မြန်မာ – တရုတ်နယ်စပ်ဒေသ မူဆယ်မြို့နယ် ၁၀၅ မိုင် နှင့် တိန်းလုံကျေးရွာအုပ်စုအတွင်း ယနေ့ နံနက်အစောပိုင်း အချိန်မှစပြီး စစ်ကောင်စီဘက်မှ တစ်ဖက်သတ် လက်နက်ကြီးဖြင့် အဆက်မပြတ် ရမ်းသမ်း ပစ်ခတ်နေကြောင်း စုံစမ်းသိရသည်။
.
ယနေ့ စက်တင်ဘာ (၁၈) ရက် နံနက် ၈ နာရီကျော် အချိန်မှစပြီး မူဆယ်မြို့နယ် ၁၀၅ မိုင် နှင့် တိန်းလုံကျေးရွာအုပ်စု စန်းဆာကျေးရွာရှိ တောင်ကုန်းမှနေပြီး စစ်ကောင်စီတပ်သည် လက်နက်ကြီးဖြင့် ၁၅ မိနစ် တစ်ကြိမ် ပစ်ခတ်နေကြောင်း မူဆယ်မြို့ ဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။
“ဒီနေ့တော့ မနက်အစောပိုင်းကတည်းက ကြားနေရတာ။ စန်းဆာရွာတောင်ကုန်းကနေပြီး ပစ်တယ်။ ၁၀ မိနစ်၊ ၁၅ မိနစ် တစ်ခါပစ်နေတာ ပေါက်ကွဲသံတွေ အဆက်မပြတ် ကြားနေရတယ်။ ပြီးတော့ ၁၀၅ မိုင်ဘက်ကနေလဲ ပစ်ခတ်သံတွေ အကျယ်ကြီးပဲ ကြားနေတယ်။ ဘယ်ကို သူတို့ ဦးတည်ပြီး ပစ်နေလဲ မသိရဘူး “ ဟု ၎င်းအမျိုးသားတစ်ဦးက ပြောသည်။
အလားတူ ယမန်နေ့ စက်တင်ဘာလ ၁၇ ရက်တွင် ဝိန်းနန်းကျေးရွာအတွင်း စစ်ကောင်စီ နှင့် TNLA တပ်ဖွဲ့တို့ တိုက်ပွဲပြင်းထန်စွာ ဖြစ်ပွားခဲ့ပြီးနောက် နေအိမ်တစ်လုံးပေါ် လက်နက်ကြီး ကျရောက်ပေါက်ကွဲကာ ပျက်စီးသွားခဲ့သည်။
ဝိန်းနန်းဒေသခံ အမျိုးသားတစ်ဦးက “တိုက်ပွဲကတော့ ဘယ်သူမဆို ဘယ်ကြိုက်မှာလဲဗျာ။ သူတို့အာဏာကို တော့ဘယ်ဖီဆန် နိုင်မလဲ။ ကျေးရွာအတွင်း လက်နက်ကိုင်တွေ ဝင်နေတာလဲ ဘယ်သူမှ မကြိုက်ဘူး။ တိုက်ပွဲဖြစ်လာရင် ကျနော်တို့ ပြည်သူတွေ ခံရတယ်။ ဘယ်သူမှလာပြီး တာဝန်မယူပေးဘူး “ ဟု ၎င်းက ဆိုပြန်သည်။
လက်ရှိမှာ မူဆယ်မြို့နယ်အတွင်း စစ်ကောင်စီတပ် နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့အကြား နှစ်ဖက်တပ်ဖွဲ့ စစ်ရေတင်းမာနေလျက်ရှိပြီး လက်နက်ကြီး ပစ်ခတ်သံ အဆက်မပြတ် ကြားနေရကာ အချိန်မရွေး တိုက်ပွဲပြန်လည်ဖြစ်ပွားနိုင်သည်။
Leave a Comments