သျှမ်းပြည် မူဆယ်မြို့နယ်အတွင်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲကြောင့် ဆရာတော် တစ်ပါး လက်နက်ကြီး ထိမှန် ဒဏ်ရာရကြောင်း စုံစမ်းသိရသည်။
.
ယနေ့ (စက်တင်ဘာလ ၂၀ ) ရက် နံနက်ပိုင်းတွင် မူဆယ်မြို့ စယ်လန့်ရွာ၏ မြောက်ဘက်ရှိ ဆုတောင်းတောင်ပေါ်သို့ လက်နက်ကြီး ကျရောက်ပေါက်ကွဲပြီး ဆုတောင်းတောင် ဘုန်းကြီးကျောင်းမှ ကျောင်းထိုင်ဆရာတော် လက်နက်ကြီးစ ထိမှန် ဒဏ်ရာရကြောင်း ဒေသခံ အိုက်လမ် (နာမည်လွှဲ) က သျှမ်းသံတော်ဆင့်ကို ပြောသည်။
“ဘယ်အဖွဲ့က ပစ်လိုက်တဲ့ လက်နက်ကြီးတော့ သေချာမသိရဘူး။ လက်နက်ကြီးတွေက တောင်ပေါ် ကျတာ ၃ လုံးထက် မနည်းဘူး။ ကျောင်းထိုင်ဆရာတော်လည်း လက်နက်ကြီးစ ထိမှန်လို့ ခေါင်းတွေ၊ ခြေထောက်တွေမှာ ဒဏ်ရာရသွားတယ်။ အခုတော့ ဆေးရုံပို့ထားပါပြီ” ဟု အိုက်လမ်က ပြောသည်။
လက်နက်ကြီးကြောင့် ကျောင်းထိုင်ဆရာတော် ထိခိုက်ဒဏ်ရာရသည့် အပြင် တောင်ခြေရှိ တာဝါတိုင်များလည်း လက်နက်ကြီး ထိမှန် ပျက်စီးကြောင်း အထက်ပါ ပုဂ္ဂိုလ်က ဆက်ပြောသည်။
အဆိုပါ ဆုတောင်းတောင် အနီးတွင် စစ်ကောင်စီတပ်ဖွဲ့ တပ်စွဲနေရာယူထားလျက်ရှိပြီး TNLA တပ်စွဲ နေရာယူထားသည့် လွိုင်တေးမိန်း တောင်ပေါ်ဘက်ကိုလည်း လက်နက်ကြီးဖြင့် မကြာခဏ လှမ်းပစ်လေ့ရှိကြောင်းလည်း သိရသည်။
ယမန်နေ့ (စက်တင်ဘာလ ၁၉ ) ရက်တွင်လည်း စယ်လန့်ကျေးရွာအနီး၌ စစ်ကောင်စီ နှင့် TNLA တပ် တို့ တိုက်ပွဲဖြစ်ပွားရာ TNLA တပ်စခန်း နေရာ (၃) နေရာလည်း သိမ်းပိုက်ခံရကြောင်း မူဆယ်မြို့နယ် စစ်ရေးလေ့လာသူ တစ်ဦးက သျှမ်းသံတော်ဆင့်ကို ပြောသည်။
“သူတို့ တိုက်ပွဲက ၁၇ ရက်နေ့ (စက်တင်ဘာလ) ကတည်းက စခဲ့တာဆိုတာ့ ဒီတိုက်ပွဲမှာ စစ်ကောင်စီ ကနေ TNLA တပ်စခန်း (၃) နေရာကို သိမ်းနိုင်ခဲ့တယ်လို့ သိရတယ်။ အဲ့ (၃) နေရာက လွိုင်တေးမိန်း တောင်ခြေက စခန်း၊ ကောင်းလိန်လျန် (ၵွင်းလိၼ်လႅင်) က စခန်း နဲ့ အဲ့နီးက တပ်စခန်းတစ်ခုပါတယ်။ နှစ်ဖက်တပ်သား ကျဆုံးမှုတွေတော့ မသိရဘူး” ဟု ဖြစ်စဥ်ကို သိရှိသူ စစ်ရေးလေ့လာသူက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီ နှင့် TNLA တပ်ကြား တိုက်ပွဲ၌ စစ်ကောင်စီဘက်မှ ဒေသခံ ပြည်သူ့စစ်များက စစ်ကူအင်အားအဖြစ် ပါဝင်တိုက်ခိုက်နေကြောင်းလည်း အထက်ပါ စစ်ရေးလေ့လာနေသူ တစ်ဦးက သျှမ်းသံတော်ဆင့်ကို ဆက်ပြောသည်။
“စစ်ကောင်စီဘက်ကနေ မြို့မပြည်သူ့စစ်၊ ပန်းဆေးပြည်သူ့စစ်၊ ပန်းဆာပြည်သူ့စစ် တွေပါဝင် စစ်ကူထားတယ်။ စစ်ကောင်စီဘက်က တပ်မ ၉၉ လက်အောက်ခံ တပ်သားတွေပါတယ်။ TNLA ဘက်ကတော့ သူတို့ရဲ့ ကွန်မန်ဒိုတပ်ဖွဲ့နဲ့ စုစုပေါင်း အင်အား ၃၀၀ ကျော် ရှိလောက်တယ်” ဟု ၎င်းက ဆက်လက် ပြောဆိုထားသည်။
စစ်ကောင်စီ နှင့် TNLA တိုက်ပွဲကြား စက်တင်ဘာလ ၁၈ ရက်နေ့တွင် စယ်လန့်အုပ်စု၊ မန်ကန်ရွာမှ အမျိုးသမီး တစ်ဦး လက်နက်ကြီးစ ထိမှန် ဒဏ်ရာရပြီး ယမန်နေ့ (၁၉) ရက်တွင် စန်းဆာရွာမှ အမျိုးသမီး (၃) ဦး နှင့် နေအိမ် ၂ လုံးလည်း ထိခိုက်ဒဏ်ရာရမှု ရှိခဲ့သည်။
ထို့အပြင် စစ်ရေးပြင်းထန်မှု ရှိနေသည့် မူဆယ်မြို့နယ်အတွင်း၌ မြို့နယ်အုပ်ချုပ်ရေးမှူးမှ တစ်ဆင့် ကာဖျူးကိုလည်း ထုတ်ပြန်ထားပြီး ဒေသခံများ ည (၁၀) နာရီမှ နံနက် (၄) နာရီအတွင်း အပြင်ထွက် သွားလာခြင်း မပြုကြရန် ၊ လူ (၅) ဦးနှင့်အထက် စုဝေးခြင်းများ မပြုကြရန် ထုတ်ပြန် ပြောဆိုထားသည်။
အဆိုပါ ကာဖျူးသည် စက်တင်ဘာလ (၁၉) ရက်နေ့မှ စတင်ကာ ရက်အကန့်အသတ်မရှိဖြင့် ထုတ်ပြန်ထားကြောင်းလည်း သိရသည်။
