Saturday, July 20, 2024

ကွတ်ခိုင်မြို့နယ် တိုက်ပွဲမှ လက်နက်ကြီး လမ်းမကြီးပေါ် ကျရောက်ပေါက်ကွဲ

Must read

သျှမ်းပြည် ကွတ်ခိုင်မြို့နယ် နမ့်ဖတ်ကာအနီးတွင် တိုက်ပွဲဖြစ်ပွားမှုကြောင့် လက်နက်ကြီးများသည် မူဆယ် – မန္တလေး ပြည်ထောင်စု ကားလမ်းမကြီးပေါ်ထိ ကျရောက်ပေါက်ကွဲကြောင်း စုံစမ်းသိရသည်။

.

စက်တင်ဘာလ ၁ ရက် ကွတ်ခိုင်မြို့နယ် နမ့်ဖတ်ကာအနီးတွင် စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲဖြစ်ပွားရာ နမ့်ဖတ်ကာ အခြေစိုက် စစ်ကောင်စီ တပ်ရင်း အမှတ် (၁၂၃) ပစ်လိုက်သည့် လက်နက်ကြီးတစ်လုံး လမ်းမကြီးပေါ်ထိ ကျရောက်ပေါက်ကွဲကြောင်း ဒေသအတွင်း သွားလာလှုပ်ရှားသည့် ကားသမား တစ်ဦးက သျှမ်းသံတော်ဆင့်ကို ပြောသည်။

“အဲနေ့က ညနေ ၄ နာရီဝန်းကျင်မှာ လမ်းမကြီးပေါ်ကို လက်နက်ကြီးက ကျပေါက်ကွဲတယ်။ အဲ့ဒီ အချိန်က ပစ်ခတ်သံတွေကြားလို့ ကားသမားတွေ လမ်းမှာ ရပ်ပြီး အခြေအနေ ကြည့်နေကြတဲ့ အချိန်ပေါ့။ လက်နက်ကြီးကျတဲ့နေရာက ကျနော်တို့ ရပ်နေကြတဲ့ နေရာနဲ့ သိပ်မဝေးဘူး” ဟု ဖြစ်စဥ်ကို ကားသမားတစ်ဦးက သျှမ်းသံတော်ဆင့်ကိုပြောသည်။

အဆိုပါ လက်နက်ကြီး ကျရောက်ပေါက်ကွဲသည့် နေရာသည် နမ့်ဖတ်ကာ ၊ ဇီးဒဘန်ရွာ အနီးဖြစ်ပြီး လက်နက်ကြီး လမ်းမပေါ် ကျရောက်ပေါက်ကွဲမှုကြောင့် လမ်းဘေး ရပ်နားထားပြီး အခြေအနေ စောင့်ကြည့်နေသည့် ကားသမားများလည်း လုံခြုံရေး အရ အဆိုပါ နေရာမှ ထွက်ခွာခဲ့ရကြောင်းလည်း အထက်ပါ ကားသမားက ဆက်ဆိုသည်။

“အစကတော့ တိုက်ပွဲတွေ ရှိလို့ ရှေ့ဆက်မတိုးရဲတာပေါ့။ ဒါပေမယ့် ရပ်နေလည်း လက်နက်ကြီးက လာကျနေတော့ အရဲစွန့်ပြီး အဲ့နေရာကနေ ထွက်ခွာကြတယ်။ ဘယ်နေရာမှာနေနေ မလုံခြုံဘူးဆိုတာ သိတော့ တချို့ကားသမားလည်း နောက်ကြောင်းပြန်လှည့်ကြတယ်“ ဟု အထက်ပါ ကားသမားက ပြောသည်။

အဆိုပါ စက်တင်ဘာလ (၁) ရက်နေ့၌ နမ့်ဖတ်ကာ အခြေစိုက် စစ်ကောင်စီတပ်မှ ပစ်လိုက်သည့် လက်နက်ကြီးကြောင့် အရပ်သား ၁ ဦး သေဆုံးပြီး ၃ ဦး ထိခိုက်ဒဏ်ရာ ရရှိခဲ့ကြောင်းလည်း စုံစမ်းသိရသည်။

ထို့အပြင် ယမန်နေ့ စက်တင်ဘာလ (၂) ရက်နေ့မှာလည်း စစ်ကောင်စီတပ် နှင့် TNLA တပ်တို့ ကွတ်ခိုင်အနီး ထိတွေ့တိုက်ပွဲ ထပ်မံဖြစ်ပွားခဲ့ကြောင်း စုံစမ်းသိရသော်လည်း ထိခိုက်ကျဆုံးမှုများ နှင့် ပတ်သက်ပြီး သျှမ်းသံတော်ဆင့် အနေဖြင့် ဆက်လက်စုံစမ်းနေဆဲ ဖြစ်သည်။

ပြီးခဲ့သည့် သြဂုတ်လ နောက်ဆုံးပတ်မှ စတင်ပြီး လက်ရှိအချိန်ထိ အာဏာသိမ်း စစ်ကောင်စီတပ် နှင့် TNLA တပ်တို့သည် ကွတ်ခိုင်မြို့နယ်၊ မူဆယ်မြို့နယ်အတွင်း ထိတွေ့တိုက်ပွဲ ပြင်းထန်ခဲ့ပြီး နှစ်ဖက်တပ်ဖွဲ့ ကြား၌ အရပ်သားထိခိုက်သေဆုံးမှုလည်း ရှိနေခဲ့သည်။

Leave a Comments

- Advertisement -spot_img

Latest article