သျှမ်းပြည် လွိုင်လင်ခရိုင်၊ လဲချားမြို့နယ်အတွင်း စစ်ကောင်စီ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ကြား စစ်ရေးငြိမ်သက်နေသော်လည်း နှစ်ဘက် ထုတ်ပြန်ထားသည့် အမိန့်များ ပြန်လည်ရုပ်သိမ်းပေးခြင်း မရှိသေးကြောင်း စုံစမ်းသိရသည်။
.
ပြီးခဲ့သည့် သြဂုတ်လ ၆ ရက် နံနက်ပိုင်းတွင် အာဏာသိမ်း စစ်ကောင်စီတပ် နှင့် SSPP/SSA တို့ လဲချားမြို့နယ်အတွင်း တိုက်ပွဲပြင်းထန်စွာ ဖြစ်ပွားခဲ့ပြီးနောက် သြဂုတ်လ ၇ ရက်တွင် စစ်ကောင်စီမှ ပြည်သူများ ည ၆ နာရီမှ မနက် ၆ နာရီထိ အပြင်ထွက်သွားလာခြင်း မပြုရန် ထုတ်ပြန်တားမြစ်ခဲ့သည်။
အဆိုပါ ထုတ်ပြန်တားမြစ်ချက်သည် ယနေ့အချိန်အထိ ရုတ်သိမ်းခြင်း မရှိသေးပေ။
“တိုက်ပွဲကတော့ မဖြစ်တော့ဘူး။ ဒါပေမယ့် သူတို့ ၂ ဖွဲ့ ထုတ်ပြန်ထားတဲ့ ည ၆နာရီကနေ မနက် ၆ နာရီအပြင်မထွက်ရ အမိန့်က မရုတ်သိမ်းသေးဘူး” ဟု လဲချားမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နှစ်ဖက်တပ် စစ်ရေးတင်းမာမှုလျော့ပါက ဒေသခံပြည်သူများ အသက်ရှူချောင်ကြောင်း၊ လယ်ယာကိုလည်း ကောင်းမွန်စွာ သွားနိုင်ပြီး ဝါတွင်းကာလအတွင်းလည်း ဘုန်းကြီးကျောင်းသွား ဥပုသ်စောင့်တည်နိုင်ကြောင်း ၎င်းက ပြောသည်။
“အခုက သေနတ်သံတွေလည်း မကြားရဘူး၊ စစ်ရေး တင်းမာမှုတွေလည်း ဖြေလျော့ကြပြီဆိုတော့ ကျနော်တို့ ဒေသခံတွေ သွားရေးလာရေးလည်း လွယ်ကူတာပေါ့၊ အရင် စစ်ရေးတင်းမာတုန်းကဆို အိမ်ထဲက အိမ်ပြင် မထွက်ရဲကြဘူး” ဟု လဲချားမြို့ ဒေသခံ တစ်ဦးက ထပ်လောင်းပြောသည်။
ထို့ပြင် စစ်ကောင်စီတပ်တို့သည် ပင်လုံမြို့ဘက်မှ လွိုင်ခန် (လွႆၶၢင်) တွင် တစ်နေရာ၊ မက်လန်းကျေးရွာ အနီးတွင် တစ်နေရာ နှင့် မိုင်းနောင်ဘက်သွားသည့် လမ်းတွင် တစ်နေရာ စစ်ဆေးရေးဂိတ် ထားရှိကြောင်းလည်း သိရသည်။
လက်ရှိ လဲချားမြို့နယ်အတွင်း စစ်ရေး အခြေအနေများ နှင့် ပတ်သက်ပြီး SSPP/SSA ၏ မြေပြင် အရာရှိ တစ်ဉီးက “တိုက်ပွဲဖြစ်ပြီးကတည်းက အချင်းချင်း စစ်ရေးအခြေအနေ စောင့်ကြည့်မှုတော့ ရှိပါတယ် ၊ သူတို့အပိုင်း သူတို့ဘာသာနေ နေရင်တော့ ကောင်းပါတယ်၊ အချင်းချင်း စောင့်ကြည့်နေရတဲ့ အနေအထားပါ” ဟု သျှမ်းသံတော်ဆင့်ကို ပြောသည်။
လဲချား ဒေသခံပြည်သူများ အနေဖြင့် ဆက်လက်ပြီး ပစ်ခတ်တိုက်ပွဲ မရှိကြစေလိုကြောင်း၊ ပစ်ခတ်သံများလည်းမကြားလိုကြောင်း နှင့် သီတင်းကျွတ်ကာလအထိ လွတ်လွတ်လပ်လပ် သွားလာ လှူဒါန်းနိုင်ကြစေလိုကြောင်း ပြောဆို ထားကြသည်။
“တိုက်ပွဲထပ်ဖြစ်မှာကိုတော့ ကြောက်တာပေ့ါ။ အခုလို အေးချမ်းနေတာပဲ ကောင်းပါတယ်၊ ဝါထွက်ပြီးရင် ယူရမယ့် ကောက်ပဲ သီးနှံတွေ ၊ စပါးတွေ အိမ်ရောက်မှ စိတ်ချမ်းသာရမှာလေ၊ တိုက်ပွဲဖြစ်ရင်တော့ အဲ့တာတွေ မယူရဘူးပေါ့၊ ဒါကြောင့် တိုက်ပွဲကတော့ မဖြစ်စေချင်တော့ဘူး” ဟု လဲချားမြို့ အသက် ၃၅ နှစ်အရွယ် ဒေသခံ အမျိုးသား က ဆိုပြန်သည်။
လဲချားမြို့အတွင်း စစ်ကောင်စီ နှင့် SSPP/SSA တို့ တိုက်ပွဲဖြစ်ပွားပြီးနောက်ပိုင်း လယ်ယာအတွင်း မြေမြှုပ်မိုင်းများ တည်ရှိနေသဖြင့် ပြည်သူများ လယ်ယာသို့ သွားရန် စိုးရိမ်မှုရှိကာ လွန်ခဲ့သည့် သြဂုတ်လ ၂၁ ရက်တွင် နွား ၂ ကောင် မြေမြှုပ်မိုင်းနင်းမိသဖြင့် နွားမွေးမြူသည့် ပြည်သူများလည်း နွားများ မိုင်းနင်းမိမှာကို စိုးရိမ်နေကြသည်။
