Wednesday, July 24, 2024

သိန္နီမြို့နယ်အတွင်း လက်နက်ကိုင် တပ်ဖွဲ့များ စစ်အင်အား အပြိုင် ဖြည့်တင်းနေ

Must read

သျှမ်းပြည် လားရှိုးခရိုင်၊ သိန္နီမြို့နယ်အတွင်းတွင် လက်နက်ကိုင်တပ်ဖွဲ့များမှ စစ်အင်အား အပြိုင်ဖြည့်တင်းမှု ရှိနေသည့်အတွက်ကြောင့် စစ်ရေး ပိုမိုပြင်းထန်လာမှာကို ဒေသခံများက စိုးရိမ်နေကြသည်။

.

ယနေ့ စက်တင်ဘာလ ၁၉ ရက်နေ့ မွန်းလွဲပိုင်း ၂ နာရီခွဲ ဝန်းကျင်တွင် သိန္နီမြို့နယ်၊ စယ်အူကျေးရွာမှ စစ်အင်အား ၂၀၀ နီးပါး ရှိသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) စစ်ကြောင်းတစ်ခုသည် ကွန်ကောက်ကျေးရွာအုပ်စု၊ ဟိုနောင်ကျေးရွာအနီးသို့ စစ်အင်အားဖြည့် ရောက်ရှိလာကြောင်း သိရသည်။

Photo- Credit ( SSPP တပ်သား)

“ကား နဲ့ပဲ ရောက်လာကြတာ။ အရပ်ကား နဲ့ စစ်ကား ၁၀ စီးကျော်တယ်။ စုစုပေါင်း အင်အားလည်း ၂၀၀ နီးပါး လောက်တော့ ရှိတယ်။ စယ်အူဘက်ကနေ ဟိုနောင်ကျေးရွာ နားမှာ ရောက်လာတာ၊ အဲ့ဒီနားမှာ စစ်ကောင်စီတပ် နဲ့ KIA တပ်လည်း ရှိနေတယ်” ဟု ကွန်ကောက်ကျေးရွာအုပ်စုမှ အမည် မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ SSPP/SSA တပ်သားများ စစ်အင်အားဖြည့် ရောက်လာသည့် နေရာ အနီးပတ်ဝန်းကျင်သည် စစ်ကောင်စီ တပ်နှင့် ကချင်လွတ်လပ်ရေး တပ်မတော် (KIA) တပ်တို့ စစ်ရေးတင်းမာနေသည့် နေရာ ဖြစ်ကြောင်းလည်း သိရသည်။

ထို့အပြင် ယမန်နေ့ စက်တင်ဘာလ ၁၈ ရက်နေ့ ည (၈) နာရီဝန်းကျင် အချိန်တွင်လည်း သိန္နီမြို့မှ ရောက်လာသည့် စစ်ကောင်စီ စစ်ကြောင်း တစ်ခုသည် ကွန်ကောက်ကျေးရွာအုပ်စုအတွင်းသို့ အင်အားဖြန့်ကျက်ထားကြောင်းလည်း ဒေသခံများက ပြောသည်။

Photo- Credit ( သျှမ်းပြည်တွင်း တစ်နေရာ စစ်ကောင်စီ စစ်အင်အားဖြည့်တင်းနေသည့် ယာဥ်တန်း)

ယင်းကဲ့သို့ လက်နက်ကိုင် တပ်ဖွဲ့များ သိန္နီမြို့နယ်၊ ကွန်ကောက်ကျေးရွာအုပ်စုအတွင်း စစ်အင်အား အပြိုင် ဖြည့်တင်းနေမှုကြောင့် စစ်ရေးပိုမိုပြင်းထန်လာမှာကို စိုးရိမ်ရကြောင်းလည်း အသက် (၅၀) ဝန်းကျင် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“ကြောက်တာကတော့ အားလုံးကြောက်ရတာပေါ့၊ လက်နက်ကိုင်တပ်ဖွဲ့ အားလုံးက သေနတ်တွေကိုင် ကြတာကိုး။ တို့ ပြည်သူတွေက ဘာမှ မရှိဘူး၊ အရင်နေ့တွေမှာလည်း စစ်ကောင်စီ နဲ့ KIA တိုက်ပွဲ ဖြစ်ခဲ့တော့ အခုလို စစ်အင်အား ထပ်ဖြည့်တာ တိုက်ပွဲ ပိုပြင်းထန်လာနိုင်မလားပေါ့၊ အဲ့တာတွေလည်း ကြောက်ရတယ်” ဟု အသက် (၅၀) ဝန်းကျင် ဒေသခံ အမျိုးသားက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာလ ၁၆ ရက်နေ့တွင် သိန္နီမြို့နယ်၊ ကွန်ကောက်ကျေးရွာအုပ်စု၊ ဟိုနောင်ကျေးရွာ နှင့် ပိန်းကန်း ( ဝၢၼ်ႈပဵင်းၵၢင်း) ကျေးရွာကြား၌ စစ်ကောင်စီ နှင့် KIA တပ်တို့ ထိတွေ့တိုက်ပွဲ ပြင်းထန်ခဲ့ပြီး ဒေသခံ ၇၀ ကျော်ကလည်း စစ်ရှောင်နေရသည်။

ယနေ့အချိန်တွင် ပစ်ခတ်သံများ မကြားရသော်လည်း ကွန်ကောက်ကျေးရွာအုပ်စုအတွင်း စစ်ရေး တင်းမာမှု ရှိနေသေးသည့်အတွက် စစ်ရှောင်များ နေရပ်မပြန်နိုင်ကြသေးကြောင်း သိရသည်။

Leave a Comments

- Advertisement -spot_img

Latest article