မြန်မာ – တရုတ်နယ်စပ်ဒေသ မူဆယ်မြို့ရှိ KTV တစ်ခုတွင် စိတ်ကြွမူးယစ်ဆေးဝါးသုံးစွဲပြီး အမျိုးသမီးတစ်ဦး သတိမေ့လစ်ကာ သေဆုံးမှု ဖြစ်ပွားခဲ့ကြောင်း စုံစမ်းသိရသည်။
.
ဖြစ်စဉ်မှာ စက်တင်ဘာလ ၁၇ ရက် ညအချိန်တွင် မူဆယ်မြို့ရှိ KTV တစ်ခုတွင် အသက် ၂၀ ကျော် အမျိုးသမီးတစ်ဦးက (ရွှေ) ဟု နာမည်ရသည့် စိတ်ကြွမူးယစ်ဆေးဝါးကို သုံးစွဲကာ မိနစ်ပိုင်းအကြာ သတိမေ့လစ်သွားပြီး သေဆုံးမှုဖြစ်ပွားခဲ့သည့် ဗီဒီယိုဖိုင်ကို ယခုရက်ပိုင်းအတွင်း လူမှုကွန်ရက်စာမျက်နှာပေါ်၌ ပျံ့နှံ့နေလျက်ရှိသည်။
အဆိုပါ စိတ်ကြွမူးယစ်ဆေးဝါးသည် KTV ဆိုင်၊ ကလပ် (Club)၊ ဘား (Bar) ဆိုင်များတွင် အများဆုံးတွေ့ရပြီး (K)၊ (E) နှင့် Happy water ဟုနာမည် အမျိုးမျိုးပေးကာ လူငယ်များကြားထဲ၌ အချင်းချင်း ရေပန်းစားပြောဆိုနေကြပြီး သုံးစွဲနေကြသည်။
“ ကျမတုန်းကလည်း တစ်ကြိမ် ဖြစ်ဖူးတယ်။ ပါလာတဲ့ K တစ်ကြောင်းရှုပြီး E ကိုတစ်ဝက်ပဲသောက်ခိုင်းတာ နားကြားလွဲပြီး တစ်လုံးသောက်လိုက်တာ ၂ မိနစ်တောင် မကြာဘူး။ ချွေးတွေတအားထွက်ပြီး ထလိုက်တာ မူးလဲသွားတာ ကံကောင်းလို့ အသက်မပါတာ “ ဟု ကိုယ်တိုင်သုံးစွဲဖူးသူ အမျိုးသမီးတစ်ဦးကလည်း ၎င်းရဲ့ လူမှုကွန်ရက်ပေါ်မှာ ရေးသားဖော်ပြထားသည်။
Ketamine Hydrochloride (K) မူးယစ်ဆေးဝါးသည် အဖြူရောင်အမှုန့် ဖြစ်ပြီး နှာခေါင်းရှူရှိုက်ရသည့် စိတ်ကြွမူးယစ်ဆေးတစ်မျိုးဖြစ်သည်။ Happy Water ဆိုသည်မှာတော့ ကော်ဖီအမှုန့်ပုံစံ ကော်ဖီ အနံ့ နှင့် သစ်သီးအနံ့ အရသာ အမျိုးမျိုးရှိပြီး ကော့တေးခွက် ပမဏကို ကျွဲရိုင်းအချိုရည်ဖြင့်ရောကာ သောက်သုံးရသည်။
အဆိုပါ စိတ်ကြွမူးယစ်ဆေးဝါးများကို သုံးစွဲပြီးပါက မိနစ်ပိုင်းအကြာတွင် သွေးလည်ပတ်နှုန်း ပိုမြန်လာပြီး စိတ်ကိုကြွစေကာ ခုန်ပေါက်ပြီး ပျော်မြူးစေကြောင်း ကိုယ်တိုင်သုံးစွဲဖူးသူ စိုင်းကျော် (အမည်လွှဲ)က ပြောသည်။
