သျှမ်းပြည် လားရှိုးခရိုင် မိုင်းရယ်မြို့နယ် ရပ်ကွက် ၁ အတွင်း နေအိမ်တစ်လုံး ဖောက်ထွင်းခံရပြီး ရွှေ ၁ ကျပ်သား နှင့် ကျပ်ငွေ ၆ သောင်းပါသွားကြောင်း သတင်းသိရသည်။
ယမန်နေ့ စက်တင်ဘာလ ၂၀ ရက် မွန်းလွဲ ၃ နာရီတွင် မိုင်းရယ်မြို့ ရပ်ကွက် ၁ အတွင်း အောင်စေတီကျောင်းတိုက်အနီးရှိ အိမ်တစ်လုံးသည် တံခါးသော့ဖျက်ခံရပြီး အိမ်ထဲရှိ ပစ္စည်းများ ဝင်ရောက် မွှေနှောက်ထားပြီး ရွှေ ၁ ကျပ်သား နှင့် ကျပ်ငွေ ၆ သောင်း ပါသွားကြောင်း ဖောက်ထွင်းခံရသည့် အိမ်နီးချင်း အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အိမ်တံခါး သော့တွေဖျက်ပြီး ပစ္စည်းဝင် မွှေသွားတာ။ သူခိုးကတော့ ၂ ယောက်လောက် ပါမယ်။ ရွှေ ၁ ကျပ်သားနဲ့ ငွေ ၆ သောင်းပါသွားတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ နေအိမ်ဖောက်ထွင်းခံရမှု နှင့် ပတ်သက်ပြီး အိမ်ပိုင်ရှင်မှ သက်ဆိုင်ရာ ရွာသူကြီးကို အကြောင်းကြား ခဲ့သော်လည်း အရေးယူပေးနိုင်ခြင်း မရှိပေ။
စစ်တပ်က အာဏာသိမ်းပြီးနောက်ပိုင်း သျှမ်းပြည်အတွင်း ခိုးဆိုးလုယက်မှုများ ဓားပြမှုများ နေ့စဥ်နှင့်အမျှ ဖြစ်ပွားမှုရှိနေပြီး အချို့ ဖြစ်စဥ်သည် အိမ်ရှင်ကို သေနတ်ဖြင့် ပစ်သတ်သည့် အဆင့်ထိ ဖြစ်ပွားနေသည်။
ထို့အပြင် အိမ်ရှင်များအနေဖြင့် အိမ်ပြင်သို့ထွက်သွားပါက အိမ်တွင် သက်ကြီးရွယ်အိုတစ်ဦးတည်း မထားသင့်ကြောင်း၊ အိမ်လုံခြုံရေးအတွက် အနည်းဆုံး လူနှစ်ဦးခန့် အိမ်စောင့်ထားသင့်ကြောင်း အသက် ၃၀ ဝန်းကျင် ဒေသခံ အမျိုးသမီးတစ်ဦးက ပြောသည်။
“ မိုင်းရယ်မှာ ဒီလိုဖြစ်စဉ်တွေ တစ်ခါမှ မဖြစ်ဖူးဘူး။ အခုလို ဖြစ်လာတော့ ကြောက်တာပေါ့။ ဒီလိုဖြစ်တာကလည်း မြို့တိုင်းလိုလို ဖြစ်နေပြီ။ အိမ်မှာနေရင် သက်ကြီး ရွယ်အိုတစ်ယောက်ထဲ မထားထားဖို့လိုတယ်။ အနည်းဆုံးတော့ အိမ်မှာနှစ်ယောက်လောက်တော့ စောင့်မှရတော့မယ် “ ဟု ၎င်း ဒေသခံတစ်ဦးက ပြောသည်။
အလားတူ စက်တင်ဘာလ ၅ ရက်တွင်လည်း သျှမ်းပြည် မိုင်းတုံမြို့နယ် နားကောင်းမူး ကျေးရွာရှိ နေအိမ်တစ်အိမ်ကို အမည်မသိ လက်နက်ကိုင်မှ ဓားပြဝင်တိုက်ပြီး မိသားစုဝင် ၃ ဦးကို သေနတ်ဖြင့် ပစ်သတ်ခဲ့သည်။
