သျှမ်းပြည် မူဆယ်ခရိုင်၊ မူဆယ်မြို့နယ်၊ စယ်လန့်ကျေးရွာအုပ်စုမှ စစ်ရှောင်ထွက်ပြေးနေရသည့် ကိုယ်ဝန်သည်
မိခင် (၃) ဦး မီးဖွားရန်အတွက် အကူအညီများ လိုအပ်နေကြောင်း စုံစမ်းသိရသည်။

.

မူဆယ်မြို့နယ် ၊ စွမ်စော် ရပ်ကွက် ၊ အမှတ် (၁) လမ်းဘက်ရှိ စစ်ရှောင်လာသည့် ကိုယ်ဝန်သည် မိခင် တစ်ဦး နှင့် နောက်ထပ် မွေးဖွားခါစ ကိုယ်ဝန်သည် မိခင် (၂) ဦးတို့က မွေးဖွားစရိတ် နှင့် ကျန်းမာရေး စောင့်ရှောက်မှု အကူအညီများ လိုအပ်နေကြောင်း စစ်ရှောင်ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

“စွမ်စော် (၁) လမ်းဘက်မှာ ရှိနေတဲ့ စစ်ရှောင်ကိုယ်ဝန်ဆောင် အမျိုးသမီးကတော့ ဒီတစ်ပတ် မဟုတ်လည်း နောက်အပတ်ထဲမှာ မွေးမှာသေချာတယ်။ ဒါပေမဲ့ စစ်ရှောင်လာတုန်းက ဒီအတိုင်း ထွက်လာတော့ ဘာပစ္စည်းမှ မယူဖြစ်ခဲ့ဘူးတဲ့၊ ငွေကြေးလည်း သိပ်မတတ်နိုင်တော့ ဆရာဝန်ဆီလည်း ကိုယ်ဝန် မအပ်နိုင်သေးဘူး” ဟု စစ်ရှောင်ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

နောက်ထပ် ကိုယ်ဝန်သည် အမျိုးသမီး နှစ်ဦးမှာလည်း ကိုယ်ဝန်သက်တမ်း ၉ လထဲ ရောက်ရှိလာပြီ ဖြစ်သည့် အတွက် မွေးဖွားရမည့် နေ့ရက်နီးနေပြီ ဖြစ်ကြောင်း စစ်ရှောင်ကူညီပေးသူက သျှမ်းသံတော်ဆင့်ကို ဆက်ပြောသည်။

အဆိုပါ ကိုယ်ဝန်သည် မိခင် စစ်ရှောင်အမျိုးသမီးများသည် ပြီးခဲ့သည့် သြဂုတ်လ ၂၈ ရက်နေ့မှ စတင်ပြီး အာဏာသိမ်း စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော်တို့ စယ်လန့်ကျေးရွာ အနီး တိုက်ပွဲပြင်းထန်မှုကြောင့် ထွက်ပြေးလာရသူများဖြစ်သည်။

လက်ရှိတွင် ကိုယ်ဝန်သည်မိခင်များအတွက် ကျန်းမာရေး စောင့်ရှောက်မှုများ လိုအပ်သည့်အပြင် မွေးဖွားလာမည့် ကလေးငယ်အတွက် ကလေးအနှီး၊ အဝတ်အထည်၊ နို့ဗူး နှင့် ဆေးဝါးများအတွက်လည်း အကူအညီ လိုအပ်နေကြောင်း စစ်ရှောင်ကူညီသူက ပြောသည်။

“ဒီမှာတော့ ကလေးအနှီးကအစ ဆေးဝါးတွေလည်း မရှိထားဘူး၊ အခုချိန်မှာ ကုန်ဈေးနှုန်းလည်း ကြီးတော့ ကုန်ကျစရိတ်တွေတော့ တော်တော်ကုန်မှာ၊ တစ်ယောက်စာအတွက် အနည်းဆုံး ၅ သိန်းလောက်တော့ ကုန်မှာ၊ ဒါတောင် ရိုးရိုးမွေးမှာနော်၊ ခွဲမွေးရင်တော့ ပိုကုန်တာပေါ့၊ သူတို့လေးတွေအတွက်ကူညီပေးမယ့်သူတွေ ရှိလာရင် သိပ်ကောင်းမယ်” ဟု စစ်ရှောင်များကို ကူညီပေးနေသူက ပြောသည်။

ပြီးခဲ့သည့် သြဂုတ်လ ၃၁ ရက်နေ့တွင်လည်း စယ်လန့်ကျေးရွာမှ မူဆယ်မြို့ပေါ်သို့ စစ်ရှောင်ထွက်ပြေးလာသည့် ကိုယ်ဝန်သည် မိခင်တစ်ဦးလည်း မီးဖွားရန် ခက်ခဲသည့်တွက် လူမှုကူညီရေး အသင်းမှ အရေးပေါ် ဆေးရုံသို့ ပို့ဆောင်ပေးရပြီး၊ ခွဲမွေးခဲ့ရကြောင်းလည်း သိရသည်။

လက်ရှိတွင် မူဆယ်မြို့ပေါ် စစ်ရှောင်ထွက်ပြေးလာသည့် စယ်လန့်ဒေသခံများသည် ဟိုနားရပ်ကွက်တွင် (၂၃၀) ဦး၊ စွမ်စော်ရပ်ကွက်တွင် (၁၆၀) ဦး ၊ မန်ကန်ရွာတွင် (၂၉၀) ဦး နှင့် နမ့်စန့် (တုန်ခွမ်) ကျေးရွာဇရပ်တွင် (၄၃၀) ဦး နှင့် စာရင်းမသိရသေးသည့် စစ်ရှောင်လည်း ရှိနိုင်ကြောင်း သိရသည်။