သျှမ်းပြည် ကွတ်ခိုင်မြို့နယ်အတွင်း ဖြစ်ပွားသည့် တိုက်ပွဲကြောင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) နှင့် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့က ဆွေးနွေးညှိနှိုင်းရန် ဆောင်ရွက်နေကြောင်း စုံစမ်းသိရသည်။

ပြီးခဲ့သည့် စက်တင်ဘာလ ၂၃ ရက် မွန်းလွဲပိုင်း ၁ နာရီမှ ည ၆ နာရီအထိ ကွတ်ခိုင်မြို့နယ်၊ မိုင်းယု အုပ်စု၊ ဖာပျဥ်ကျေးရွာအနီး (ဝၢၼ်ႈၽႃပႅၼ်ႈ) ၌ SSPP/SSA နှင့် TNLA တို့ ထိတွေ့တိုက်ပွဲ ဖြစ်ပွားခြင်းကြောင့် နှစ်ဖက်တပ်ဖွဲ့မှ ဆွေးနွေးညှိနှိုင်းရန် လုပ်ဆောင်နေခြင်းဖြစ်ကြောင်း TNLA တပ်ဖွဲ့၏ ပြောရေး ဆိုခွင့်ရှိသူ ဒု- ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

“တိုက်ပွဲဖြစ်တာက အောက်ခြေတပ် အချင်းချင်း နားလည်မှု ကွဲလွဲလို့ ဖြစ်တာပါ။ အခုတော့ တိုက်ပွဲက ပြီးသွားပါပြီ၊ နှစ်ဖက် ညှိနှိုင်းဆွေးနွေးဖို့ ရှိပါတယ်။ ဆွေးနွေးမယ့် အသေးစိတ်ကိုတော့ ကျနော် မသိရဘူး”ဟု ဒု – ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

ကွတ်ခိုင်မြို့နယ်၊ မိုင်းယုကျေးရွာအုပ်စုအတွင်း ဖြစ်ပွားသည့် တိုက်ပွဲသည် နှစ်ဖက် ဆွေးနွေးမှု အခြေအနေများ နှင့် ပတ်သက်ပြီး အသေးစိတ်ကို မသိရကြောင်း TNLA ၏ ပြောရေးဆိုခွင့် ဒု – ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

အဆိုပါ တိုက်ပွဲအတွင်းတွင် နှစ်ဖက်တပ်ဖွဲ့မှ ထိခိုက်ကျဆုံးမှု ရှိနေကြောင်း သတင်း သိရသော်လည်း အရေအတွက်များကို သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိပေ။

ယင်းတိုက်ပွဲဖြစ်စဥ် နှင့် ပတ်သက်ပြီး အသေးစိတ် မေးမြန်းသိရှိနိုင်ရန် အတွက် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၏ ပြောရေးဆိုခွင့်များထံသို့ ဆက်သွယ်ခဲ့သော်လည်း ဖုန်းလက်ခံ ဖြေကြားခြင်းမရှိပေ။

TNLA နှင့် SSPP တို့သည် မြောက်ပိုင်းမဟာမိတ် တပ်ပေါင်းစုတွင် ပါ၀င်နေသည့် လက်နက်ကိုင် အဖွဲ့များ ဖြစ်သည့်အပြင် အာဏာသိမ်း စစ်ကောင်စီ နှင့်လည်း ပစ်ခတ်တိုက်ခိုက်မှု ရှိနေသည့် တပ်ဖွဲ့များ ဖြစ်ကြ သည်။