ့ကြောင်းသိရသည်။

ထိုင်းနိုင်ငံ ဘန်ကောက်မြို့ရှိ Siam Paragon ကုန်တိုက်တွင် အောက်တိုဘာ ၃ရက် ညနေပိုင်းတွင် အသက် ၁၄နှစ်အရွယ် ကောင်လေးက ပစ်ခတ်ခဲ့ရာ အဆိုပါ ကုန်တိုက်တွင် အလုပ်လုပ်နေသည့် မမိုးမြင့်အပါအဝင် သေဆုံးသူ ၂ဦး ၊ ဒဏ်ရာရရှိခဲ့သူ ၅ဦးခန့်ရှိကြောင်း ထိုင်းသတင်းဌာနဖော်ပြချက်အရသိရသည်။

မမိုးမြင့်သည် အလွန်တော်သည့် ဝန်ထမ်းတစ်ဦးဖြစ်ကြောင်း၊ ထိုင်း-အင်္ဂလိပ်- တရုတ်-မြန်မာဘာသာစကားများ ပြောနိုင်ရေးသားနိုင်သူဖြစ်ပြီး၊ လစာလည်းကောင်းကြောင်း၊ မိဘကိုလည်း ထောက်ပံ့နေသူဖြစ်ကြောင်း သူမ၏ အလုပ်ရှင်က ထိုင်းမီဒီယာများတွင် ဖြေကြားခဲ့သည်။

ပစ်ခတ်မှုအတွင်း သေဆုံးသွားခဲ့သူများ၏ မိသားစုဝင်များအား Siam Paragon ကုန်တိုက်မှ ဘတ် ၅ သန်းစီနှင့် ဒဏ်ရာရရှိသူများအား ဘတ် ၃ သိန်းစီ ပေးအပ်သွားမည်ဖြစ်ကြောင်း သိရသည်။