သျှမ်းပြည် တောင်ကြီးခရိုင်၊ ညောင်ရွှေမြို့နယ်၊ အင်းလေးဒေသအတွင်း ကျင်းပပြုလုပ်မည့် ဖောင်တော်ဦး ဘုရားပွဲကို အကြောင်းပြပြီး ပအိုဝ်းအမျိုးသားအဖွဲ့ချုပ် (PNO/PNA) မှ တအိမ်လျှင် ကျပ်ငွေ တသောင်း တောင်းခံ နေကြောင်း သိရသည်။
.
သီတင်းကျွတ် လဆန်း ၁ ရက်မှ လပြည့်ကျော် ၃ ရက်အထိ ကျင်းပပြုလုပ်လေ့ရှိသည့် အင်းလေးဒေသ ဖောင်တော်ဦး ဘုရားပွဲကို အကြောင်းပြပြီး PNO တပ်ဖွဲ့မှ ပိုက်ဆံကောက် တောင်းယူခြင်းဖြစ်ကြောင်း အင်းလေးဒေသခံ လူငယ် အမျိုးသမီးတဦးက သျှမ်းသံတော်ဆင့်ကို ပြောသည်။
“အင်းလေးဘုရားပွဲမှာ PNO အဖွဲ့ လုံခြုံရေး လုပ်ပေးမယ်၊ လုံခြုံရေးခ တအိမ်ကို တစ်သောင်းကျပ် ပေးရမယ်ဆိုပြီးတော့ အင်းလေးထဲက ဒေသခံတွေကို အမိန့်ပေးလာတယ်။ အခုက အင်းမြောက်ပိုင်းမှာ စကောက်နေပြီ။ တောင်ပိုင်းကိုလည်း လာကောက်မယ်တဲ့” ဟု အင်းလေး ဒေသခံ လူငယ် အမျိုးသမီး တဦးက သျှမ်းသံတော်ဆင့်ကို ပြောသည်။
ယင်းကဲ့သို့ လုံခြုံရေးကို အကြောင်းပြ ငွေကြေးကောက်ခံခြင်းကြောင့် အင်းလေးဒေသခံများ အနေဖြင့် စားဝတ်နေရေး ခက်ခဲမှုကြား ငွေကြေး အခက်အခဲလည်း ရှိနေသည့်အတွက် ပေးဆောင်ရန် အခက်အခဲ ကြုံတွေ့နေရကြောင်း ဒေသခံများထံမှ သိရသည်။
ထို့အပြင် စစ်တပ်အာဏာသိမ်း မဖြစ်ခင် အချိန် လုံခြုံရေးအတွက် ညောင်ရွှေမြို့မှ ရဲတပ်ဖွဲ့ဝင် အနည်းငယ် ဖြင့်သာ ရှိခဲ့ပြီး လုံခြုံရေးအတွက် ငွေကုန်ကြေးကျ ကုန်ကျမှု မရှိခဲ့ဖူးကြောင်း အင်းလေးဒေသခံ လူငယ် အမျိုးသမီးက သျှမ်းသံတော်ဆင့်ကို ဆက်ဆိုသည်။
“နဂိုကတည်းက ဒေသခံတွေ စားဝတ်နေရေး ကြပ်တည်းနေပါတယ်ဆိုမှ မရမက အကြောင်းရှာပြီး ဒေသခံတွေ ရဲ့ အိတ်ကပ်ထဲက ငွေကို ညှစ်ထုတ်နေကြတယ်၊ ဒေသခံတွေကတော့ မပြောရဲလို့သာ မပြောကြတာ၊ ဘယ်သူမှ မပေးချင်ကြဘူး။ အရင်တုန်းကလည်း လုံခြုံရေးဖိုးဆိုပြီးတော့လည်း မပေးဖူးဘူးလေ၊ ခုက ရိုးရာပွဲကို အကြောင်းပြပြီး ငွေကောက်နေကြတယ်” ဟု လူငယ် အမျိုးသမီးက သျှမ်းသံတော်ဆင့်ကို ဆက်ဆိုသည်။
အင်းလေးဒေသ ဖောင်တော်ဦး ဘုရားပွဲကို အကြောင်းပြပြီး PNO တပ်မှ ပိုက်ဆံတောင်းကောက်ယူခြင်း၊ လက်နက်ပြ ခြိမ်းခြောက်ခြင်းတို့ကြောင့် နောင်တချိန်တွင် အင်းလေးဒေသခံ နှင့် ပအိုဝ်းလူမျိုးကြား လူမျိုးရေး ပဋိပက္ခဖြစ်ပွားမှာကို စိုးရိမ်ရကြောင်းလည်း အင်းလေးဒေသခံများက ပြောဆိုနေကြသည်။
အဆိုပါ အင်းလေး ဘုရားပွဲသို့ တက်ရောက်ခြင်း မပြုကြရန် နှင့် ယခုလို နိုင်ငံရေး မငြိမ်သက်ချိန် ပြုလုပ်မည့် ဘုရားပွဲကိုလည်း ကန့်ကွက် ဆန့်ကျင်ကြောင်း တော်လှန်ရေးအဖွဲ့ ၃ ဖွဲ့ ဖြစ်သည့် အင်းလေးပြည်သူ့ကာကွယ်ရေးတပ်ဖွဲ့ IPDF၊ အင်းလေး ဖက်ဒရယ် ဒီမိုကရေစီလှုပ်ရှားမှု (IFDM) နှင့် အင်းလေး အမျိုးသမီး သမဂ္ဂ (IWU) တို့က ထုတ်ပြန်ကြေညာထားသည်။
