သျှမ်းပြည် ကွတ်ခိုင်မြို့နယ် နမ့်ဖတ်ကာရှိ စစ်ကောင်စီတပ်၏ စခန်းဟောင်းကုန်းအနီးတွင် အမျိုးသားတစ်ဦး မိုင်းနင်းမိပြီး ခြေထောက်တစ်ဖက် ဆုံးရှုံးသွားခဲ့ကြောင်း စုံစမ်းသိရသည်။
ယမန်နေ့ စက်တင်ဘာလ ၂၄ ရက် နေ့လယ် ၁ နာရီ ဝန်းကျင်တွင် ကွတ်ခိုင်မြို့နယ် နမ့်ဖတ်ကာ ရပ်ကွက် ၂ အတွင်းရှိ စစ်တပ်၏ ၄၅ စခန်းဟောင်းကုန်း (ညောင်ပင်ကုန်း) အနီး၌ အသက် ၄၂ နှစ်အရွယ် အမျိုးသားတစ်ဦးသည် ထင်းခွေသွားရန် မိုင်းနင်းမိပြီး ခြေထောက်တစ်ဖက် ဆုံးရှုံးသွားခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တပ်စခန်းအောက်မှာ နင်းမိတာ။ ၄၅ စခန်းဟောင်းကုန်းလို့ ပြောကြတယ်။ ထင်းခွေဖို့ သွားလာရင်း မိုင်းနင်းမိတာ။ ဒဏ်ရာကတော့ ခြေထောက်တစ်ဖက်ပြတ်သွားတယ် “ ဟု ၎င်း ဒေသခံတစ်ဦးက ပြောသည်။
အဆိုပါ ထိခိုက်ဒဏ်ရာရသူ အမျိုးသားကို တိုက်နယ်ဆေးရုံမှတစ်ဆင့် ကွတ်ခိုင်စစ်ဆေးရုံသို့ ဆေးဝါးကုသရန် ပို့ဆောင်ပေးခဲ့ကြောင်း သွားရောက်ကူညီသူ အမျိုးသားတစ်ဦးက ပြောသည်။
“ ၄၅ တပ်စခန်းဟောင်း နဲ့ ဗြုန်းတောင်နဲ့က တကြောထဲပဲ။ အရင်တုန်းက ၄၅ တပ်ရင်းဘဲ ရှိတာလေ။ အဲ့ဒီနေရာမှာ ညောင်ပင်ကုန်းလို့လည်း ခေါ်တယ်။ စေတီကုန်းလို့လည်း ခေါ်တယ် “ ဟု ဒေသခံ အမျိုးသားတစ်ဦးက ဆက်ပြောသည်။
ထို့ကြောင့် ပြည်သူများအနေဖြင့် တပ်စခန်းအနီးတွင် သွားရောက်ပြီး ထင်းရှာဖွေခြင်း မပြုလုပ်သင့်ရန်၊ တပ်စခန်းမှ သက်ဆိုင်ရာ တာဝန်ရှိသူများလည်း မြေမြှုပ်မိုင်းအန္တရာယ်ရှိသည့် နယ်မြေများဖြစ်ကြောင်း ထင်ရှားသည့်အမှတ်အသား ထားသင့်ကြောင်းလည်း အဆိုပါ ဒေသခံ အမျိုးသားက ပြောသည်။
လက်ရှိမှာ ကွတ်ခိုင်မြို့နယ်အတွင်း စစ်ကောင်စီ နှင့် TNLA တို့အကြား စစ်ရေးတင်းမာနေလျက်ရှိသလို SSPP နှင့် TNLA တို့အကြား တိုက်ပွဲဖြစ်ပွားနေလျက်ရှိသည်။
