သျှမ်းပြည် ရပ်စောက်မြို့နယ်အတွင်း မူးယစ်ဆေးဝါးသုံးစွဲသူဟု စွပ်စွဲခံရသည့် ဒေသခံ (၁၀) ဦးကျော် ပအိုဝ်းပြည်သူ့စစ်တပ်ဖွဲ့ (PNO) မှဖမ်းဆီးခေါ်ဆောင်သွားပြီး ပိုက်ဆံဖြင့် ပြန်လည်ရွေးခိုင်းခဲ့ကြောင်း စုံစမ်းသိရှိရသည်။
.
စက်တင်ဘာလအတွင်း ရပ်စောက်မြို့နယ် ယမ်းတွင်းငါးကြောင်ကျေးရွာအုပ်စုရှိ ဒေသခံများကို မူးယစ်ဆေးဝါးသုံးစွဲသူဟု စွပ်စွဲခံရသည့် ဒေသခံ ၁၀ ဦးကျော်ကို PNO တပ်ဖွဲ့မှ ဖမ်းဆီးခေါ်ဆောင်သွားခဲ့ပြီး ရိုက်နှက်စစ်ဆေးကာ တစ်ဦးကို ကျပ်ငွေ သိန်း ၃၀ မှ သိန်း ၄၀ အထိ ပြန်လည်ရွေးခိုင်းရကြောင်း ကျေးရွာဒေသခံ အမျိုးသားတစ်ဦးက ပြောသည်။
“ကျနော်တို့ ရွာမှာဆိုရင် ၁၀ ဦးတောင် မကတော့ဘူး။ ဒါတောင် တခြားရွာတွေ မပါသေးဘူး ဖမ်းသွားတာ။ တစ်ယောက်ကို သိန်း ၃၀၊ ၄၀ ပေးပြီး ပြန်လွတ်လာတယ်။ လူကို ရိုက်နှက်ပိုက်ဆံတွေတောင်းတယ်။ မပေးဘူးဆိုရင်လည်း ခြိမ်းခြောက်တယ်။ ဒီကောင်လေးကို သတ်ပစ်မယ်။ ဘာညာ ရှေ့တန်းကို ပို့ပစ်မယ်ဆိုပြီး ပြောတယ် “ ဟု ၎င်း အမျိုးသားတစ်ဦးက ပြောသည်။
ပအိုဝ်းပြည်သူ့စစ် PNO ဘက်မှ မူးယစ်ဆေးဝါးသုံးစွဲသူကို နှိမ်နင်းနေသည်ဟုဆိုသော်လည်း တစ်ဖက်တွင် မူးယစ်ဆေးဝါးသုံးစွဲခြင်းအကြောင်းပြပြီး ပိုက်ဆံတောင်းခံနေခြင်းဖြစ်ကြောင်း ၎င်းက ဆက်ပြောသည်။
လက်ရှိမှာ မူးယစ်ဆေးဝါး WY ဆေးပြား တစ်ပြားကို ကျပ်ငွေ ၂၅၀ ရှိရာ ကြက်ဉမှာတော့ ကျပ်ငွေ ၁ ထောင်ကို ၃ လုံးသာ ရရှိတော့သည်။
ယင်းကဲ့သို့ မူးယစ်ဆေးဝါး နှင့် ပတ်သက်ပြီး PNO တပ်မှ သုံးစွဲသူများကို လိုက်လံဖမ်းဆီး ဆောင်ရွက်ခဲ့သော်လည်း မူးယစ်ဆေးဝါးရောင်းချသူများကို ဖမ်းဆီး အရေးယူဆောင်ရွက်နိုင်ခြင်း မရှိပေ။
အလားတူ ယမ်းတွင်းငါးကြောင်ဒေသခံ တစ်ဦးက “ မူးယစ်ဆေးဝါးရောင်းတဲ့သူကိုတော့ သူတို့ မဖမ်းဘူး။ သူတို့တွေက အတူတူတွေပဲ။ တကယ့်တကယ် အကုန်ဖော်မယ်ဆိုရင်လည်း အကုန်လုံး မလွတ်ဘူးဖမ်းနိုင်တယ်။ ဒါကတော့ မူးယစ်ဆေးဝါးတိုက်ဖျက် နေတာတော့ မမြင်ဘူး။ ပိုက်ဆံရချင်လို့ လုပ်နေတာပဲ“ ဟု ၎င်းက ဆိုပြန်သည်။
ထို့အပြင် မူးယစ်ဆေးဝါးသုံးစွဲသူကို ဖမ်းဆီးရမိသည့်အထဲ ယခင်က (ပထမတစ်ကြိမ်၊ ဒုတိယတစ်ကြိမ်) ဖမ်းဆီးခံရသူများလည်း ပါဝင်ပြီး တစ်ကြိမ်ကို ကျပ် သိန်း ၃၀ မှ ကျပ်သိန်း ၄၀အထိ ပေးဆောင်ရန် မတတ်နိုင်၍ မိသားစုများကချေးငှားပြီး ပေးဆောင်ရကြောင်း ဆိုသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နေရာအနှံ့ မူးယစ်ဆေးဝါးများ ပိုမိုပေါများလာနေပြီး မူးယစ်ဆေး ဈေးကွက် ပိုကျယ်လာသလို ဈေးပေါလာသောကြောင့် မြို့နယ် ၁၀၀ အနက် ၉၄ မြို့နယ်တွင် ဆေးခြောက်ကို အလွယ်တကူ ဝယ်လို့ရနေကြောင်း ISP Myanmar ၏ စစ်တမ်းကောက်ထားချက်အရ သိရသည်။
စစ်တမ်းအရ ၈၉ မြို့နယ်တွင် WY ဆေးပြား နှင့် ခေါင်းခါဆေး ဟု လူသိများသည့် E ဆေးပြားများလည်း သုံးစွဲနေကြောင်း၊ ၅၃ မြို့နယ်တွင် ဘိန်းဖြူ နှင့် ကော်ရှူတာကို သုံးစွဲနေသည့်အဆင့် တတိယအများဆုံး ဖြစ်ကြောင်း ရေးသားဖော်ပြထားသည်။
