သျှမ်းပြည် မူဆယ်မြို့နယ် စယ်လန့်ကျေးရွာအတွင်း တိုက်ပွဲဖြစ်ပွားပြီးနောက် ကျေးရွာဘုန်းကြီးကျောင်း အပါအဝင် စာသင်ကျောင်း၊ နေအိမ် စုစုပေါင်း ၁၀ လုံး ပျက်စီးခဲ့ကြောင်း စုံစမ်းသိရသည်။
.
ပြီးခဲ့သည့် သြဂုတ် ၂၈ ရက်မှစပြီး စယ်လန့်ကျေးရွာအတွင်း စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့အကြား တိုက်ပွဲပြင်းထန်စွာ ဖြစ်ပွားခဲ့ခြင်းကြောင့် အရပ်သား ၂ ဦးပြင်းထန်စွာ ဒဏ်ရာရရှိခဲ့ပြီး၊ ဘုန်းကြီးကျောင်း၊ စာသင်ကျောင်း နှင့် နေအိမ် ၆ လုံး ထိခိုက်ပျက်စီးခဲ့ကြောင်း စယ်လန့်ဒေသခံ အမျိုးသားတစ်ဦးက ပြောသည်။
“တိုက်ပွဲကြောင့် နေအိမ်တစ်လုံး မီးလောင် ပြာကျသွားတယ်။ လယ်ထွန်စက်၊ ကား၊ ထော်လာဂျီ၊ သုံးဘီးတွေကောမီးထဲပါသွားတယ်။ စုစုပေါင်း ကျပ်သိန်း ၃၀၀ လောက် တန်ဖိုးရှိတယ်။ ပြီးတော့ လွိုင်တေးမိန်းဘက်က ကျောင်းတွေကောပါတယ်။ အဲ့ဒီ နေရာတွေက စာသင်တဲ့နေရာတွေ“ ဟု ၎င်း အမျိုးသားက ပြောသည်။
အဆိုပါ တိုက်ပွဲကြောင့် မီးလောင်ပျက်စီးသွားသည့် ဘုန်းကြီးကျောင်း၊ စာသင်ကျောင်း နှင့် နေအိမ်များကို မည်သည့် လက်နက်ကိုင်တပ်ဖွဲ့များမှ တာဝန်ယူပြီး ဖြေရှင်းပေးခြင်း မရှိပေ။
အလားတူ လက်နက်ကြီး ကျရောက်ပေါက်ကွဲမှုကြောင့် ပျက်စီးသွားသည့် စယ်လန့် (အထက) စာသင်ကျောင်းသည်လည်း လက်ရှိ ပြန်လည် ဖွင့်လှစ်၍ မရသေးသလို မပေါက်ကွဲသေးသည့် လက်နက်ကြီးများလည်း တွေ့ရှိနေကြောင်း သိရသည်။
“စယ်လန့်က ကလေးတွေတော့ အခုထိ ကျောင်းမှာ ပြန်တက်လို့ မရသေးဘူး။ ဘုန်းကြီးကျောင်းက ဇရပ်မှာ ရွှေ့ပြီးစာသင်ရတယ်။ ဘာလို့လဲဆို အခုထိ ကျောင်းမှာက မပေါက်ကွဲသေးတဲ့ လက်နက်ကြီးတွေလည်း တွေ့သေးတယ်။ တိုက်ပွဲဖြစ်တုန်းက စစ်ကောင်စီ နဲ့ မြို့မပြည်သူ့စစ်တွေက လာနေတာ။ လက်နက်ကြီးကြောင့် အခု ကျောင်းဆောင်က တော်တော်လေး ပျက်စီးနေတယ် “ ဟု စယ်လန့်ဒေသခံ တစ်ဦးက ဆက်ပြောသည်။
လက်ရှိမှာ ပျက်စီးသွားသည့် အဆောက်အအုံများကို တိုက်ပွဲအတွင်း စစ်ကောင်စီတပ် နှင့် TNLA တပ်တို့အနေဖြင့် တာဝန်ယူပြီး နစ်နာသူများထံ လျော်ကြေးပြန်ပေးစေလိုကြောင်း စယ်လန့်ပြည်သူများက တောင်းဆိုနေသည်။
