သျှမ်းပြည် လားရှိုးခရိုင်၊ မိုင်းရယ်မြို့နယ်အတွင်း အမှတ် (၃) ကြိုးပြင် ကာကွယ်တောပြုလုပ်မည့် ကိစ္စနှင့် ပတ်သက်ပြီး ဒေသခံများက ဝိုင်းဝန်းကန့်ကွက်ခဲ့ကြောင်း စုံစမ်းသိရသည်။
ယနေ့ (စက်တင်ဘာလ ၁၀) ရက် နံနက်ပိုင်း ၁၀ နာရီဝန်းကျင်တွင် တန့်ယန်းမြို့မှ သစ်တောအရာရှိ နှစ်ဦး၊ လားရှိုးမြို့မှ တစ်ဦး နှင့် မိုင်းရယ်မြို့မှ အထွေထွေအုပ်ချုပ်ရေးမှူးရုံးမှ အရာရှိတစ်ဦး နှင့် သစ်တောဦးစီး ဌာနမှ အရာရှိ နှစ်ဦး စုစုပေါင်း (၇) တို့သည် မိုင်းရယ်မြို့နယ်မှ မြေဧကပေါင်း ၁၄၅၀၀ ဧကကို ကြိုးပြင် ကာကွယ်တော ပြုလုပ်မည်ဟု လာရောက်ပြောဆိုခဲ့ကြောင်း ဒေသခံများထံမှ သိရသည်။
အဆိုပါ သစ်တောအရာရှိများနှင့် ထွေအုပ်ရုံးမှ အရာရှိများသည် မိုင်းရယ်မြို့နယ်၊ မန်ပုံကျေးရွာရှိ ဘုန်းကြီး ကျောင်းတွင် ကျေးရွာ လူကြီး ၊ ဒေသခံများ (၁၀၀၀) ကျော်နှင့် လာရောက်တွေ့ဆုံ ပြောဆိုခြင်းဖြစ်ကြောင်း တွေ့ဆုံမှုတွင် တက်ရောက်ခဲ့သည့် ရွာခံတစ်ဦးက သျှမ်းသံတော်ဆင့်ကို ပြောသည်။
“သူတို့ လုပ်မယ့် ကြိုးပြင်ကာကွယ်တော ဖြစ်သွားမယ်ဆိုရင် ကျနော်တို့ ရွာခံတွေက ရွာရွှေ့ပြောင်းရမယ်၊ ဝမ်းစာ အတွက် စိုက်ပျိုးရေးမြေနေရာတွေလည်း စွန့်ပစ်ပြီး အသစ်ပြန်လည်လုပ်ရမယ်၊ ဒါတွေနဲ့တင် ပြည်သူရဲ့ နေထိုင်စားသောက်ရေးတွေကို ထိခိုက်နေပြီ၊ ရွာသစ်ပြန်တည်ဖို့ ၊ နေရာပြန်ရှာဖို့ ဒါတွေကလည်း အစိုးရဘက်က တာဝန်ယူပေးမှာမဟုတ်ဘူး၊ကျနော်တို့ဘာသာ လုပ်ရမယ်ဆိုလို့ အားလုံးက ဝိုင်းဝန်းကန့်ကွက်ကြတာ” ဟု အမည်မဖော်လိုသူ ဒေသခံက သျှမ်းသံတော်ဆင့်ကိုပြောသည်။
ယနေ့ တွေ့ဆုံမှုတွင် မိုင်းရယ်မြို့နယ်မှ နားခိုကျေးရွာအုပ်စု၊ ခိုဆိုင်းကျေးရွာအုပ်စု၊ မန်ပုံကျေးရွာအုပ်စု တို့မှ ရွာလူကြီးများ ၊ ဒေသခံများ (၁၄၉၉) ယောက် တက်ရောက်ပြီး အားလုံးက သစ်တောအရာရှိ နှင့် ထွေအုပ်အရာရှိ တို့၏ ပြောဆိုမှုကို ဝိုင်းဝန်းကန့်ကွက်ခြင်းဖြစ်ကြောင်း သိရသည်။
မိုင်းရယ်မြို့နယ်အတွင်း ကြိုးပြင်ကာကွယ် သစ်ဝိုင်း ပြုလုပ်ပါက ကျေးရွာ အုပ်စု (၃) အုပ်စုမှ ကျေးရွာများ ဖြစ်ကြ သည့် နားငူးကျေးရွာ(ဝၢၼ်ႈၼႃးငူး) ၊ နားလောင်ကျေးရွာ(ဝၢၼ်ႈၼႃးလွင်ႈ) ၊ မက်လန်းကျေးရွာ (ဝၢၼ်ႈမၢၵ်ႇလၢင်း)၊ ဝၢၼ်ႈႁူၺ်ႈသိမ်ႇ စသည့်ကျေးရွာများအပြင် လယ်၊ ယာစိုက်ခင်း များလည်း ထိခိုက်နိုင်ကြောင်းလည်း ဒေသခံ များက ဆက်ပြောသည်။
“ထိခိုက်မယ့် နေရာတွေကတော့ ပြောရမယ်ဆိုရင် အုပ်စု (၃) အုပ်စုက ကျေးရွာ (၇) ရွာလောက်ရှိတယ်၊ ကျနော် တို့ကတော့ ကိုယ့်မြေ၊ ကိုယ်ရွာ၊ ကိုယ့်သစ်တောနယ်မြေကို ကိုယ့်ဘာသာ ထိန်းသိမ်းချင်တယ်၊ နှစ်စဥ်နှစ်တိုင်းက လည်း သစ်တောထိန်းသိမ်းမှုကို ကျနော်တို့ ကိုယ်ထူကိုယ်ထ လုပ်နေကြပဲ၊ အဲ့ကြောင့် သူတို့က လက်နက်နဲ့ပဲလာ လာ၊ အာဏာနဲ့ပဲလာလာ ကျနော်တို့ကတော့ ကိုယ့်မြေ၊ ကိုယ့်ဒေသကို ကာကွယ်ကြမယ်” ဟု အထက်ပါ အမျိုးသား က ဆက်ပြောသည်။
ဒေသခံများ၏ ဝိုင်းဝန့်ကန့်ကွက်မှုကြောင့် သစ်ဝောာအရာရှိ နှင့် ထွေအုပ်ဝန်ထမ်းတို့ကလည်း နောက်ကြောင်း လှည့် ပြန်သွားရပြီး ၊ အထက်ကို ပြန်တင်ပြမယ်ဟု ပြောဆိုသွားခဲ့ကြောင်းလည်း ဒေသခံများက ဆက်ပြော သည်။
လက်ရှိ သစ်တောဦးစီးဌာနမှ တာဝန်ရှိသူများ ပြန်သွားသော်လည်း နောက်တစ်ကြိမ် ပြန်လာနိုင်သည့် အတွက် အခြေအနေများကို စောင့်ကြည့်နေရသေးကြောင်းလည်း သိရသည်။
