သျှမ်းပြည် ကွတ်ခိုင်မြို့နယ်၊ မုံးစီးကျေးရွာ အတွင်း၌ လက်လုပ်ဗုံး တစ်လုံး ပေါက်ကွဲမှု ဖြစ်ပွားခဲ့ကြောင်း စုံစမ်းသိရသည်။
.
ယမန်နေ့ (စက်တင်ဘာလ ၁၄ ) ရက် နံနက်ပိုင်း ၁၁ နာရီဝန်းကျင်တွင် မုံးစီးကျေးရွာရှိ ရေကန်အနီးတွင် လက်လုပ်ဗုံးတစ်လုံး ပေါက်ကွဲခဲ့ပြီး ထိခိုက်ဒဏ်ရာရရှိသူ မရှိကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကိုပြောသည်။
“လုပ်တဲ့သူကိုတော့ မသိရဘူး၊ ပေါက်ကွဲသံ တစ်ချက် ကျယ်ကျယ် ကြားလိုက်ရတာ၊ အဖွဲ့အစည်း တခုခုက ခြိမ်းခြောက်တဲ့ အနေနဲ့ ဒီလိုလုပ်တာ ထင်တယ်၊ လူထိခိုက်မှုတော့ မရှိဘူး” ဟု မုံးစီးကျေးရွာ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ဗုံးပေါက်ကွဲမှု ဖြစ်ပွားပြီးသည့်နောက်တွင် မုံးစီးပြည်သူ့စစ်တပ်ဖွဲ့မှ တာဝန်ရှိသူများ သွားရောက်စစ်ဆေးခဲ့သော်လည်း အသေးစိတ်ကို မသိရသေးကြောင်း သျှမ်းသံတော်ဆင့်ကို ပြောသည်။
မုံးစီးကျေးရွာအတွင်း ဗုံး၊ မိုင်း ပေါက်ကွဲမှုများသည် ဖြစ်လေ့ဖြစ်ထ မရှိသည့်အတွက် ယခု ဗုံးပေါက်ကွဲမှု နှင့် ပတ်သက်ပြီး ဒေသခံများက သွားလာလှုပ်ရှားရန် စိုးရိမ်နေရကြောင်းလည်း အထက်ပါ ပုဂ္ဂိုလ်က ဆက်ပြောသည်။
“မုံးစီးပြည်သူ့စစ်တပ်ဖွဲ့က သွားစစ်ဆေးတဲ့အချိန်မှာ ဝါယာကြိုးတွေ၊ ဘက်ထရီအိုးလိုမျိုးကို အသုံးပြုပြီး လုပ်ထားတဲ့ ဗုံးဖြစ်တာ တွေ့ရတယ်၊ ဒီလိုမျိုးက ကျနော်တို့ ဒေသထဲမှာ ဖြစ်လေ့ဖြစ်ထ မရှိတော့ ကြောက်ကြတာပေ့ါ၊ အဓိက ကတော့ သက်ကြီးပိုင်းတွေက စိုးရိမ်မှု ပိုရှိတာပေါ့နော်၊ တခြားဘယ်နေရာ ထပ်ပေါက်ကွဲမလဲ မသိဘူးလေ” ဟု အထက်ပါ ပုဂ္ဂိုလ်က ဆက်ပြောသည်။
ယင်းကဲ့သို့ ဗုံးပေါက်ကွဲမှု နှင့် ပတ်သက်ပြီး လက်နက်ကိုင် အဖွဲ့အစည်း တစ်ခုခုမှ အခွန် ၊ ဆက်ကြေး ပေးဆောင်ရန် ခြိမ်းခြောက်မှုလည်း ဖြစ်နိုင်ကြောင်း မုံးစီး ဒေသခံများက ပြောဆို သုံးသပ်နေကြသည်။
မုံးစီးကျေးရွာအတွင်း သွားလာလှုပ်ရှားသည့် လက်နက်ကိုင် တပ်ဖွဲ့များ အနေဖြင့် မုံးစီးပြည်သူ့စစ်တပ်ဖွဲ့ အပြင်၊ SSPP/SSA တပ်ဖွဲ့၊ TNLA တပ်ဖွဲ့၊ MNDAA တပ်ဖွဲ့ နှင့် KIA တပ်ဖွဲ့တို့ကလည်း သွားလာလှုပ်ရှားလေ့ရှိကြောင်း သိရသည်။
Leave a Comments