“ကော်ဖီအမှုန့်လိုပဲ အချိုရည်နဲ့ရောပြီး သောက်ရတယ်။ အဲ့ဒါ သောက်ပြီး လူကနောက်ထပ် တစ်ကမ္ဘာထဲ ရောက်နေသလိုလို၊ နာကျင်မှုဆိုတာလည်း မခံစားတတ်တော့ဘူး “ ဟု ၎င်းက ဆိုပြန်သည်။
စစ်တပ်က အာဏာသိမ်းပြီးနောက်ပိုင်း နယ်စပ်တလျောက်ရှိ မူဆယ်မြို့အပြင် တာချီလိတ်မြို့၊ လားရှိုးမြို့ စသည့် မြို့ပြကြီးတွင် နေရာအနှံ့ဝယ်ယူ၍ ရနေပြီး အဆိုပါ စိတ်ကြွ မူးယစ်ဆေးဝါးကြောင့် လစဉ် လူသေဆုံးမှုများလည်း ရှိနေသည်။
ထို့အပြင် မူဆယ်မြို့တွင် နယ်စပ်ဒေသမြို့ဖြစ်သည့်အလျောက် သုံးစွဲသူများလည်း ပေါများနေပြီး လစဉ် သေဆုံးမှုလည်း ရှိနိုင်ကြောင်း၊ သက်ဆိုင်ရာ အာဏာပိုင်များက သတင်းဖုံးကွယ်ထားကြောင်း လူမှုကူညီရေး အသင်းအဖွဲ့ဝင် မောင်စိုး (အမည်လွှဲ)က ပြောသည်။
“ သေဆုံးတာတော့ သူတို့ တရားဝင် မထုတ်ပြန်ဘူး။ ဒီဖက်မှာ လက်နက်ကိုင်တွေ စိုးမိုးတဲ့နေရာတွေဆိုတော့ ဘယ်သူမှလည်း မေးလို့မရဘူး။ တချို့လည်း ဒီတိုင်းသေသွားတာ ဘယ်သူမှ မသိလိုက်ဘူး “ ဟု မောင်စိုးက ဆိုသည်။
ပြီးခဲ့သည့် ၂၀၂၂ ဇူလိုင် ၂၉ ရက်တွင် သျှမ်းသံတော်ဆင့်သတင်းဌာနမှ ရေးသား တင်ဆက်ခဲ့သည့် သတင်းတစ်ပုဒ်၌ အာဏာသိမ်းပြီးနောက်ပိုင်း လားရှိုးမြို့တွင် K မူးယစ်ဆေးဝါးသုံးစွဲပြီး လူငယ် ၁၅ ဦး သေဆုံးခဲ့ကြောင်း ရေးသားဖော်ပြခဲ့သည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နေရာအနှံ့ မူးယစ်ဆေးဝါးများ ပိုမိုပေါများလာနေပြီး မူးယစ်ဆေး ဈေးကွက် ပိုကျယ်လာသလို ဈေးပေါလာသောကြောင့် မြို့နယ် ၁၀၀ အနက် ၉၄ မြို့နယ်တွင် ဆေးခြောက်ကို အလွယ်တကူ ဝယ်ယူရရှိနေကြောင်း ISP Myanmar ၏ စစ်တမ်းကောက်ထားချက်အရ သိရသည်။
စစ်တမ်းအရ ၈၉ မြို့နယ်တွင် WY ဆေးပြား နှင့် ခေါင်းခါဆေး ဟု လူသိများသည့် E ဆေးပြားများလည်း သုံးစွဲနေကြောင်း၊ ၅၃ မြို့နယ်တွင် ဘိန်းဖြူ နှင့် ကော်ရှူတာကို သုံးစွဲနေသည့်အဆင့် တတိယအများဆုံး ဖြစ်ကြောင်း ရေးသားဖော်ပြထားသည်။
