Saturday, July 20, 2024

သျှမ်းနယ်စပ်ဒေသ အပါအဝင် ကရင်နီ (ကယား) ပြည် တစ်လအတွင်း အရပ်သား ၆ ဦး သေဆုံး

Must read

သျှမ်းနယ်စပ်ဒေသ အပါအဝင် ကရင်နီ (ကယား) ပြည်တွင် သြဂုတ်လ တစ်လအတွင်း အရပ်သား ၆ ဦး သေဆုံးခဲ့ကြောင်း တိုးတက်သော ကရင်နီပြည်သူ့အင်အားစု PKPF က ယမန်နေ့ စက်တင်ဘာလ ၁ ရက်တွင် ထုတ်ပြန်ထားသည်။

.

စစ်တပ်အာဏာသိမ်း ၂ နှစ်ကျော်လကာလအတွင်း ကရင်နီ (ကယား) ပြည်နှင့် သျှမ်းနယ်စပ်ဒေသတွင် စစ်ကောင်စီ၏ လေကြောင်းတိုက်ခိုက်မှု အပါအဝင် စစ်ကောင်စီ လက်နက်ကြီး ရမ်းသမ်းပစ်ခတ်မှုများ၊ သတ်ဖြတ်ရက်စက်မှုများနှင့် မြေမြှုပ်မိုင်းများကြောင့် အရပ်သား ၅၀၀ ကျော် သေဆုံးခဲ့ကြောင်း ရေးသားဖော်ပြထားသည်။

တိုးတက်သော ကရင်နီပြည်သူ့အင်အားစုမှ ထုတ်ပြန်ချက်

၂၀၂၁ ခုနှစ် ဖေဖော်ဝါရီလ (၁) ရက်မှ ၂၀၂၃ သြဂုတ်လ (၃၁) ရက်အထိ သေဆုံးသွားသော အရပ်သား ပြည်သူစာရင်း စုစုပေါင်း ၃၈၀ ဦးရှိပြီး နေ့စဉ်သေဆုံးခဲ့သည့် စစ်ရှောင်စာရင်းမှာ စုစုပေါင်း ၁၄၂ ဦး ရှိကြောင်း ဆိုသည်။

ပြီးခဲ့သည့် ဇူလိုင်လအတွင်း ထုတ်ပြန်ခဲ့သည့် ထုတ်ပြန်ချက်အပေါ် ပြန်လည်နှိုင်းယှဥ် ကြည့်ပါက သြဂုတ်လ တစ်လအတွင်း သေဆုံးသွားသော အရပ်သား ပြည်သူစာရင်းထဲတွင် ၆ ဦး တိုးလာပြီး နေ့စဉ် သေဆုံးခဲ့သည့် စစ်ရှောင်စာရင်းမှာ ၁ ဦးရှိလာခဲ့သည်။

“အများဆုံးကတော့ စစ်ကောင်စီ ဖမ်းဆီး သတ်ဖြတ်ခံရတဲ့သူတွေ အများဆုံးပဲ။ နောက်ပြီး စစ်ကောင်စီက လက်နက်ကြီး ရမ်းသမ်းပစ်ခတ်လို့ လက်နက်ကြီး ကျည်ထိမှန်ပြီး သေဆုံးသွားတဲ့ သူတွေပါ့။ ကျန်တာတော့ မိုင်းနင်းမိလို့ သေဆုံးတဲ့သူတွေ၊ လေကြောင်းတိုက်ခံရလို့ သေဆုံးရတာတွေပေါ့ “ ဟု တိုးတက်သော ကရင်နီပြည်သူ့အင်အားစု PKPF မှ တာဝန်ခံတစ်ဦးက ပြောသည်။

ဒါ့အပြင် ကရင်နီ (ကယား) ပြည်တွင် စစ်ရေးပဋိပက္ခ ဖြစ်ပွားမှုကြောင့် လမ်းပန်းဆက်သွယ်ရေး ပိုမိုခက်ခဲလာရာမှ စစ်ရှောင်များထံ စားနပ်ရိက္ခာလုံလောက်စွာ မထောက်ပံ့နိုင်ခြင်း၊ ဆေးဝါးလုံလောက်မှု မရှိခြင်းကြောင့် နေ့စဉ်နီးပါး စစ်ရှောင်များ သေဆုံးနေရသည်။

အလားတူ ဖယ်ခုံမြို့နယ် စစ်ရှောင်ကူညီသူ ကော်မတီတစ်ဦးက “စစ်ကောင်စီ နဲ့ PNO စစ်ဆေးရေးဂိတ်မှာဆိုရင် သူတို့က စစ်ရှောင်တွေအတွက် စားနပ်ရိက္ခာဖြစ်တဲ့ ဆန်၊ ဆီ၊ ဆားတွေ ပေးမသယ်ဘူး။ သယ်လာတာ တွေ့ရင် သိမ်းတယ်။ ဒီဇယ်၊ စက်သုံးဆီတွေလည်း ပေးမသယ်ဘူး“ ဟု ဆိုသည်။

လက်ရှိအချိန်ထိ သျှမ်းနယ်စပ်ဒေသ နှင့် ကရင်နီ (ကယား) ပြည်တွင် စစ်ကောင်စီတပ် အင်အား ဖြည့်တင်းနေလျက်ရှိသလို လေယာဉ်ဖြင့် နေ့စဉ်နီးပါး ပျံဝဲနေပြီး စစ်ရှောင်များကို ပစ်မှတ်ထား၍ ဗုံးကြဲနေကြောင်း သိရသည်။

Leave a Comments

- Advertisement -spot_img

Latest article