သျှမ်းပြည် တောင်ကြီးမြို့တွင် မီတာခ မဆောင်သည့် နေအိမ်များကို မြို့နယ်လျှပ်စစ် ( EPC) ရုံးမှ ဝန်ထမ်းများက လျှပ်စစ်မီး လိုက်လံဖျက်နေကြောင်း စုံစမ်းသိရသည်။
.
ပုံမှန်လစဉ် ပေးဆောင်ရမည့် မီတာခများကို မပေးဆောင်သောကြောင့် မြို့နယ် EPC ရုံးမှ ဝန်ထမ်းများသည် အိမ်တိုင်ရောက် မီတာဘောက်ရှိ အဝင်မီးကြိုးကို ဖြတ်ချပြီး မီတာခဆောင်မှသာလျှင် လျှပ်စစ်မီး ပြန်ပေးမည်ဟု စာစောင်ကပ်သွားကြောင်း တောင်ကြီးမြို့ဒေသခံ တစ်ဦးက ပြောသည်။
“ မနက် ၉ နာရီလောက်ဆို ဦးထုပ်အပြာရောင်ဆောင်းထားတဲ့ အဖွဲ့က လိုက်ဖြတ်တာပါပဲ။ တချို့ မီတာဆောင်ရမှာ မဆောင်ဘဲ မေ့နေတာလေ။ တချို့က ငွေရှာရတာ ခက်ခဲလာတော့ အဆင်မပြေတာနဲ့ မဆောင်တော့တာတွေကြောင့် မဆောင်ကြတာပေါ့။ ကံကြီးရပ်ကွက်မှာဆို ၃၆ အိမ်လောက် အဖြတ်ခံရတယ် “ ဟု တောင်ကြီးမြို့ဒေသခံ တစ်ဦးက ပြောသည်။
အဆိုပါ မီတာခ မဆောင်ခြင်းကြောင့် တောင်ကြီးမြို့ပေါ်ရှိ ကံကြီးရပ်ကွက်အပြင် မြို့မ၊ စိန်ပန်း၊ ဘုရားဖြူ၊ ကျောင်းကြီးစု စသည့် ရပ်ကွက်များမှ နေအိမ်များ မီးဖြတ်ခံနေရကြောင်း သိရသည်။
လက်ရှိ အိမ်သုံး မီတာခ တစ်ယူနစ်ကို ၂၅ ကျပ်မှ ၅၀ ကျပ်အထိ ရှိပြီး လုပ်ငန်းသုံး မီတာခ တစ်ယူနစ်ကို ၁၂၅ ကျပ်ရှိကြောင်း သိရသည်။
ထို့အပြင် လျှပ်စစ်မီး ဖြတ်တောက်ခံထားရသည့် နေအိမ်များသည် ပြန်လည်တပ်ဆင်လိုပါက မြို့နယ် EPC နှင့် လင်းသီဟကုမ္ပဏီထံကို အကြောင်းကြားရပြီး တပ်ဆင်ခ ထပ်မံပေးဆောင်နေရကြောင်း ဒေသခံတစ်ဦးက ဆက်ပြောသည်။
“ငွေကတော့ သွင်းပြီးပြီ။ အခုထိ လာမတပ်ပေးသေးဘူး။ ၃ ရက်လောက်ရှိပြီ။ မီးဖြတ်ခံရတဲ့ အိမ်တွေများတော့ အခုအလှည့်ကျ စောင့်ရမယ်လို့လည်း ကြားတယ် “ ဟု ၎င်းက ပြောသည်။
အလားတူ မီတာခ ဆောင်ရမည့်ရက်မှစ၍ ရက်ကျော်လွန်သွားပါက တစ်ရက်ကို ကျပ်ငွေ ၁၀၀၀ နှုန်းဖြင့် ရက်လွန်ကြေး ပေးဆောင်ရကြောင်း သိရသည်။
စစ်တပ်က အာဏာသိမ်းပြီးနောက်ပိုင်း တောင်ကြီးမြို့အပြင် တခြားမြို့ပြကြီးများတွင်လည်း ၂၄ နာရီအတွင်း မီးပုံမှန် လာနိုင်ခြင်းမရှိဘဲ မြို့နယ် EPC မှ ပုံမှန်လစဉ် မီတာခ ဆောင်ခိုင်းနေသောကြောင့် အခက်ခဲရှိနေကြောင်း ဒေသခံများက ပြောဆိုနေကြသည်။
Leave a Comments