မြန်မာ – တရုတ်နယ်စပ် မူဆယ်မြို့နယ် ဝိန်းနန်းကျေးရွာအနီး စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့အကြား တိုက်ပွဲဆက်လက်ဖြစ်ပွားနေပြီး လက်နက်ကြီး၊ လက်နက်ငယ် ဖြင့် အဆက်မပြတ် ပစ်ခတ်နေကြောင်း စုံစမ်းသိရသည်။
.
ယနေ့ စက်တင်ဘာလ ၁၈ ရက် နေ့လည် ၃ နာရီမှစပြီး မူဆယ်မြို့နယ် ဝိန်းနန်းရွာ၏ တောင်ဘက်ရှိ တောင်ကုန်းပေါ်တွင် စစ်ကောင်စီတပ် နှင့် TNLA တို့အကြား တိုက်ပွဲဆက်လက်ဖြစ်ပွားနေပြီး နှစ်ဖက်တပ်ဖွဲ့ လက်နက်ကြီး၊ လက်နက်ငယ်ဖြင့် အဆက်မပြတ် ပစ်ခတ်ကာ တိုက်ပွဲပြင်းထန်နေကြောင်း ဒေသခံ အမျိုးသား တစ်ဦးကပြောသည်။
“ဒီနေ့ နေ့လယ်ပိုင်းကစပြီး စစ်ကောင်စီ နဲ့ TNLA တို့ တိုက်ပွဲပြန်ဖြစ်နေတယ်။ ဝိန်းနန်းရွာရဲ့ တောင်ဘက်က တောင်ကုန်းပေါ်မှာ ဖြစ်တာ။ လက်နက်ကြီး၊ လက်နက်ငယ်တွေနဲ့ အဆက်မပြတ် ပစ်ခတ်နေကြတာ“ ဟု ၎င်းအမျိုးသားတစ်ဦးက ပြောသည်။
အလားတူ စက်တင်ဘာလ ၁၇ ရက်တွင် ဝိန်းနန်းကျေးရွာအတွင်း စစ်ကောင်စီ နှင့် TNLA တပ်ဖွဲ့တို့ တိုက်ပွဲပြင်းထန်စွာ ဖြစ်ပွားခဲ့ပြီးနောက် နေအိမ်တစ်လုံးပေါ် လက်နက်ကြီး ကျရောက်ပေါက်ကွဲကာ ပျက်စီးသွားခဲ့သည်။
တိုက်ပွဲအတွင်း ထိခိုက်သေဆုံးမှုနှင့် ပတ်သက်ပြီး သျှမ်းသံတော်ဆင့်သတင်းဌာနမှ ဆက်လက်စုံစမ်းနေခြင်း ဖြစ်သည်။
ယနေ့ စက်တင်ဘာလ ၁၈ ရက် နံနက်ပိုင်း ၁၀ နာရီဝန်းကျင်တွင်လည်း မူဆယ်မြို့နယ် စန်းဆာရွာ တောင်ကုန်းပေါ် ရှိ စခန်းမှနေပြီး စစ်ကောင်စီတပ်သည် လက်နက်ကြီး ၆၀ မမဖြင့် စယ်လန့် လွိုင်တေးမိန်း၏ အရှေ့ဘက်ခြမ်းကို ဦးတည်၍ ပစ်ခတ်ခဲ့ကြောင်း ဆိုသည်။
ထို့အပြင် TNLA တပ်ဖွဲ့ လှုပ်ရှားနေလျက်ရှိသည့် စယ်လန့်၊ လွိုင်တေးမိန်း နှင့် မန့်ဝိန်းရွာအတွင်း နယ်မြေများကို စစ်ကောင်စီတပ်က ပြန်လည်ထိန်းချုပ်လိုသောကြောင့် အင်အား အလုံးအရင်းသုံးပြီး တိုက်ခိုက်နေကြောင်း ဒေသအတွင်း နယ်မြေကျွမ်းကျင်သူတစ်ဦးထံမှ သိရသည်။
Leave a Comments