Thursday, April 18, 2024

စစ်ကောင်စီ ဦးစီးကျင်းပပြုလုပ်မည့် ဖောင်တော်ဦးဘုရားပွဲကို အင်းတော်လှန်ရေးအဖွဲ့များ ဆန့်ကျင်

Must read

အာဏာသိမ်း စစ်ကောင်စီ ဦးစီးကျင်းပပြုလုပ်မည့် အင်းလေး ဖောင်တော်ဦးဘုရားပွဲကို အင်းတော်လှန်ရေးအဖွဲ့အစည်း ၃ ဖွဲ့က ဆန့်ကျင်ကြောင်း စုံစမ်းသိရသည်။

.

အဆိုပါ ဖောင်တော်ဦးဘုရားပွဲကို ကန့်ကွက် ဆန့်ကျင်သည့် တော်လှန်ရေးအဖွဲ့ ၃ ဖွဲ့ သည်
အင်းလေးပြည်သူ့ကာကွယ်ရေးတပ်ဖွဲ့ IPDF၊ အင်းလေး ဖက်ဒရယ် ဒီမိုကရေစီလှုပ်ရှားမှု (IFDM) နှင့် အင်းလေး အမျိုးသမီး သမဂ္ဂ (IWU) တို့ ဖြစ်ကြောင်း သိရသည်။

ပုံ – ဟောင်း (အင်းလေးဖောင်တော်ဦးဘုရားပွဲ)

ကိုဗစ် – ၁၉ ရောဂါဖြစ်ပွားချိန်မှစ၍ ၃ နှစ်ကျော်ကြာ မကျင်းပခဲ့ရသည့် အင်းလေး ဖောင်တော်ဦးဘုရားပွဲကို လာမည့် သီတင်းကျွတ်လဆန်း ၁ ရက်မှ လပြည့်ကျော် ၃ ရက်အထိ အာဏာသိမ်း စစ်ကောင်စီက ပြန်လည်ကျင်းပဖို့အတွက် စီစဉ်နေခြင်း ဖြစ်သည်။

အဆိုပါ စစ်ကောင်စီ ဦးစီးကျင်းပပြုလုပ်မည့် အင်းလေး ဖောင်တော်ဦးဘုရားပွဲ နှင့် ပတ်သက်ပြီး အင်းလေးအမျိုးသမီး သမဂ္ဂမှ အမည်မဖော်လိုသူ တစ်ဦးက ယခုလိုပြောသည်။

“ ကျမတို့ အနေနဲ့ကတော့ တနိုင်ငံလုံး အတိုင်းအတာ နဲ့ ပြည်သူတွေ ဒုက္ခရောက်နေကြတယ်။ စစ်မက် မဖြစ်တဲ့ ဒေသဖြစ်ပေမဲ့ စစ်ကောင်စီ အလိုကျ ဘာသာရေး ဗန်းပြပြီး ပျော်ပွဲ၊ ရွှင်ပွဲ မလုပ်စေချင်ဘူး။ လူသားချင်း စာနာမှု မဲ့နေတယ်လို့ ခံစားရတယ်“ ဟု ၎င်းက ပြောသည်။

အာဏာသိမ်းပြီးနောက်ပိုင်း စစ်ကောင်စီသည် လူ့အခွင့်အရေးဆိုင်ရာ အမျိုးမျိုး ချိုးဖောက်နေရာမှ ယခုတစ်ခါ အင်းလေး ဖောင်တော်ဦး ဘုရားပွဲ ပြုလုပ်ပြီး မူးယစ်ဆေးဝါး နှင့် စစ်တပ်ထုတ်ကုန်များ ရောင်းချခြင်း၊ လောင်းကစားဝိုင်းများ ကျင်းပပြုလုပ်ခြင်းကို ဆန့်ကျင်သွားကြောင်း IPDF၊ IFDM နှင့် IWU မှထုတ်ပြန်သည့် သဘောထားထုတ်ပြန်ချက်တွင် ရေးသားဖော်ပြထားသည်။

အလားတူ အင်းလေးဒေသခံ အမျိုးသမီးတစ်ဦးက “ ပြောချင်တာက ရိုးရာဘုရားပွဲဆိုပေမယ့် နောက်ဆက်တွဲ ရလဒ်က ဒေသခံလူထုတွေရဲ့ အိတ်ကပ်ထဲကငွေကို နည်းအမျိုးမျိုးနဲ့ နှိုက်ယူလို့ရတဲ့ လမ်းကြောင်းတွေ အများကြီးရှိနေတယ်။ အင်းထဲမှာ ပွဲမလုပ်တာလည်း ကြာပြီ။ အခုနိုင်ငံရေးအခြေနေ နဲ့ ပွဲကိုအကြီးကြီး ထလုပ်ရင် လူထုတွေ တော်တော်ထိန်းရ ခက်မှာပဲ။ အန္တရာယ်လည်း များတယ် “ ဟု ၎င်းဆိုသည်။

ပြီးခဲ့သည့် အင်းလေးရေပေါ် သင်္ကြန်ပွဲတော်တွင်လည်း စစ်ကောင်စီက ဦးစီးပြီး ကျင်းပပြုလုပ်သွားခဲ့ရာ ပွဲစည်ဖို့အတွက် လူငှားခေါ်ခဲ့ကြောင်း သိရသည်။

Leave a Comments

- Advertisement -spot_img

Latest article