သျှမ်းပြည် ကွတ်ခိုင်မြို့နယ် မိုင်းယုကျေးရွာအတွင်း စစ်ကောင်စီ၏ လက်နက်ကြီးများ ကျပေါက်ကွဲမှုကြောင့် နေအိမ်များ နှင့် အိမ်မွေးတိရိစ္ဆာန်များ ထိခိုက်သေဆုံးမှုရှိခဲ့ကြောင်း စုံစမ်းသိရသည်။
.
ယမန်နေ့ (စက်တင်ဘာလ ၅ ရက်) ည ၁၀ ဝန်းကျင်တွင် တိုက်ပွဲဖြစ်ပွားခြင်းမရှိဘဲ ကွတ်ခိုင်မြို့နယ် နမ့်ခိုင်တံတားရှိ စစ်ကောင်စီတပ်မှ ပစ်ခတ်လိုက်သော လက်နက်ကြီးများသည် မိုင်းယုကျေးရွာ အတွင်းရှိ နေအိမ်များပေါ်သို့ ကျပေါက်ကွဲပြီး နေအိမ် ၅ လုံးထက်မနည်း ပျက်စီးကာ ဝက် ၄ ကောင် သေဆုံးခဲ့ကြောင်း မိုင်းယုဒေသခံ အမျိုးသားတစ်ဦး ကပြောသည်။
“မနေ့ ညက လူအိပ်ချိန်ဆိုတော့ ဘယ်သူမှ ထမကြည့်ရဲဘူး။ လက်နက်ကြီးတွေက ၁၅ လုံးလောက် ရှိတယ်။ အိမ်တောင်လှုပ်တယ်။ တချို့မြေပြင်ပေါ်မှာ မကျဘဲ ကောင်းကင်ပေါ်မှာ ပေါက်ကွဲတာလည်း ရှိသေးတယ်။ မနေ့ ညတစ်ညလုံး ကြောက်နေရတာတော့မပြောနဲ့ ကြောက်ပြီးအော်ငိုကြတာ “ ဟု ၎င်း အမျိုးသားတစ်ဦးက ပြောသည်။
အဆိုပါ ကျေးရွာအတွင်း လက်နက်ကြီးများ ကျပေါက်ကွဲမှုကြောင့် အသက် ၇၀ နှစ်ကျော် အဖွားတစ်ဦး နှလုံးရပ်မတန့် ဖြစ်ခဲ့သည်။
ထို့အပြင် စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ ကျေးရွာထဲကို ရည်ရွယ်ချက်ရှိရှိ နှင့် လက်နက်ကြီးများဖြင့် ပစ်ခတ်ခဲ့တာဖြစ်ပြီး တိုင်းရင်းသားလက်နက်ကိုင်တချို့သည်လည်း ကျေးရွာအတွင်း လှုပ်ရှားနေထိုင်လျက်ရှိကြောင်း ဒေသခံများ၏ ပြောပြချက်အရ သိရသည်။
“ဖြစ်ချင်တာတော့ လက်နက်ကိုင်တပ်ဖွဲ့ တစ်ဖွဲ့နဲ့ တစ်ဖွဲ့ ပြဿနာဖြစ်ရင် ကျေးရွာထဲမှာ လာမနေဖို့ တောင်းဆိုချင်တယ်။ ဖြစ်လာရင် ကျနော်တို့ ပြည်သူတွေပဲ ထိခိုက်တာ။ ပြည်သူတွေပဲ နစ်နာတယ် “ ဟု အသက် ၃၀ နှစ်ကျော် ဒေသခံ အမျိုးသားတစ်ဦးက တောင်းဆိုသည်။
ကွတ်ခိုင်မြို့နယ် မိုင်းယုကျေးရွာအတွင်း တိုင်းရင်းသားလက်နက်ကိုင်များ ဖြစ်သည့် တ
အာင်း (ပလောင်) အမျိုးသား လွတ်မြောက်ရေးတပ်မတော် (TNLA) နှင့် ကချင်လွတ်လပ်ရေးတပ်မတော် (KIA) တို့ လှုပ်ရှားနေသည့် နယ်မြေဖြစ်သည်။
မိုင်းယုကျေးရွာသည် နေအိမ်စုစုပေါင်း ၁၈၀ ကျော်ရှိပြီး နမ့်ခိုင်ရွာ နှင့် ၁ မိုင် ကွာဝေးကာ ကွတ်ခိုင်မြို့နှင့် ၁၉ မိုင်ခန့် ကွာဝေးသည်။
