မြန်မာ – ထိုင်းနယ်စပ်ဒေသ တာချီလိတ်မြို့တွင်း နေအိမ်ထဲနေထိုင်သည့် အမျိုးသမီးနှင့် ကလေးငယ်ကို အမည်မသိလူတစုက လက်နက်ကိုင်ဆောင်လာပြီး ပြန်ပေးဆွဲရန် ကြိုးစားခဲ့ကြောင်း စုံစမ်းသိရသည်။
.
ဖြစ်စဉ်မှာ ယမန်နေ့ (သြဂုတ် ၂၈) ရက် ည ၇ နာရီဝန်းကျင်တွင် တာချီလိတ်မြို့ ဆန်ဆိုင်းရပ်ကွက်အတွင်းရှိ နေအိမ်တစ်လုံးထဲကို ကားတစီး နှင့် မျက်နှာဖုံးစွပ် အမည်မသိ လူ ၃ ဦးက သေနတ်ကိုင်ဆောင်ပြီး ရောက်ရှိလာခဲ့ကာ အမျိုးသမီးတစ်ဦးကို တရွတ်တိုက်တံခါးဝသို့ ဆွဲခေါ်လာပြီး ပြန်ပြေးဆွဲရန် ကြိုးစားခဲ့ကြောင်း တာချီလိတ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အိမ်မှာက သူ့ယောင်္ကျား မရှိဘူး။ ၅ နှစ်ကလေးငယ်တစ်ယောက်နဲ့ အမျိုးသမီးတစ်ယောက်ပဲ ရှိတယ်။ အိမ်ထဲကိုဝင်ပြီးတော့ အဲ့အမျိုးသမီးကို တံခါးဝထိ အတင်းဆွဲခေါ်လာတာ။ အိမ်ပြင်လည်း ရောက်ရော အဲ့အမျိုးသမီးက လိုက်မသွားချင်တာ ရုန်းနေချိန်မှာ လမ်းမှာလည်း လူတွေကများတယ်လေ။ သူတို့လည်း ဆက်မဆွဲတော့ဘဲ ကားထဲပြန်ဝင်ပြီး ပြန်မောင်းထွက်သွားတာ “ ဟု ၎င်းအမျိုးသားက ပြောသည်။
အဆိုပါ အမျိုးသမီးတစ်ဦးကို တရွတ်တိုက်ဆွဲခေါ်ခဲ့သောကြောင့် ကြမ်းပြင်နှင့်တိုက်မိပြီး ထိခိုက်ဒဏ်ရာ အနည်းငယ် ရရှိခဲ့သည်။
တာချီလိတ်မြို့သည် မြန်မာ – ထိုင်းနယ်စပ်ဒေသဖြစ်ပြီး လောင်းကစားဝိုင်း၊ မူးယစ်ဆေးဝါးများ အလွယ်တကူရရှိသည့် နယ်မြေဖြစ်ကာ စီးပွားရေးလုပ်ငန်းရှင်ကြီးများလည်း မကြာခဏ ပြန်ပေးဆွဲခံရသည်။
တာချီလိတ်မြို့ ဒေသခံ အမျိုးသားတစ်ဦးက “ တာချီလိတ်မြို့မှာတော့ ဘာမှ လုံခြုံရေး မရှိတော့ဘူး။ ဖြစ်နိုင်ရင်တော့ ပြည်သူ့စစ်တွေအနေနဲ့ တာဝန်အရ ရပ်ကွက်ထဲမှာ လုံခြုံရေးလုပ်ပေးဖို့ လိုတယ်။ ဆိုင်ကယ်ဆိုလည်း နေ့တိုင်းပျောက်နေတာ။ မူးယစ်ဆေးဝါးသုံးတဲ့လူတွေကလည်း များတယ်။ ရေရှည်မှာ ပြည်သူတွေလည်း ဘယ်သူ့ကိုသွားပြီး အားကိုးလို့ မရတော့ဘူး “ ဟု ဆိုသည်။
စစ်တပ်က အာဏာသိမ်းပြီးနောက်ပိုင်း မြန်မာ – ထိုင်း နယ်စပ်ဒေသ တာချီလိတ်မြို့တွင် ရွှေ့ပြောင်းအလုပ်သမားများ၊ လူနေထူထပ်မှုများလာသလို တစ်ဖက်တွင် နယ်စပ်ဒေသဖြစ်သောကြောင့် အွန်လိုင်းဂိမ်း လုပ်ကိုင်သူများ၊ လိမ်လည်ဖြားယောင်းသူများ၊ ခိုးဆိုးလုယက်သူများလာပြီး အရေးယူဆောင်ရွက်မှုများ မရှိကာ ဉပဒေမဲ့ဖြင့် ပြည်သူများ၏ လုံခြုံရေးသည်မရှိတော့ကြောင်း သိရသည်။
