သျှမ်းပြည် တောင်ကြီးခရိုင်၊ တောင်ကြီးမြို့ ပြည်တော်သာ ရပ်ကွက်ရှိ ယခင် ဆောက်လုပ်ရေးဝန်ကြီး ဌာနပိုင် မြေကွက်ပေါ် တည်ဆောက်ငှားရမ်းထားသည့် ဆိုင်ခန်းများကို စက်ယန္တရားများဖြင့် ဖြိုဖျက်နေကြောင်း စုံစမ်း သိရသည်။
.
ယနေ့ (သြဂုတ်လ ၂၁) ရက် နံနက်ပိုင်းတွင် တောင်ကြီးမြို့ ပြည်တော်သာရပ်ကွက်ရှိ မင်းကျောင်းဘုန်းကြီးကျောင်းအနီး ဆိုင်ခန်းများကို စက်ယန္တရားများဖြင့် လူတစ်စုက လာရောက် ဖြိုဖျက်ခဲ့ကြောင်း တောင်ကြီး ဒေသခံ အမျိုးသား တစ်ဦးထံမှ သတင်းသိရသည်။
“အဲ့ဒီ နေရာမှာ စည်ပင်က ဝန်ထမ်း ၃/၄ ယောက်လည်း ရောက်နေတယ်၊ အဲ့နားက လူတွေကို မေးကြည့်တော့ အရင်က အစိုးရပိုင်မြေ ဖြစ်ပေမဲ့ အခုက ကန်ထရိုက်တာ တစ်ဦးဆီကို ရောင်းလိုက်လို့ ဆိုင်ခန်းတွေကို အကုန်ပြောင်းရွှေ့ခိုင်းတာ၊ ဒီနေ့ စက်တွေနဲ့ လာဖြိုတာပေါ့၊ ၄/၅ ခန်းလောက်တော့ ဖြိုပြီးသွားပြီ” ဟု တောင်ကြီး ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ နေရာသည် ယခင်အချိန်တွင် ဆောက်လုပ်ရေး ဝန်ကြီးဌာနပိုင် နယ်မြေဖြစ်ပြီး ဆိုင်ခန်းများကို ငှားရမ်းသူ အဆက်ဆက် ပြောင်းရွှေ့နေထိုင်ကြပြီး လက်ရှိ စစ်အာဏာသိမ်းချိန်တွင် ကန်ထရိုက်တာ တစ်ဦးထံသို့ ရောင်းချခြင်း ခံလိုက်ရကြောင်း သိရသည်။
ယင်းကဲ့သို့ အစိုးရပိုင်မြေကို ပုဂ္ဂလိကပိုင်ဖြစ်အောင် ကန်ထရိုက်ဆီသို့ ရောင်းချခြင်း နှင့် ပတ်သက်ပြီး နှစ်ဖက်အချင်းချင်း ညှိနှိုင်းမှု ရှိနိုင်မည် ဖြစ်ကြောင်းလည်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
“အခု ဖျက်တာက အစိုးရဖျက်တာ မဟုတ်ဘူး။ ကန်ထရိုက်တာက အဆင့်မြင့် အဆောက်အဦး ဆောက်ဖို့ ထွက်ခိုင်းတာ မထွက်လို့ ဘူဒိုဇာတွေနဲ့ ထိုးဖျက်လိုက်တာလို့ သိရတယ်၊ အစိုးရပိုင်မြေကနေ အခု ကြတော့ ဘယ်ကနေ ဘယ်လိုငြိလိုက်တယ် မသိဘူး ၊ ကန်ထရိုက် တစ်ယောက်က ပိုင်သွားတယ်လို့ သိရတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကိုပြောသည်။
အဆိုပါ ဆိုင်ခန်းများသည် စုစုပေါင်း ၂၀ ကျော် ရှိနေပြီး ကွမ်းယာဆိုင်၊ ကုန်စုံဆိုင် အသေး၊ ဆေးဆိုင် ၊ ဆေးခန်း နှင့် ဝပ်ရှော့များလည်း ဖွင့်လှစ်ထားသည့် နေရာ ဖြစ်နေကြောင်းလည်း သိရသည်။
လက်ရှိတွင် ဆိုင်ခန်းဖျက်သိမ်းခံရသူများသည် အိမ်တွင်းပစ္စည်းများလည်း အနည်းငယ်ကိုသာ ယူဆောင်နိုင်ပြီး ဆိုင်ခန်းအဖျက်မခံရသေးသည့် သူများကလည်း ပြောင်းရွှေ့ရန်အတွက် ပြင်ဆင် နေလျက်ရှိကြောင်းလည်း အနီးပတ်ဝန်းကျင်တွင် နေထိုင်သူ တစ်ဦးက သျှမ်းသံတော်ဆင့်ကို ပြောသည်။
“ဒီနေ့မှာ ဖျက်ခံလိုက်ရတဲ့ ဆိုင်ခန်းက သူတွေကတော့ ဘာပစ္စည်းမှတော့ မသိမ်းလိုက်ရဘူးပေါ့၊ အခုကျန်နေတဲ့ သူတွေကလည်း ပြောင်းရွှေ့ဖို့ ပစ္စည်းတွေ သိမ်းနေကြပြီ၊ အမှန်တော့ ဒီလို မလုပ်သင့်ပါဘူး။ အားလုံး အခက်အခဲကိုယ်စီ ရှိနေချိန် နေစရာမဲ့သွားအောင် ထပ်လုပ်တာက လူမဆန်တဲ့ လုပ်ရပ်ဖြစ်တယ်” ဟု အနီးပတ်ဝန်းကျင်တွင် နေထိုင်သူ တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဖေဖော်ဝါရီလတွင်းမှာလည်း တောင်ကြီးမြို့ရှိ စစ်တပ်၏ တပ်ပိုင်နယ်မြေအတွင်း ဆိုင်ခန်းများ ဖြိုဖျက်ခံ ရပြီးနောက် အလုပ်လက်မဲ့ဖြင့် အိမ်ခန်းငှားခ စရိတ်များ အခက်ကြုံတွေ့နေ ရကြောင်း သိရှိရသည်။
