ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA) တည်ထောင်ခြင်း (၅၂) နှစ်ပြည့် အခမ်းအနားကို ဌာနချုပ် ဝမ်ဟိုင်းတွင် ကျင်းပ ပြုလုပ်ခဲ့ကြောင်း သိရသည်။

ယနေ့ သြဂုတ်လ ၁၆ ရက် နံနက်ပိုင်း ၈ နာရီဝန်းကျင်မှ စတင်ကာ ၁၀ နာရီအထိ ဝမ်ဟိုင်းဌာနချုပ် ရှိရာ ကျေးသီးမြို့နယ်၊ ခုံပန်ကျေးရွာအုပ်စုမှ ကျောက်တိုင်ကွင်း အတွင်းတွင် ကျင်းပပြုလုပ်ခြင်း ဖြစ်ကြောင်း SSPP ၏ သတင်းစာမျက်နှာဖြစ်သည့် SSPP info က ထုတ်ပြန်ထားသည်။

အဆိုပါ အခမ်းအနားတွင် SSPP ၏ နာယက ဖြစ်သူ စဝ်ဆေထင်မှ အဖွင့်အမှာစကားနှင့် အတူ SSPP တည်ထောင်မှု သမိုင်းကြောင်းများ၊ ယခင်ကာလ အခြေအနေများ နှင့် လက်ရှိ အခြေအနေများ ကွာခြားချက် တို့ကို ရှင်းလင်းပြောဆိုခဲ့ကြောင်းလည်း SSPP info က ရေးသားထုတ်ပြန်ထားသည်။

ယင်းနောက်တွင် SSPP တည်ထောင်ခြင်း (၅၂) နှစ်ပြည့် အခမ်းအနားသို့ နိုင်ငံရေး ပါတီများမှ ပေးပို့လာသော သဝဏ်လွှာများကိုလည်း ဖတ်ကြားခဲ့ကြောင်းလည်း သိရသည်။

ယနေ့ ကျင်းပပြုလုပ်သည့် SSPP တည်ထောင်ခြင်း (၅၂) နှစ်ပြည့် အခမ်းအနားတွင် SSPP မှ ဗဟိုကော်မတီဝင် (၁၆) ဦး၊ သက်ဆိုင်ရာ တပ်ရင်းတပ်ဖွဲ့မှ တာဝန်ရှိသူများ၊ ကျောင်းသား/သူများ၊ အမျိုးသမီးအဖွဲ့များနှင့် ပြည်သူလူထုများ စုစုပေါင်း (၂,၁၅၉) ဦးတက်ရောက်ခဲ့ကြောင်းလည်း သိရသည်။