Sunday, May 26, 2024

နမ့်ဖတ်ကာအတွင်း လက်နက်ကြီးကျ နေအိမ်တစ်လုံး နှင့် အရပ်သား ထိခိုက်မှုရှိနေ

Must read

သျှမ်းပြည် မူဆယ်ခရိုင် ကွတ်ခိုင်မြို့နယ် နမ့်ဖတ်ကာကျေးရွာအုပ်စုအတွင်း လက်နက်ကြီးကျရောက် ပေါက်ကွဲမှုကြောင့် နေအိမ်တစ်လုံး ပျက်စီးရသည့်အပြင် အရပ်သား ထိခိုက်မှုများလည်း ရှိနေကြောင်း သတင်းရရှိသည်။

.

ယနေ့ (သြဂုတ် ၃၀) ရက် နံနက် ၁၀ နာရီဝန်းကျင်တွင် ကွတ်ခိုင်အခြေစိုက် စစ်ကောင်စီ တပ်ရင်း တပ် အမှတ် (၁၂၃) မှ ပစ်ခတ်လိုက်သည့် လက်နက်ကြီး တစ်လုံးသည် ဈေးအတွင်းသို့ ကျရောက်ပေါက်ကွဲခဲ့ကြောင်း နမ့်ဖတ်ကာ ဒေသခံ ဦးလှ (နာမည်လွဲ) က သျှမ်းသံတော်ဆင့်ကို ပြောသည်။

“ဒီနေ့ ၁၀ နာရီလောက်မှာ ကားတစ်စီး၊ ဆိုင်ကယ်တစ်စီးနဲ့ TNLA ယူနီဖောင်းဝတ် လူတစ်စုက သေနတ်နဲ့ (၁၂၃) တပ်ရှေ့ မှာ လာပစ်သွားတယ်၊ အဲ့ကနေ စစ်ကောင်စီက လက်နက်ကြီးနဲ့ ရမ်းသမ်းပစ်နေကြတာ၊ သူတို့ ပစ်လိုက် တဲ့ လက်နက်ကြီး ဈေးအတွင်း ကျရောက်ပေါက်ကွဲသွားတယ်၊ လူတစ်ဦး ထိခိုက်ဒဏ်ရာ ရသွားတယ်” ဟု နမ့်ဖတ်ကာ ဒေသခံ ဦးလှ (နာမည်လွှဲ) က သျှမ်းသံတော်ဆင့်ကို ပြောသည်။

ယနေ့ သြဂုတ် (၃၀) ရက်သည် နမ့်ဖတ်ကာ ဈေးနေ့ဖြစ်သည့်အတွက် လက်နက်ကြီးသံများ ကြားရစဥ် ကတည်းက လူစုကွဲနေကြသော်လည်း ဈေးအတွင်း ပစ္စည်းသိမ်းနေသည့် အမျိုးသား တစ်ဦးကို လက်နက်ကြီးကျည်စ ထိမှန်ခြင်း ဖြစ်ကြောင်း သိရသည်။

လက်ရှိတွင် နှစ်ဖက်ပစ်ခတ်သံများ ငြိမ်သက်သွားသော်လည်း စစ်ကောင်စီဘက်မှ ရံဖန်ရံခါ ပစ်လိုက်သည့် လက်နက်ကြီးသံ ကြားနေရသေးကြောင်း ဒေသခံများထံ သိရသည်။

ထို့အပြင် ယမန်နေ့ (သြဂုတ် ၂၉ ) ရက်တွင်လည်း နမ့်ဖတ်ကာ အခြေစိုက် စစ်ကောင်စီတပ် (၁၂၃) တပ်မှ လက်နက်ကြီးဖြင့် တစ်ဖက်သတ် ရမ်းသမ်းပစ်ခတ်မှုကြောင့် နမ့်ဖတ်ကာ ရပ်ကွက် (၃) ရှိ ဦးမောင်မောင်သာ နေအိမ်ပေါ် လက်နက်ကြီး တစ်လုံး ထိမှန်ခဲ့ကြောင်းလည်း နမ့်ဖတ်ကာနေ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“လူကိုတော့ မထိဘူး။ အိမ်ခေါင်မိုးကတော့ အပေါက်ကြီးဖြစ်ပြီး သွပ်မိုးတွေ လန်သွားပြီ။ အိမ်ရှင်မိသားစုတွေ ကတော့ နီးစပ်ရာအမျိုးအိမ်မှာ ခေတ္တနေထိုင်ကြတယ်တဲ့၊ သူတို့ စားရေးသောက်ရေးအတွက်ကိုလည်း ဝိုင်းဝန်းကူညီ ကြတာပေါ့ ” ဟု နမ့်ဖတ်ကာ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီဘက်မှ လက်နက်ကြီး ရမ်းသမ်းပစ်ခတ်နေမှုကြောင့် နမ့်ဖတ်ကာ အတွင်း လူသွားလူလာ ကင်းမဲ့နေပြီး ဒေသခံများက ကတုတ်ကျင်းအတွင်း ခိုလှုံနေရကြောင်းလည်း အထက်ပါ အမျိုးသမီးက ဆက်ဆိုသည်။

“ဘယ်သူမှ အပြင်မထွက်ရဲကြဘူး။ ဈေးနေ့ဖြစ်ပေမဲ့ လက်နက်ကြီးသံ စကြားကတည်းက ဈေးသိမ်းနေကြပြီ။ အခုလည်း တချို့က ကတုတ်ကျင်းတွေတူးပြီး အဲ့ထဲမှာပဲ ဝပ်နေကြတယ်။ တချို့လည်း အိမ်ထဲမှာပဲ နေနေကြတာမျိုးပေါ့။ လမ်းပေါ်မှာတော့ ဘယ်သူမှ မရှိတော့ဘူး” ဟု အမျိုးသမီးက ဆက်ဆိုသည်။

အာဏာသိမ်း စစ်ကောင်စီ နှင့် TNLA တပ်တို့သည် ကွတ်ခိုင်မြို့နယ်၊ နမ့်ဖတ်ကာအတွင်းသာမကာ မူဆယ်မြို့နယ်၊ စယ်လန့်ကျေးရွာအုပ်စု အတွင်းမှာလည်း စစ်ရေး တင်းမာမှုများ ရှိနေကြပြီး လေယာဥ်ဖြင့်ပါ ဗုံးကြဲ တိုက်ခိုက်မှု များ ရှိနေကြသည်။

စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် သျှမ်းပြည်အတွင်း လှုပ်ရှားနေကြသည့် တိုင်းရင်းသား လက်နက်ကိုင် တပ်ဖွဲ့များ နှင့် ထိတွေ့တိုက်ပွဲ များပြားလာပြီး နေအိမ်စွန့်ခွာ စစ်ရှောင်ထွက်ပြေးရသည့် ဒေသခံများလည်း များပြားလာသည်။

Leave a Comments

- Advertisement -spot_img

Latest article