သျှမ်းပြည် တောင်ကြီးမြို့ ရတနာသီရိရပ်ကွက်တွင် မိုးသည်းထန်စွာရွာသွန်းမှုကြောင့် နေအိမ်တစ်လုံးပေါ် အုတ်တံတိုင်းပြိုကျပြီး အမျိုးသမီးတစ်ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
.
ယမန်နေ့ (စက်တင်ဘာလ ၂ )ရက် ည ၉ နာရီခွဲတွင် မိုးသည်းထန်စွာ ရွာသွန်းမှုကြောင့် တောင်ကြီးမြို့ ရတနာသီရိရပ်ကွက်ရှိ ဓမ္မာဝိဒူ (အုတ်ဖို) ဘုန်းကြီးကျောင်းမှ အုတ်တံတိုင်းသည် လူနေအိမ်ပေါ်သို့ ပြိုကျပြီး အမျိုးသမီးတစ်ဦး ထိခိုက်ဒဏ်ရာရရှိသွားကြောင်း တောင်ကြီးမြို့နယ် ကြက်ခြေနီသူနာပြုတပ်ဖွဲ့မှ တာဝန်ခံတစ်ဦးက ပြောသည်။
“ မနေ့က မိုးတွေတအားရွာတော့ အုတ်ဖိုဘုန်းကြီးကျောင်းက အုတ်တံတိုင်းက အိမ်တစ်လုံးပေါ်ကို ပြိုကျသွားတာ။ အုတ်တံတိုင်းက ၆ ပေလောက် မြင့်တယ်။ အိပ်ခန်းထဲက အမျိုးသမီးတစ်ဦးကိုယ်ပေါ် ကျသွားတယ်။ ခါးအောက်ပိုင်းလုပ်မရ ဖြစ်သွားတယ် “ ဟု ၎င်းတာဝန်ခံတစ်ဦးက ပြောသည်။
အဆိုပါ ထိခိုက်ဒဏ်ရာရသူ အမျိုးသမီးတစ်ဦးကို တောင်ကြီးမြို့နယ် ကြက်ခြေနီသူနာပြုတပ်ဖွဲ့မှ လူနာတင်ယာဉ်ဖြင့် စဝ်စံထွန်းဆေးရုံသို့ ပို့ဆောင်ပေးခဲ့သည်။
အလားတူ မိုးသည်းထန်စွာ ရွာသွန်းမှုကြောင့် တောင်ကြီးမြို့အပြင် ကလောမြို့ ရပ်ကွက် ၄ မှ အနိမ့်ပိုင်းဒေသနှင့် ချောင်းနှဘေးတွင် ရေကြီးရေလျှံဖြစ်ပွားခဲ့ပြီး နေအိမ်အတွင်းသို့ ရေများစီးဝင်ခဲ့ကြောင်း သိရသည်။
