သျှမ်းပြည် မူဆယ်မြို့နယ်၊ နမ့်အုမ် (ဝၢၼ်ႈၼမ့်ဢုမ်) ကျေးရွာ နှင့် ခိုမုန်းကျေးရွာတို့မှ စစ်ရှောင်နေရသည့် ဒေသခံများသည် ယနေ့အထိ နေရပ်မပြန်နိုင်သေးကြောင်း စုံစမ်းသိရသည်။
.
အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ ထိတွေ့တိုက်ပွဲကြောင့် စစ်ရှောင်ထွက်ပြေးရသည့် ကျေးရွာ နှစ်ရွာမှ ဒေသခံ (၁၅၀) ကျော်တို့သည် ယနေ့ အချိန်အထိ နေရပ်မပြန်နိုင်သေးကြောင်း စစ်ရှောင်ကူညီသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ပစ်ခတ်တာတော့ မရှိတော့ဘူး၊ အသံတွေ ငြိမ်သွားပေမဲ့ စစ်ရှောင်တွေက နေရပ်မပြန်နိုင်သေးဘူး၊ စုစုပေါင်း (၁၅၀) ကျော်တော့ ရှိမယ်ထင်တယ်။ တစ်နေရာတည်း စုနေနေတာမျိုးလည်း မဟုတ်တော့ အတိအကျလည်း စာရင်းမရှိဘူး။ မူဆယ်မြို့ပေါ် နေတယ်၊ ခိုမုန်းဘုရားကျောင်းမှာလည်း ရှိနေတယ်” ဟု စစ်ရှောင်ကူညီသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နှစ်ဖက် ပစ်ခတ်မှု ငြိမ်သက်သော်လည်း TNLA တပ်မှ နမ့်အုမ်ကျေးရွာရှိ ဇိနမာန်အောင် ကျောင်းတိုက်တွင် နေရာယူ တပ်စွဲထားသလို၊ စစ်ကောင်စီတပ်မှလည်း လက်နက်ကြီးဖြင့် ရံဖန်ရံခါ ပစ်ခတ်မှု ရှိနေကြောင်းလည်း သိရသည်။
ပြီးခဲ့သည့် စက်တင်ဘာလ ၁ ရက်တွင် နမ့်အုမ်ကျေးရွာအနီး စစ်ကောင်စီတပ် နှင့် TNLA တပ်တို့ တိုက်ပွဲပြင်းထန်စွာ ဖြစ်ပွားခဲ့ပြီး နမ့်အုမ်ကျေးရွာ ဇိနမာန်အောင်ကျောင်း တောင်ခြေရှိ နေအိမ်တစ်လုံးကိုလည်း လက်နက်ကြီး ထိမှန်ပျက်စီးရကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အိမ်ခေါင်မိုးပေါ်တည့်တည့်ကျတာ၊ အဲ့ဒီအိမ်ရှင် မိသားစုကလည်း စစ်ရှောင်ထွက်ပြေးနေရတယ်၊ အခုချိန်ထိ ပြန်မလာကြသေးဘူး၊ ခိုမုန်းရွာထဲမှာ လက်နက်ကြီးထိ ပျက်စီးတဲ့ အိမ် ၃ လုံးထက် မနည်းဘူး” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ် နှင့် TNLA တပ်တို့၏ စစ်ရေး တင်းမာမှုကြောင့် မူဆယ်မြို့နယ် စယ်လန့်ကျေးရွာမှ ဒေသခံ ၆၀၀ ကျော်ကလည်း စစ်ရှောင်ထွက်ပြေးရပြီး ယနေ့ အချိန်အထိ နေရပ်မပြန်နိုင်သေးကြောင်း သိရသည်။
TNLA နှင့် စစ်ကောင်စီတပ်တို့သည် ပြီးခဲ့သည့် ဇူလိုင်လ ကုန်ပိုင်းမှ စတင်ပြီး မူဆယ်မြို့နယ်အတွင်း စစ်ရေးတင်းမာမှု စတင်ခဲ့ရာ ယနေ့အချိန်ထိ တစ်လကျော်ကြာခဲ့ပြီ ဖြစ်သည်။
