ထိုင်းနိုင်ငံ ချင်းမိုင်ခရိုင်အတွင်းနေထိုင်သည့် အသက် (၆)နှစ် အရွယ်ရှိ သျှမ်းရွှေ့ပြောင်း ကလေးငယ်တစ်ဦး ရက်စက်စွာ သတ်ဖြတ်ခံရကြောင်း သတင်းရရှိသည်။

.

ဖြစ်စဉ်မှာ ယမန်နေ့ ဩဂုတ် ၁၅ ရက်နေ့ မွန်းလွဲပိုင်း ၃ နာရီခွဲ ကလေးကျောင်းဆင်းချိန်၌ အသက် (၂၉) နှစ်အရွယ် စိုင်းကောင်ခမ်းဆိုသူက သွားကြိုပြီး ချင်းမိုင်ခရိုင် ဟန်တုန်းမြို့နယ်အတွင်းခေါ်ဆောင်သွားကာ သတ်ဖြတ်ခဲ့ပြီး ရေကန်ထဲ ပစ်ချခဲ့ကြောင်း သိရသည်။

စိုင်းကောင်ခမ်းသည် ၎င်းသတ်ဖြတ်ခဲ့သည့် ကလေးငယ်၏ အဒေါ်နှင့် ချစ်သူဖြစ်ခဲ့ဖူးပြီး လွန်ခဲ့သည့် တလတွင် လမ်းခွဲခဲ့ကြသည်။ ထို့နောက် အဒေါ်ဖြစ်က ၎င်း၏ အချစ်ကို ပြန်လက်မခံသဖြင့် ကလေးငယ်ကို ဓားစာခံအဖြစ် ခေါ်ဆောင်သွားပြီး သတ်ဖြတ်ခဲ့ခြင်းဖြစ်ကြောင်း သိရသည်။

ထိုသတ်ဖြတ်ခံရသည့် ကလေး၏ ရုပ်အလောင်းကို ချင်းမိုင်ခရိုင် ဟန်တုန်းမြို့နယ်အတွင်းရှိ ရေကန်ထဲတွင် ယနေ့ ဩဂုတ် ၁၆ ရက်တွင် ကျောင်းဝတ်စုံဖြင့် သေဆုံးနေလျက် ပြန်တွေ့ခဲ့သည်။

“ သူဘာကြောင့် အဲလိုလုပ်တာလည်းတော့ အတိကျ မပြောနိုင်ဘူး။ ကလေးကို သတ်သွားတဲ့သူကလည်း ကလေးနဲ့ ဦးလေးတော်တယ်။ သူက ကျနော်မိန်းမ ရဲ့ ညီမလေးနဲ့ ရည်းစား ဖြစ်နေတာ။ လမ်းခွဲပြီးတော့ သူက ပြန်ကောင်းချင်တာ။ ပြန်မကောင်းလို့ဆိုပြီးတော့ ကျနော်တို့ ကလေးကို ကျောင်းမှာသွားကြိုပြီး ခေါ်သွားလိုက်တာ” ဟု ကလေး၏ ဖခင်ဖြစ်သူက သျှမ်းသံတော်ဆင့်ကို ပြောသည်။

လက်ရှိ ကလေးကို သတ်ခဲ့သည့် စိုင်းကောင်ခမ်းကို ထိုင်းအရာရှိရဲတွေက ဖမ်းဆီးထားလိုက်ပြီ ဖြစ်ကြောင်းသိရသည်။

စိုင်းကောင်ခမ်းသည် အသက် (၂၉) နှစ်အရွယ်ရှိပြီး သျှမ်းပြည် ပင်လောင်းမြို့ ဒေသခံတစ်ဦးဖြစ်သည်။