ယခုနှစ် သြဂုတ်လအတွင်း သျှမ်းပြည် တဝှမ်းလုံးတွင် အခြေခံ စားသောက်ကုန်စည်ဈေးနှုန်းများ အပါအဝင် ဆန်၊ ဆီဈေးနှုန်းများလည်း အဆမတန် မြင့်တက်လာသည့်အတွက်ကြောင့် ပြည်သူများက စားဝတ် နေရေးခက်ခဲကျပ်တည်းနေရကြောင်း စုံစမ်း သိရသည်။

.

သြဂုတ်လဆန်းပိုင်းမှ စတင်ကာ ယနေ့အချိန်အထိ သျှမ်းပြည်မှ အခြေခံ စားသောက်ကုန်များ ဖြစ်ကြသည့် ၂ လီတာ ဆီ တစ်ဗူးကို ယခင်အချိန် ၁၀,၅၀၀ ကျပ်မှ ၊ ယခုတွင် ၁၄,၀၀၀ ထိ ရှိလာကြောင်း ပင်လုံမြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အရမ်းကို ခက်ခဲလာပါတယ်။ အရင် ၁၀,၅၀၀ ကျပ် ဆီတစ်ဗူးက အခု ၁၄,၀၀၀ ထိရှိလာပြီ။ ပြီးတော့ ဆန်တအိတ်ဆိုရင် အရင်က ၈၀,၀၀၀ ကျပ်ရှိခဲ့ပေမယ့် အခုက ၁ သိန်းရှိလာပြီ။ ဒါက စကစ ကနေ ကျပ် ၂၀,၀၀၀ တန် ထုတ်မယ်ဆိုတဲ့ သတင်းထွက်ပေါ်လာကတည်းက ကုန်စည်အားလုံးဈေးတက်တာ” ဟု ပင်လုံမြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် ယခင် စစ်အာဏာမသိမ်းခင် ကြက်ဥ ၁၀ လုံး ၁,၂၀၀ ကျပ် ရှိခဲ့ဖူးပေမယ့် လက်ရှိ စစ်အာဏာသိမ်းပြီး ၂ နှစ်ကျော်ကြာလာသည့် အချိန်တွင် ကြက်ဥ ၁ လုံးကို ၁၇၀ ကျပ်အထိ ဈေးနှုန်းမြင့်တက်လာကြောင်း ပင်လုံဒေသခံများထံမှ သိရသည်။

ယင်းကဲ့သို့ ကုန်စည်ဈေးနှုန်းများ မြင့်တက်လာခြင်းသည် စစ်ကောင်စီမှ ၂၀,၀၀၀ ကျပ်တန် ထုတ်ဝေသည့် သတင်းနှင့် ဆက်စပ်နေပြီး ထိုင်းမှ တင်သွင်းလာသည့် ကုန်ပစ္စည်းများ အားလုံး ဈေးပုံမှန် မရှိကြောင်း လင်းခေးဒေသခံ ဆိုင်ရှင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“၂၀,၀၀၀ ကျပ်တန် ထုတ်မယ် ဆိုတဲ့ သတင်းထွက်ကတည်း ကုန်ဈေးနှုန်းတွေ မငြိမ်တော့ဘူး။ ထိုင်းက တင်သွင်းလာတဲ့ ပစ္စည်းတွေကို ဒီနေ့မှာ ဒီဈေးနဲ့ ရောင်းခဲ့ပေမဲ့ မနက်ဖြန်မှာ ဒီဈေးနဲ့ ပြန်ဝယ်နိုင်မလား ဆိုတာ မသေချာဘူး။ အရင်းပြုတ်နိုင်တဲ့ အခြေအနေတွေပဲ ကြုံနေရတယ်။ ဝယ်ယူရတဲ့ ကုန်ဈေးနှုန်း သာတက် နေပြီး၊ ဒီဒေသထွက်ကုန်ပစ္စည်းဈေးတွေကတော့ ဘာမှ မတက်ဘူး” ဟု လင်းခေး ဒေသခံ ဆိုင်ရှင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်သည် စက်သုံးဆီ ပျှမ်းမျှဈေးနှုန်း ၂,၇၀၀ ကျပ်မှ ၃,၁၀၀ ကျပ်၊ ဆန်တစ်ပိုင်း ယခင်ဈေးနှုန်း ၃၀,၀၀၀ ကျပ်သာ ရှိခဲ့သော်လည်း လက်ရှိတွင် ၇၀,၀၀၀ ကျပ်အထိ ရှိနေကြောင်း ဒေသခံများက ပြောသည်။

ထို ကုန်စည်ဈေးနှုန်းများမြင့်တက်၊ ဝမ်းရေးအတွက် ခက်ခဲကျပ်တည်းရသည့် အချိန်၌ ဒေသအတွင်း ခိုးဆိုးလုယက်မှုများလည်း ပေါများလာကြောင်း အထက်ပါ မိုင်းပန်မြို့ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“အခုချိန်မှာ အားလုံးက ခက်ခဲနေတယ် ဆိုပေမဲ့ အချောင်လိုချင်တဲ့ မသမာသူတွေကတော့ ခိုးကြ နှိုက်ကြတာပေါ့၊ အပြင်သွားရင် ပိုက်ဆံ အများကြီး မယူရဲဘူး။ ရွှေထည်ဆိုလည်း မဝတ်ရဲတော့ဘူး၊ မတော်တဆ လုယက်ခံရရင် အသက်ပါ ပါသွားနိုင်တယ်၊ အရာရာကို စိုးရိမ်ပူပန်နေရတယ်။” ဟုမိုင်းပန် ဒေသခံ အမျိုးသမီး တစ်ဦးက ပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက် စီးပွားရေး လုပ်ငန်းများ ကျဆင်းလာရသည့် အပြင် ပြည်သူလူထု ခက်ခဲကျပ်တည်းစေသည့် ကုန်သွယ်ရေးလမ်းကြောင်း ပိတ်ခြင်း၊ ငွေကြေးလဲလှယ်မှုနှုန်း ကန့်သတ်ခြင်း တို့ကြောင့် ပြည်သူများ၏ စားဝတ်နေရေးလည်း တစ်နေ့ထက် တစ်နေ့ ကျပ်တည်းလာကြောင်း သိရသည်။

ထို့အပြင် အာဏာသိမ်းမှု နောက်ဆက်တွဲ နိုင်ငံရေး မတည်ငြိမ်မှုတွေကြောင့် ပြည်ပထွက်ပြေးရသည့် ဒေသခံများပြားသလို လောင်းကစားဝိုင်းများ၊ တရားမဝင် လုပ်ငန်းများလည်း ဒေသအတွင်း များပြားလာကြောင်း သိရသည်။