မြန်မာ – ထိုင်း နယ်စပ်ဒေသ တာချီလိတ်မြို့နယ် မိုင်းဖုန်းအုပ်စု ပါခါရွာအနီးတွင် သားအဖနှစ်ဦး ဈေးသွားရောင်းပြီး အပြန်လမ်းမှာ ကားတစ်စီးနှင့်တိုက်မိပြီး ကလေးတစ်ဦး ပွဲချင်းပြီး သေဆုံးသွားခဲ့ကြောင်း စုံစမ်းသိရသည်။

ယမန်နေ့ စက်တင်ဘာလ ၂၈ ရက် ညနေပိုင်း ၄ နာရီခွဲအချိန်တွင် တာချီလိတ်မြို့နယ် မိုင်းဖုန်းအုပ်စု ပါခါရွာအနီးတွင် သားအဖနှစ်ဦးသည် ဆိုင်ကယ်ဖြင့် ဈေးသွားရောင်းပြီး အိမ်ပြန်နေစဉ် လမ်းမှာ ကားတစ်စီး နှင့် တိုက်မိပြီး အသက် ၃ နှစ်အရွယ်ရှိ ကလေးတစ်ဦးသည် အခင်း၌ ပွဲချင်းပြီးသေဆုံးသွားခဲ့ကြောင်း ၎င်းကိုသွားရောက် ကူညီခဲ့သည့် ဦးလှမိုးလူမှုကူညီရေးအသင်းမှ တာဝန်ခံတစ်ဦးက ပြောသည်။

“သူတို့သားအဖ နှစ်ယောက် ဆိုင်ကယ်စီးလာရင်း ကားနဲ့တိုက်မိတာ။ ကလေးကတော့ အဲ့မှာ ဆုံးသွားတယ်။ အဖေကျတော့ ဦးခေါင်းထိထားပြီး ဆေးရုံကို ပို့ထားတယ်“ ဟု ၎င်းတာဝန်ခံတစ်ဦးက သျှမ်းသံတော်ဆင့်ကို ပြောသည်။

အဆိုပါ ယာဉ်တိုက်မှု နှင့် ပတ်သက်ပြီး ယာဉ်တိုက်မှု ကျူးလွန်သူကို ရဲတပ်ဖွဲ့မှ မည်သို့ အရေးယူ ဆောင်ရွက်ခြင်း မရှိပေ။

ထို့အပြင် ယာဉ်စည်းကမ်း၊ လမ်းစည်းကမ်း နှင့် ပတ်သက်ပြီး တာချီလိတ်မြို့ ယာဉ်ထိန်းရဲတစ်ဦးက ယခုလို ပြောသည်။

“အဓိကတော့ ဆိုင်ကယ်မောင်းတဲ့သူက ဆိုင်ကယ် ဦးထုပ်ဆောင်းရင် အသက်အန္တရာယ်ကတော့ ၉၀ ရာခိုင်နှုန်း မစိုးရိမ်ရဘူး။ သူတို့က ဦးထုပ်မဆောင်းတဲ့အခါ ဖမ်းတုန်းခဏ၊ ပညာပေးတုန်းခဏ ပြီးရင် ပြန်ချွတ်ကြတာ။ တချို့ မော်တော်ပီကယ်မြင်မှ ဦးထုပ်ဆောင်းတယ်။ အဲ့လိုမျိုးဖြစ်နေတော့ မပြောကောင်း၊ မဆိုကောင်း လက်ကျိုးရင် စတီးပြန်ထည့်လို့ရတယ်။ ဦးထုပ် မဆောင်းတဲ့ အခါကြတော့ သတိလှစ်မယ်။ မတော်တဆ အသက်ဆုံးရှုံးမယ် “ ဟု ၎င်း ယာဉ်ထိန်းရဲတစ်ဦးက ပြောသည်။

သျှမ်းပြည် တာချီလိတ်မြို့အပြင် လားရှိုး၊ ကျောက်မဲ၊ သိန္နီ၊ ကျိုင်းတုံ စသည့် မြို့ပြကြီးမှာလည်း လူနေထူထပ်မှု များပြားလာသည်နှင့်အမျှ ယာဉ်စည်းကမ်း၊ လမ်းစည်းကမ်း လိုက်နာမှု အားနည်းကာ ယခု (စက်တင်ဘာလ) အတွင်း ယာဉ်တိုက်မှုကြောင့် လူ ၉ ဦး သေဆုံးပြီး ၄၇ ဦး ထိခိုက် ဒဏ်ရာ ရရှိခဲ့ကြောင်း ဒေသအတွင်း လူမှုကူညီရေးအသင်းမှ စာရင်းပြုထားချက်အရ သိရသည်။