သျှမ်းပြည် ဆီဆိုင်မြို့နယ် ပုံးအင်းဒေသ နောင်စန့်ရွာရှိ ဘုန်းကြီးကျောင်းတွင် တစ်ရက်ထဲ ကိုရင်များ၏ လက်ကိုင်ဖုန်း ၆ လုံး ခိုးခံလိုက်ရကြောင်း ဒေသခံ အမျိုးသမီးတစ်ဦးက ပြောသည်။
ဖြစ်စဉ်မှာ ယမန်နေ့ (အောက်တိုဘာလ ၄) ရက် နံနက်ပိုင်း ၁၁ နာရီတွင် ဆိုင်ကယ်ဖြင့် အမည်မသိအမျိုးသားတစ်ဦးက နောင်စန့်ရွာရှိ ဘုန်းကြီးကျောင်းသို့ ရောက်ရှိလာပြီး ဖုန်းအားသွင်းချင်သည်ဟုဆိုကာ ကိုရင်တစ်ပါးထံမှ အကူညီတောင်းခံခဲ့သည်။
ထို့နောက် ကိုရင်တစ်ပါးမှ ၎င်း၏ ဖုန်းကိုယူ၍ ဖုန်းအားသွင်းပေးပြီး ဆွမ်းသွားဘုန်းနေစဥ် ကိုရင်လေးများ၏ လက်ကိုင်ဖုန်း ၆ လုံးကို ခိုးယူသွားကြောင်း နောင်စန့်ရွာ အမည်မဖော်လိုသူ ဒေသခံ အမျိုးသမီးတစ်ဦးက ပြောသည်။
“ဘုန်းကြီးကျောင်းအောက်ဝင်လာပြီး ကိုရင်တစ်ပါးကို မေးတယ်။ အိမ်သာဘယ်မှာလဲ၊ ဖုန်းအားသွင်းချင်တယ်လို့ပြောတယ်။ ကိုရင်လဲ ဖုန်းအားသွင်းပေးလိုက်တယ်။ ပြီးတော့ နေ့လယ်ဆိုတော့ အကုန်လုံးက ဆွမ်းသွားစားကြတာ။ ဖုန်းခြောက်လုံး သွင်းထားတာ အကုန်ယူသွားတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ ဖုန်းများခိုးယူသွားသူသည် အမျိုးသားတစ်ဦးသည် မည်သူဖြစ်ကြောင်း မသိရှိရကြောင်း ၎င်းကဆိုသည်။
စစ်တပ်က အာဏာသိမ်းပြီးနောက်ပိုင်း ပုံးအင်းဒေသတွင် နေ့စဉ်နီးပါး မျက်နှာစိမ်း ဝင်ထွက်သွားလာသူ များလာနေပြီး မည်သူဖြစ်ကြောင်း မသိရှိရကာ၊ ပြည်သူပိုင် ပစ္စည်းများ မကြာခဏ ခိုးခံရကြောင်းလည်း သိရသည်။
“ အရင်က ရေဝန်းရွာက ဘုန်းကြီးကျောင်းမှာလည်း ကိုရင် ဖုန်းခိုးခံရဖူးတယ်။ ပုံးအင်းမှာ ရေတက်ချိန်တောင်မှ သူခိုးတွေကို စိတ်မချတော့ဘူး။ သူခိုးတွေက တော်တော်များလာတယ် “ ဟု အဆိုပါ အမျိုးသမီးတစ်ဦး ထပ်လောင်းပြောသည်။
ထို့အပြင် ပုံးအင်းဒေသတွင် လာမည့် တော်သလင်းလပြည့်ကျော် (၈-၉) ရက်တွင် ရိုးရာလှေလှော်ပြိုင်ပွဲများ ပြန်လည် ကျင်းပသွားမည်ဆိုကာ ဆိုင်ကယ်သူခိုးများကိုလည်း သတိထားရန် လိုအပ်ကြောင်း ဒေသခံများက ပြောသည်။
