သျှမ်းပြည် လားရှိုးမြို့နယ်တွင် ယနေ့ (စက်တင်ဘာလ ၁၄) ရက် နံနက်အစောပိုင်း အချိန်မှစပြီး မိုးသည်းထန်စွာ ရွာသွန်းမှုကြောင့် ရေကြီးရေလျှံမှုဖြစ်ပြီး အုတ်တံတိုင်း ပြိုကျခြင်းကြောင့် အမျိုးသား ၁ ဦး သေဆုံးခဲ့ကြောင်း စုံစမ်းသိရသည်။
ယနေ့ (စက်တင်ဘာလ ၁၄) ရက် နံနက် ၂ နာရီအချိန်မှစပြီး မိုးသည်းထန်စွာ ရွာသွန်းမှုကြောင့် လားရှိုးမြို့နယ် အတွင်း ရေကြီးရေလျှံ ဖြစ်ပွားခဲ့ပြီး ရပ်ကွက် ၅ အတွင်းရှိ လူနေအိမ်တစ်လုံးပေါ် အုတ်တံတိုင်းပြိုကျကာ အိမ်ထဲမှ အသက် ၃၀ နှစ်အရွယ် အမျိုးသား ၁ ဦး သေဆုံးခဲ့သည်။
“အုတ်တံတိုင်း ပြိုကျပြီး နေအိမ်ပေါ်ပိမိတာ။ အိမ်ထဲက အုတ်ပိမိပြီး သေဆုံးတဲ့သူကိုလည်း အုတ်ပုံ အောက်ကနေ ဆွဲထုတ်ကူညီခဲ့တယ် “ ဟု ၎င်းကို သွားရောက်ကူညီခဲ့သည့် လားရှိုးလူငယ်များ လူမှုကူညီရေး အသင်းမှ လူမှုကွန်ရက်ပေါ်၌ ရေးသားဖော်ပြထားသည်။
အလားတူ တောင်ကျရေများ စီးဆင်းလာမှုကြောင့် လားရှိုးမြို့ ရပ်ကွက် ၅ အပါအဝင် ရပ်ကွက် ၆ ၊ ၇ ၊ ၈၊ ၁၂ အတွင်းရှိ နေအိမ်ထဲ ရေများစီးဝင်ပြီး အိမ်အတွင်း လူပိတ်မိသည့် အခြေအနေများလည်း ဖြစ်ပေါ်ခဲ့သည်။
ထိုသို့ ရေကြီးရေလျှံဖြစ်ပွားပြီးနောက် နံနက် ၇ နာရီခွဲအချိန်တွင် ရေပြန်လည်ကျဆင်းသွားခဲ့ပြီး ရေစီးဝင်ခံရသည့် နေအိမ်များမှ ပြည်သူအချို့သည် ပစ္စည်းများ သယ်ယူရွှေ့ပြောင်းခြင်း ပြုလုပ်နေကြောင်း သိရသည်။
လားရှိုးမြို့ ဒေသခံ အသက် ၃၀ ကျော် အမျိုးသားတစ်ဦးက “အဓိကတော့ မိုးတအားရွာလို့ ဖြစ်တာ။ ပြီးတော့ အခုမြို့ပေါ်မှာ အိမ်ခြေများလာတာ နဲ့အတူ အိမ်တိုင်းလိုလို တမံတလင်း ခင်းကျတာပေါ့။ မိုးရွာရင် ရေကမြေကြီးထဲ မစိမ့်ဝင်နိုင်တော့ဘူး။ နောက်ပြီး အမှိုက်ကို စနစ်တကျ မစွန့်ပစ်လို့ မြောင်းတွေပိတ်တာကော၊ တောင်ပေါ်မှာ ပြောင်းတွေစိုက်ကြပြီး ဓာတုပစ္စည်းအရမ်းသုံးလို့ မြေကြီးပျက်စီးတာ၊ ရေဆုပ်နိုင်စွမ်း မရှိတော့တာတွေပေါ့ “ဟု ၎င်းကဆိုပြန်သည်။
ထို့အပြင် လားရှိုးမြို့နယ်တွင် မိုးသည်းထန်စွာရွာသွန်းပါက နှစ်စဉ်နှစ်တိုင်း ရေကြီးရေလျှံမှုဖြစ်ပွားနေလျက်ရှိပြီး သက်ဆိုင်ရာ အာဏာပိုင်များက ရေနုတ်မြောင်း ပြုပြင်ပေးခြင်း၊ ရေကြီးမှု ပြသာနာများကို လေ့လာဆောင်ရွက် ပေးခြင်း အားနည်းကာ အဆိုပါ ရေကြီးရေလျှံမှု ဖြစ်ပွားလာလျှင် လူမှုကူညီရေးအသင်းများသာ အားကိုးနေရကြောင်း ဒေသခံများကဆိုသည်။
