သျှမ်းပြည် တောင်ကြီးမြို့ရှိ ကုန်စုံဆိုင်တချို့ ကုန်စျေးနှုန်းမြင့်တက်မှုကြောင့် ဆိုင်များ ပိတ်သိမ်းထားလိုက်ရကြောင်း စုံစမ်း သိရှိရသည်။
.
ပြီးခဲ့သည့် သြဂုတ်လ ဒုတိယပတ်အတွင်းတွင် မြန်မာကျပ်ငွေ ၁ သိန်းလျှင် ထိုင်းဘတ် ၁ ထောင်အောက်အထိ ကျဆင်းသွားခဲ့သည့်အတွက် ကုန်စုံဆိုင်များ ပိတ်သိမ်းထားလိုက်ရကြောင်း တောင်ကြီး ကုန်စုံဆိုင် ပိုင်ရှင် တစ်ဦးကပြောသည်။
“ ဆိုင်တွေ ပိတ်သိမ်းလိုက်တာတော့ရှိတယ်။ ကုန်စုံဆိုင်တွေလည်း ပိတ်တာတွေရှိတယ်။ အများအားဖြင့်တော့ စားသောက်ဆိုင်တွေ ပိတ်လိုက်ကြတာပေါ့။ ဈေးနှုန်းကလည်း မတည်ငြိမ်ဘူးလေ။ ဒီနေ့ဈေးနဲ့က အမြတ်ဆိုရင် မနက်ဖန်က အရင်းဖြစ်သွားတယ်။ နောက်တစ်နေ့ဆိုရင် အရှုံးပေါ်သွားတယ်။ အဲကြောင့် ကုန်ဈေးနှုန်း တစ်ချို့တွေက ပိတ်လိုက်ရတာဖြစ်တယ်” ဟု တောင်ကြီး ကုန်စုံဆိုင် ပိုင်ရှင်တစ်ဦးက ပြောသည်။
စစ်အာဏာသိမ်းမှု (၂) နှစ်တာ ကာလအတွင်း နိုင်ငံရေး အခြေနေကြောင့် စီးပွားရေး ကျဆင်းလာခြင်း ဖြစ်သည်။
အလားတူ စစ်အာဏာသိမ်းမှု (၂) နှစ်တာ ကာလအတွင်း နိုင်ငံရေး အခြေနေကြောင့် စီးပွားရေး ကျဆင်းလာခြင်း၊ ကုန်စျေးနှုန်း မြင့်တက်လာခြင်းသည် ယခင်က ကြက်ဥ (၅) လုံးကို ၁ ထောင်ကျပ်သာ ပေးရပေမယ့် ယခုနောက်ပိုင်း ကြက်ဥ (၃) လုံးကို ၁ ထောင်အထိ စျေးနှုန်း မြင့်တက်ခဲ့ကြောင်း သိရသည်။
ကုန်စျေးနှုန်း မြင့်တက်ခဲ့သည့်အတွက်ကြောင့် ပင်လောင်းမြို့နယ်အတွင်း တောထဲတွင် စစ်ရှောင်နေရသည့် စစ်ဘေးရှောင်များလည်း ထောက်ပံ့မှု မရှိတော့သည့်အတွက်ကြောင့် စားဝတ်နေရေးအတွက် ခက်ခဲနေကြောင်း စစ်ရှောင်များကို ကူညီပေးသူ တစ်ဦးက ပြောသည်။
“အခက်ခဲကတော့ လမ်းပန်းဆက်သွယ်ရေးလည်း ခက်ခဲတာပေါ့။ စားဝတ်နေရေးအတွက် ကူညီဖို့ဆိုရင်လည်း ထောက်ပံ့မှုကလည်း မရှိဘူး” ဟု စစ်ရှောင်များကို ကူညီပေးသူ တစ်ဦးကပြောသည်။
ကုန်စျေးနှုန်းမြင့်တက်မှုကြောင့် ပြည်သူများ စားဝတ်နေရး ခက်ခဲလာကြပြီး ငွေကြေးလုံလောက်မှု မရှိတော့သဖြင့် အခက်ခဲ ကြုံတွေ့နေရသည်။
“အရင်ဆိုရင် တောင်ကြီးတစ်ခါသွားရင် ၁ သိန်းလောက်ဆို လုံလောက်ပြီ။ အခုဆိုရင် အနည်းဆုံး ၅ သိန်းလောက်ရှိမှ သွားလာလို့ရတယ်။ ကျနော်တို့လည်း အခုဆို ဘယ်မှ မသွားနိုင်တော့ဘူး။ မလိုအပ်တဲ့ ပစ္စည်းတွေလည်း မဝယ်တော့ဘူး။ တကယ်လိုအပ်မှပဲ ပစ္စည်းတွေကို ဝယ်တယ်။ ဈေးတွေကလည်း အကုန်လုံး မြင့်တက်သွားတယ်” ဟု ပင်လောင်းဒေသခံ တစ်ဦး ကပြောသည်။
မြန်မာ ကျပ်ငွေ ၂ သောင်းတန်ထွက်လာပြီးနောက်ပိုင်း မြန်မာကျပ်ငွေ တန်ဖိုးကျဆင်းလာခဲ့ပြီး စင်္ကာပူ အခြေစိုက် UOB ဘဏ်မှလည်း မြန်မာလုပ်ငန်းရှင်များ၏ လုပ်ငန်းသုံးငွေလွှဲ ငွေပေးချေမှု ယာယီဆိုင်းငံ့လိုက်သည့်အတွက်ကြောင့် ငွေစျေး ထပ်မံကျဆင်းလာခဲ့ရကြောင်း သိရသည်။
မြန်မာကျပ်ငွေ စျေးနှုန်းတန်ဖိုး ကျဆင်းလာသည့်အတွက်ကြောင့် ကျပ်ငွေကိုင်ဆောင်သူများလည်း နည်းပါးလာခဲ့သည်။
အလားတူ စစ်ကောင်စီသည် သြဂုတ် (၂၀) ရက်က လူတစ်ဦးကို ဒေါ်လာ ၁ သောင်း ကိုင်ဆောင်ခွင့် ရှိသော်လည်း အဆိုပါ ငွေကို (၆) လအထက် လက်ထဲ ထားခွင့်မရှိကြောင်း စစ်ကောင်စီဘက်က သတင်းထုတ်ပြန်ထားသည်။
