သျှမ်းပြည် မူဆယ်မြို့နယ်၊ စယ်လန့်ကျေးရွာအုပ်စုအတွင်း၌ အာဏာသိမ်း စစ်ကောင်စီတပ်ဖွဲ့ နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တပ်တို့က အပြိုင်အဆိုင် နေရာယူထားပြီး စစ်ရေးတင်းမာနေဆဲ ဖြစ်ကြောင်း သိရသည်။
.
လက်ရှိတွင် စယ်လန့်ကျေးရွာအုပ်စုအတွင်းရှိ စောမွန်လှကျောင်း၌ TNLA က တပ်စွဲ နေရာယူထားပြီး၊ စယ်လန့်အထက်တန်းကျောင်း အထက ကျောင်းဝန်းအနီး၌ အာဏာသိမ်း စစ်ကောင်စီတပ်က တပ်စွဲနေရာယူထားကြောင်း ဒေသခံ အိုက်လမ် (နာမည်လွဲ) က သျှမ်းသံတော်ဆင့်ကို ပြောသည်။
“သူတို့ တပ်ဖွဲ့ နှစ်ဖွဲ့ တပ်စွဲထားတဲ့နေရာက နှစ်ဖာလုံလောက်ပဲ ကွာဝေးတယ်၊ အဲ့လို အရမ်းနီးနေတော့ ပစ်ခတ်မှုက အချိန်မရွေး ဖြစ်ပွားနိုင်တယ်၊ အဲ့ကြောင့် စယ်လန့်ရွာထဲမှာ အစစအရာရာ သတိထားပြီး နေကြရတယ်” ဟု အိုက်လမ် (နာမည်လွဲ) က သျှမ်းသံတော်ဆင့်ကို ပြောသည်။
ကျေးရွာအတွင်း နေရာယူ တပ်စွဲထားသည့် လက်နက်ကိုင်တပ်ဖွဲ့များကြောင့် စစ်ရေး ပိုမိုပြင်းထန်လာမည်ကို စိုးရိမ်ရသည့်အပြင် သွားရေးလာရေးအတွက်လည်း သတိထား လုပ်ဆောင်နေရကြောင်း ဒေသခံ များထံမှ သိရသည်။
ထို့အပြင် စကစတပ် ပစ်လိုက်သည့် မပေါက်ကွဲသေးသည့် လက်နက်ကြီး (၃) လုံးကိုလည်း အမည်မသိ လက်နက်ကိုင် တပ်ဖွဲ့မှ လာရောက်သိမ်းဆည်းသွားကြောင်းလည်း အိုက်လမ် (နာမည်လွဲ) က သျှမ်းသံတော်ဆင့်ကို ဆက်ပြောသည်။
“တိုက်ပွဲပြီးကတည်းက စယ်လန့်ရွာထဲမှာ မကွဲသေးတဲ့ ၆၀ မမ အမျိုးအစား လက်နက်ကြီး (၃) လုံး ရှိတယ်။ မြောက်ကျောင်းထဲမှာ ၁ လုံး၊ ဈေးထဲမှာ ၂ လုံး ရှိခဲ့တယ်။ ဒါပေမဲ့ မနေ့ ညက အဲ့တာတွေ မတွေ့ရတော့ဘူး။ ဘယ်တပ်ဖွဲ့က လာသိမ်းပေးသွားလဲ မသိရဘူး” ဟု အိုက်လမ် (နာမည်လွဲ) က သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ နှင့် TNLA တပ်တို့ အကြား ထိတွေ့တိုက်ပွဲသည် ပြီးခဲ့သည့် သြဂုတ်လ ၂၈ ရက်နေ့မှ ၃၁ ရက်အထိ တိုက်ပွဲပြင်းထန်ခဲ့ခြင်း ဖြစ်ပြီး လက်ရှိတွင် စစ်ရေး တင်းမာနေခြင်းဖြစ် ကြောင်းသိရသည်။
စစ်ကောင်စီ နှင့် TNLA တိုက်ပွဲကြောင့် အရပ်သား ထိခိုက်ဒဏ်ရာရသည့်အပြင် နေအိမ် အဆောက်အဦးများလည်း ပျက်စီးရပြီး ဒေသခံ ၆၀၀ ကျော်က နေရပ်စွန့်ခွာ စစ်ရှောင်နေရဆဲဖြစ်သည်။
တိုက်ပွဲအတွင်း လက်နက်ကြီး နှင့် ကျည်ဆန်ထိပြီး ပျက်စီးသွားရသည့် နေအိမ် နှင့် အဆောက်အအုံများကိုလည်း မပြုပြင်နိုင်သေးသည့် အကြောင်း နှင့် ပျက်စီးမှုများအတွက် ပြန်လည်ပြုပြင်နိုင်ရန် အကူအညီများလည်း လိုအပ်နေကြောင်း ဒေသခံများထံမှ သိရသည်။
