သျှမ်းပြည် မိုင်းကိုင်မြို့နယ် အသက် ၂၀ နှစ်ကျော် အမျိုးသမီးတစ်ဦးသည် ဆိုင်ကယ်ဖြင့် အိမ်သို့အပြန်လမ်း၌ လုယက်ခံရပြီး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
.
ဖြစ်စဉ်မှာ ယမန်နေ့ (စက်တင်ဘာလ ၅ ) ရက် နံနက် ၇ နာရီဝန်းကျင်တွင် အသက် ၂၀ နှစ်ကျော် အမျိုးသမီးတစ်ဦးသည် မိုင်းကိုင်မြို့နယ် တုံလောကျေးရွာအုပ်စုရှိ သင်တန်းတစ်ခုကို သွားတက်ရောက်ခဲ့ပြီးနောက် ဆိုင်ကယ်ဖြင့် အိမ်သို့အပြန် ပန်ပွဲရွာ၌ အမည်မသိ အမျိုးသားတစ်ဦးက သူမ၏ ဆိုင်ကယ်ကို တားလိုက်သည်။
ထို့နောက် သူမကို ချောင်း ကမ်းဘေးရှိ တံတားတစ်ခုအောက်သို့ ဆွဲခေါ်သွားပြီး ရိုက်နှိက်၊ လည်ပင်းညှစ်ကာ ပစ္စည်းများ နှင့် ဆိုင်ကယ်တစ်စီး စုစုပေါင်း ကျပ်ငွေ ၁၀ သိန်းရှိ တန်ဖိုးများ ယူဆောင်ထွက်ပြေးသွားကြောင်း ၎င်းနှင့် နီးစပ်သူ ဒေသခံ တစ်ဦးက ပြောသည်။
“သူ သင်တန်းသွားပြီး ပြန်လာတာ။ လမ်းမှာ အမျိုးသားတစ်ယောက်က ပြောင်းဖူးခြံထဲက ထွက်လာပြီး သူ့ဆိုင်ကယ်ကို တားလိုက်တာ။ ပြီးတော့ သူ့ကို ချောင်းဘေးတစ်ခုက တံတားအောက်မှာ ဆွဲခေါ်သွားတာ။ သူ့ကို ရိုက်တယ်။ လည်ပင်းကို ညှစ်တာ သူလည်း မေ့လဲသွားတယ် “ ဟု ၎င်း ဒေသခံတစ်ဦးက ပြောသည်။
လက်ရှိမှာ ထိခိုက်ဒဏ်ရာရသည့် အသက် ၂၀ နှစ်ကျော် အမျိုးသမီးတစ်ဦးကို တုံလောကျေးရွာအုပ်စုရှိ ဆေးပေးခန်းသို့ ပို့ဆောင်ထားပြီး ဆေးဝါးကုသမှု ခံယူနေလျက်ရှိသည်။
အဆိုပါ အမျိုးသမီးသည် ပြင်းထန်စွာ လည်ပင်းညှစ်ခံထားရသော ဒဏ်ရာကြောင့် ယခုတွင် ရေသောက်၊ အစာစားရာမှာ မျိုချလျှင် နာကျင်နေပြီး တံထွေး ထွေးထုတ်ပါက သွေးများပါနေကြောင်း ဆိုသည်။
ယင်းကဲ့သို့ လုယက်ခံရမှု နှင့် ပတ်သက်ပြီး သက်ဆိုင်ရာ အာဏာပိုင်များက ဖမ်းဆီးဆောင်ရွက်ပေးခြင်း တစ်စုံတစ်ခု မရှိကြောင်း၊ ပြည်သူများသည် အပြင်သို့လာသွားလျှင် သတိထားပြီး သွားနေရကာ လုံခြုံရေး မရှိတော့ကြောင်း ဒေသခံများက ပြောသည်။
အလားတူ ယနေ့ စက်တင်ဘာလ ၆ ရက် နံနက်အစောပိုင်းတွင်လည်း သီပေါမြို့မဈေးထဲရှိ ရတနာရွှေဆိုင်တစ်ခု သည် ဓားပြတိုက်ခံရပြီး ရွှေ ၃ ကျပ်သားပါသွားသည်။
