သျှမ်းပြည် မူဆယ်ခရိုင် မူဆယ်မြို့နယ်အတွင်း အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲဖြစ်ပွားမှုကြောင့် ဒေသခံများ စစ်ရှောင်ထွက်ပြေးနေရကြောင်း စုံစမ်းသိရှိရသည်။

ယနေ့ စက်တင်ဘာလ ၂၁ ရက်တွင် မူဆယ်မြို့နယ် ပန်ခမ်းကျေးရွာအုပ်စုသို့ စစ်ရှောင်ထွက်ပြေး လာသည့် ဝိန်းနန်းကျေးရွာမှ ဒေသခံ ၅၀ နီးပါး ရှိနေပြီး ပန်ခမ်းဘုန်းကြီးကျောင်းတွင် ၃၀ ကျော်လာရောက်နေထိုင်ပြီး ရပ်ရွာထဲရှိ ဆွေမျိုးများထံသို့ သွားရောက်စစ်ရှောင်ခဲ့သည့် ဒေသခံများလည်းရှိကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“မနေ့က ဝိန်းနန်းရွာဘက်မှာ လက်နက်ကြီးကျလို့ တချို့လည်း မနေ့ညနေ ကတည်းက ရောက်လာကြတယ်၊ တချို့လည်း ဒီနေ့မှ ရောက်လာတာပေါ့၊ ဆွေမျိုးရှိတဲ့သူတွေက ဆွေမျိုးအိမ်မှာ နေနေကြတယ်၊ ဘုန်းကြီးကျောင်းမှာတော့ ၃၀ ကျော်ပဲ ရှိတယ်” ဟု ပန်ခမ်းရွာခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ပန်ခမ်းဘုန်းကြီးကျောင်းရောက် ဝိန်းနန်းရွာ စစ်ရှောင်များကို ဒေသခံများမှ နေရာထိုင်ခင်း နှင့် စားသောက်ရေး အတွက် စီစဥ်ပေးထားလျက်ရှိကြောင်းလည်း သိရသည်။

ထို့အပြင် မူဆယ်မြို့နယ် စန်းဆာကျေးရွာ နှင့် စယ်လန့်ကျေးရွာ အုပ်စုတို့မှ ဒေသခံများလည်း မူဆယ်မြို့ပေါ် ရပ်ကွက်များရှိ ဆွေမျိုးများထံသို့ စစ်ရှောင်ရောက်ရှိနေလျက်ရှိကြောင်း မူဆယ်မြို့မှ စစ်ရှောင်ကူညီပေးသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“လောလောဆယ်တော့ စစ်ရှောင်စာရင်း အတိအကျ မသိရသေးဘူး၊ နောင်လောင်းအုပ်စု၊ မန်နိမ်ရွာက ဇရပ်မှာတော့ ၂၅၀ လောက်ရှိတယ်။ ရပ်ကွက်ထဲက အမျိုးတွေဆီ နေနေတဲ့ ဦးရေ အတိအကျကတော့ ကျနော်တို့ မရရှိသေးဘူး” ဟု မူဆယ်မြို့မှ စစ်ရှောင်ကူညီပေးသူ အမျိုးသားက ပြောသည်။

လက်ရှိတွင် စစ်ဘေးရှောင်များအတွက် နေထိုင်စားသောက်ရေး အပိုင်းကို ဒေသခံများ၊ လူမှုကူညီရေး အသင်းများမှ စုပေါင်းပြီး ကူညီပေးထားသော်လည်း တိုက်ပွဲ ရက်ရှည်ကြာလာပါက စားနပ်ရိက္ခာအကူအညီ လိုအပ်လာနိုင်ကြောင်းလည်း စစ်ရှောင် ကူညီပေးနေသူက ပြောသည်။

ယမန်နေ့ စက်တင်ဘာလ ၂၀ ရက်နေ့တွင်လည်း TNLA နှင့် စစ်ကောင်စီ တို့တိုက်ပွဲကြား မူဆယ်မြို့နယ် ဆုတောင်းတောင် ဘုန်းကြီးကျောင်းရှိရာသို့ လက်နက်ကြီး ကျရောက်ပေါက်ကွဲသည့် အတွက် ကျောင်းထိုင်ဆရာတော် ထိခိုက်ဒဏ်ရာ ပြင်းထန်စွာ ရရှိခဲ့သည်။

ပြီးခဲ့သည့် စက်တင်ဘာ ၁၉ ရက်တွင် TNLA နှင့် စစ်ကောင်စီကြား တိုက်ပွဲ ၇ ကြိမ် ဖြစ်ပွားခဲ့ပြီး၊ စစ်ကောင်စီဘက်မှ သေနတ် ၅ လက်၊ ပစ္စတို ၂ လက်၊ စက်လက် ၁ လက်၊ ၆၀ မမ ဗုံးသီး ၅ လုံးတို့ အပြင် လက်နက်ခဲယမ်း နှင့် စစ်အသုံးအဆောင်ပစ္စည်းများ သိမ်းဆည်းရမိခဲ့ကြောင်း TNLA မှ သတင်းထုတ်ပြန်ထားသည်။

လက်ရှိတွင် မူဆယ်မြို့နယ်အတွင်း၌ မြို့နယ်အုပ်ချုပ်ရေးမှူးမှ တစ်ဆင့် ကာဖျူးကိုလည်း ထုတ်ပြန်ထားပြီး ဒေသခံများ ည (၁၀) နာရီမှ နံနက် (၄) နာရီအတွင်း အပြင်ထွက် သွားလာခြင်း မပြုကြရန် ၊ လူ (၅) ဦး နှင့်အထက် စုဝေးခြင်းများ မပြုကြရန် ထုတ်ပြန် ပြောဆိုထားသည်။

အဆိုပါ ကာဖျူးသည် စက်တင်ဘာလ (၁၉) ရက်မှ စတင်ကာ ရက်အကန့်အသတ်မရှိ ထုတ်ပြန်ထားကြောင်းလည်း သိရသည်။