မိုးကုတ်မြို့နယ် ညောင်ကုန်းကျေးရွာရှိ နေအိမ် ခြံဝန်းအတွင်း လက်နက်ကြီး ကျရောက်ပေါက်ကွဲပြီး အသက် (၅) နှစ်အရွယ် ကလေးငယ် တစ်ဦး သေဆုံးသွားကြောင်း စုံစမ်းသိရှိရသည်။
ယမန်နေ့ စက်တင်ဘာလ ၂၀ ရက် မနက်ပိုင်း အချိန်တွင် ညောင်ကုန်းကျေးရွာမှ နေအိမ်တစ်လုံးအတွင်း လက်နက်ကြီး ကျရောက်ပေါက်ကွဲမှုကြောင့် နေအိမ်ထဲရှိ အသက် ၅ နှစ်အရွယ် ကလေးငယ်တစ်ဦး ပြင်းထန်စွာ ထိခိုက်ဒဏ်ရာ ရခဲ့သလို အသက် ၅၅ နှစ် အရွယ် အမျိုးသားတစ်ဦးလည်း ထိခိုက်ဒဏ်ရာ ရရှိခဲ့သည်။
ထိုသို့ ထိခိုက်ဒဏ်ရာရရှိပြီးနောက် ဒဏ်ရာရသူကို မိုးကုတ်မြို့သို့ ပို့ဆောင်ရန် လုပ်ဆောင်စဥ် စစ်ကောင်စီမှ လမ်းပိတ်ဆို့ထားသောကြောင့် ဖြတ်သန်းသွားလာ၍ မရကာ လူနာကို ကျောက်မဲမြို့ရှိ ဆေးရုံသို့ လွှဲပြောင်းစဉ် လမ်းတစ်ဝက်၌ အသက် ၅ နှစ်အရွယ် ကလေးတစ်ဦး သေဆုံးခဲ့ကြောင်း လူမှုကူညီရေးအသင်းထံမှ သိရသည်။
“ မိုးကုတ်မှာ လမ်းတွေ ပိတ်ထားလို့ သွားလာလို့ မရဘူး။ အဲ့ကြောင့် ကျောက်မဲမြို့က ဆေးရုံကို လွဲလာလိုက်တာ။ ကလေးက သွေးထွက်လွန်ပြီးတော့ လမ်းမှာဘဲ ဆုံးသွားတယ် “ ဟု ၎င်းကို သွားရောက်ကူညီခဲ့သည့် နမ့်ခုံးရှမ်းများ ပရဟိတအသင်းမှ တာဝန်ခံတစ်ဦးက ပြောသည်။
သေဆုံးသူသည် အသက် ၅ နှစ်အရွယ် စိုင်းအောင်ကောင်းမြတ်ဖြစ်ပြီး ထိခိုက်ဒဏ်ရာရသူသည် ၎င်း၏ ဖခင်ဖြစ်သူ စိုင်းအောင်ဝင်းသည် ဦးခေါင်း၊ ညာလက် နှင့် ဘယ်ဘက်ပေါင်၌ ဒဏ်ရာရရှိခဲ့သည်။
လက်ရှိမှာ ကျောက်မဲ ပြည်သူ့ဆေးရုံတွင် ဆေးဝါးကုသမှု ခံယူနေလျက်ရှိပြီး ကုသစရိတ်အတွက် ငွေရေးကြေးရေး အခက်ခဲ ဖြစ်နေကြောင်းလည်း သိရသည်။
“ဆေးကုသဖို့အတွက် ငွေရေးကြေးရေး အခက်ခဲ ဖြစ်နေတယ်။ ကူညီဖို့အတွက် ဆွေမျိုး၊ မိတ်ဆွေတွေထံ ဖုန်းဆက် ချေးငှားဖို့တောင်းနေတာလည်း တွေ့ရတယ် “ ဟု နမ့်ခုံးရှမ်းများ ပရဟိတအသင်း တာဝန်ခံတစ်ဦးက ထပ်လောင်းပြောသည်။
ထို့အပြင် မိုးကုတ်မြို့နယ်တွင် စစ်ကောင်စီ နှင့် TNLA၊ PDF တို့အကြား တိုက်ပွဲ ပြင်းထန်နေလျက်ရှိပြီး လက်နက်ကြီးဖြင့် ပစ်ခတ်မှုများ ပြုလုပ်နေလျက် ရှိသည်။
Leave a Comments